មហាវិថីសម្តេច ហ៊ុន សែន (ឬហៅថាផ្លូវ៦០ម៉ែត្រ) ជាខ្សែផ្លូវតភ្ជាប់ភាគកណ្តាល ទៅជាយប៉ែកខាងត្បូងនៃរាជធានីភ្នំពេញ។ ក្រោយការស្ថាបនាផ្លូវមេនេះឡើងមក គេសង្កេតឃើញមានការអភិវឌ្ឍន៍គម្រោងបុរីលំនៅដ្ឋានសម្រាប់ពលរដ្ឋគ្រប់ស្រទាប់វណ្ណៈ តំបន់អគារពាណិជ្ជកម្ម សាលារៀន ផ្សារទំនើប និងហេដ្ឋារចនាសម្ព័ន្ធផ្សេងៗជាច្រើនផ្សេងទៀត។ បើយោងតាមផែនការមេរបស់សាលារាជធានីឆ្នាំ២០៣៥ បានកំណត់យកទីតាំងភាគខាងត្បូងទីក្រុងភ្នំពេញធ្វើជាទីក្រុងបៃតង និងមជ្ឍមណ្ឌលពាណិជ្ជកម្មដ៏សំខាន់មួយសម្រាប់រាជធានីភ្នំពេញ។

ផ្លូវ៦០ម៉ែត្រ បានលាតសន្ធឹងដោយឆ្លងកាត់សង្កាត់ចំនួនបី គឺសង្កាត់ចាក់អង្រែលើ និងចាក់អង្រែក្រោមក្នុងខណ្ឌមានជ័យ និងសង្កាត់ជើងឯកក្នុងខណ្ឌដង្កោ។ ក្រោយពីការសាងសង់ផ្លូវ៦០ម៉ែត្រនេះរួចមក គេសង្កេតឃើញថាគម្រោងអភិវឌ្ឍបុរីលំនៅដ្ឋានគ្រប់កម្រិតត្រូវបានសាងសង់ឡើងយ៉ាងច្រើនកុះករ ខណៈតំបន់ភាគខាងត្បូងទីក្រុងភ្នំពេញនេះ ដើមឡើយជាតំបន់វាលមានទឹកលិចរាល់រដូវវស្សាហ៍។

គម្រោងលំនៅដ្ឋានបុរីថ្មីៗ

នៅលើមហាវិថី សម្តេច ហ៊ុន សែន ឬផ្លូវ៦០ម៉ែត្រ ក៏ជាតំបន់មួយដែលកំពុងមានកំណើនវិនិយោគខ្លាំងលើផ្នែកសាងសង់អគារខុនដូរខ្ពស់ៗ និងបុរីលំនៅដ្ឋានរស់នៅផងដែរ បើធៀបនឹងតំបន់ដទៃទៀតនៅក្នុងរាជធានីភ្នំពេញ។ បច្ចុប្បន្ន តំបន់នេះមានគម្រោងអភិវឌ្ឍន៍ជាច្រើនមានវត្តមាននៅទីនោះ ស្របនឹងគម្រោងផែនការភិវឌ្ឍន៍ទីក្រុងរបស់សាលាក្រុងភ្នំពេញនៅឆ្នាំ២០៣៥។

បើនិយាយអំពីគម្រោងសាងសង់អគារខុនដូធំៗវិញមាន៖ គម្រោងអភិវឌ្ឍន៍ R&F City, គម្រោង Urban Village គម្រោង THE RESIDENCE ទីក្រុងរណប ING City ។ គម្រោងបុរីល្បីៗ ជាច្រើនរួមមាន៖ បុរីជីបម៉ុង បុរីពិភពថ្មី និងបុរីប៉េងហួតក៏មានវត្តមាននៅតាមបណ្តោយផ្លូវ៦០ម៉ែត្រនេះផងដែរ។

Aeon 3

វត្តមាននៃការបង្កើតផ្សារទំនើបអ៊ីអន៣ (អ៊ីអនមានជ័យ) នៅក្នុងភាគខាងត្បូងនៃទីក្រុងភ្នំពេញនេះ ក៏ជាចំណុចទាក់ទាញពិសេសមួយផងដែរ។ បច្ចុប្បន្ន គម្រោងសាងសង់ផ្សារទំនើរ គឺកាន់តែពេញនិយម ហើយការសាងសង់លើផ្ទៃដីធំទូលាយ និងទំនើបតាមស្តង់ដារអន្តរជាតិ ឆ្លើយតបតាមតម្រូវការរបស់មនុស្សសម័យថ្មី។ ម្យ៉ាងទៀត ផ្សារទំនើបមិនគ្រាន់តែជាកន្លែងដើរផ្សារទិញទំនិញតែមួយមុខនោះទេ ផ្សារទំនើបទាំងនោះមានជាកន្លែងកំសាន្តសម្រាប់យុវវ័យ និងកុម៉ារ កន្លែងលេងកីឡា និងតាំងបង្ហាញសេវាកម្មនិងផលិតផលថ្មីៗ រួមជាមួយនឹងតុបតែងផ្ទៃខាងក្នុង និងខាងក្រៅយ៉ាងទាក់ទាញផ្អែកលើបរិស្ថាន សុខមាលភាពដល់ភ្ញៀវជាដើម។ យីហោម៉ាកល្បីៗ រោងកុន អាហាររដ្ឋានល្បីៗ និងសេវាកម្មផ្សេងៗ បូករួមជាមួយនឹងសន្តិសុខសុវត្ថិភាព គឺជាចំណុចសំខាន់ក្នុងការទាក់ទាញអតិថិជន៕

ព្រលានយន្តហោះអន្តរជាតិថ្មី

អាកាសយានដ្ឋានអន្តរជាតិភ្នំពេញថ្មីមានទំហំផ្ទៃដី ២,៦០០ ហិកតាមានទីតាំងក្នុងក្រុងតាខ្មៅ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល ពោលគឺមានចម្ងាយប្រមាណ ២០ គីឡូម៉ែត្រស្ថិតនៅប៉ែកខាងត្បូងរាជធានីភ្នំពេញ។ ការងារសាងសង់អាកាសយានដ្ឋានកម្រិតលំដាប់អន្តរជាតិនេះបានចាប់ផ្តើមឡើងនៅឆ្នាំ២០១៩។ គេរំពឹងថាអាកាសយានដ្ឋានអន្តរជាតិភ្នំពេញថ្មីនេះនឹងដើរតួយ៉ាងសំខាន់ក្នុងការជំរុញកំណើនសេដ្ឋកិច្ច និងទេសចរណ៍របស់កម្ពុជា ក្រោយបញ្ចប់ការសាងសង់នៅឆ្នាំ២០២៤ ខាងមុខ។

យោងតាមផែនការមេបង្ហាញថា អាកាសយានដ្ឋានអន្តរជាតិភ្នំពេញថ្មី នឹងអាចទទួលអ្នកដំណើរបាន ១៣ លាននាក់ក្នុងមួយឆ្នាំក្នុងដំណាក់កាលទី១ និងអ្នកដំណើរ ៣០លាននាក់ក្នុងដំណាក់កាលទី២នៅឆ្នាំ២០៣០ និងក្នុងដំណាក់កាលទី៣ នឹងទទួលអ្នកដំណើររហូតដល់ ៥០លាននាក់នៅឆ្នាំ២០៥០។