ចំណាប់អារម្មណ៍អំពីការតាមដានសកម្មភាពកីឡាករ កីឡាការនី ខ្មែរក្នុងព្រឹត្តិការណ៍អូឡាំពិក នៅទីក្រុងតូក្យូ ប្រទេសជប៉ុន

TOP › Column › NyoNyum Khmer › ចំណាប់អារម្មណ៍អំពីការតាមដានសកម្មភាពកីឡាករ កីឡាការនី ខ្មែរក្នុងព្រឹត្តិការណ៍អូឡាំពិក នៅទីក្រុងតូក្យូ ប្រទេសជប៉ុន

2021.11.23

NyoNyum Khmer

ព្រឹត្តិការណ៍អូឡាំពិក និងប៉ារ៉ាឡាំពិកតូក្យូ២០២០ ត្រូវបានប្រារព្ធឡើងក្នុងអំឡុងពេលនៃការឆ្លងជំងឺកូវីដ-១៩។ ដូច្នេះរាល់ការប្រកួតនៅក្នុងព្រឹត្តិការណ៍នេះ ត្រូវបានទស្សនាពីចម្ងាយ។ ទស្សនិកជនអាចទស្សនា តាមរយៈការផ្យាយបន្ដផ្ទាល់នៅលើកញ្ចក់ទូរទស្សន៍ និងបណ្ដាញសង្គមជាដើម។ ប្រព័ន្ធផ្សព្វផ្សាយជប៉ុនបានជួយសម្រួលដល់ការទស្សនា ហើយគេអាចធ្វើការគាំទ្រអត្តពលិក ដោយមធ្យោបាយផ្សព្វផ្សាយថ្មីៗ។ ដូច្នេះ តើកម្មវិធីផ្សព្វផ្សាយនេះមានលក្ខណៈពិសេសយ៉ាងណា? យើងបានសាកសួរពីចំណាប់អារម្មណ៍របស់អ្នកគាំទ្រខ្មែរ កំពុងបម្រើការងារនិងរស់នៅក្នុងប្រទេសជប៉ុន ដែលបានតាមដានទស្សនាការផ្សាយបន្តផ្ទាល់ការប្រកួតរបស់អត្តពលិកខ្មែរ ក៏ដូចជាជប៉ុនតាមរយៈកម្មវិធីទស្សនាពីចម្ងាយ។

តើអ្នកយល់ឃើញដូចម្តេចចំពោះព្រឹត្តិការណ៍កីឡាអូឡាំពិកតូក្យូ២០២០?

លោកគ្រូ ញឹម សុធាវិន្ទ

លោកគ្រូ ញឹម សុធារិន្ទ កំពុងទស្សនាពិធីបើកកីឡាអូឡាំពិកតូក្យូ២០២០ នៅគេហដ្ឋាន

លោកគ្រូមានអាយុ (៤៨ឆ្នាំ) បច្ចុប្បន្ន ជាអ្នកស្រាវជ្រាវនៅមជ្ឈមណ្ឌលអាស៊ី សិក្សាស្រាវជ្រាវនិងបណ្ដុះបណ្ដាលធនធានមនុស្សនៃសាកលវិទ្យាល័យសូហ្វ៊ីយ៉ា និងជាគ្រូបង្រៀនប្រវត្តិសាស្ត្រ និងភាសាខ្មែរនៃសាកលវិទ្យាល័យសូហ្វ៊ីយ៉ា រស់នៅប្រទេសជប៉ុនរយៈពេល២១ឆ្នាំ។ លោកគ្រូជាអ្នកតាមដានពីសកម្មភាពរបស់អត្តពលិកកម្ពុជាក្នុងព្រឹត្តិការណ៍អូឡាំពិកទីក្រុងតូក្យូ២០២០ ដែលទើបនឹងបញ្ចប់កាលពីពេលថ្មីៗនេះ។ លោកគ្រូបានបង្ហាញអារម្មណ៍រំភើបរីករាយនៅពេលឃើញមានវត្តមានប្រទេសកំណើតរបស់ខ្លួននៅក្នុងព្រឹត្តិការណ៍លក្ខណៈអន្តរជាតិបែបនេះ និងបានលើកឡើងពីចលនាអ្នកគាំទ្ររបស់បងប្អូនខ្មែរនៅជប៉ុនដែរ។

លោកគ្រូ សុធាវិន្ទ៖ “ខ្ញុំពិតជារំភើបណាស់នៅពេលដែលឮថាខ្មែរបានមកចូលរួមប្រកួតកីឡាអូឡាំពិកនៅទីក្រុងតូក្យូ។ ខ្ញុំមានអារម្មណ៍សប្បាយ និងពិតជាចង់ទៅគាំទ្រផ្ដល់កម្លាំងចិត្តដល់កីឡាករ កីឡាការនី ខ្មែរខ្លាំងណាស់ ប៉ុន្ដែដោយសារមានការហាមឃាត់មិនឱ្យមានអ្នកគាំទ្រទៅទស្សនាផ្ទាល់ (ចូលរួមទប់ស្កាត់ការឆ្លងរីករាលដាលជំងឺកូវីដ) ដូច្នេះហើយខ្ញុំមានតែគាំទ្រពីចម្ងាយ និងជំរុញឱ្យពួកគាត់ខិតខំប្រឹងប្រែងនេះឯង។ ខ្ញុំយល់ថាប្រសិនបើគ្មានការរំខានដោយសារបញ្ហាកូវីដទេ នោះច្បាស់ណាស់ នឹងមានវត្តមានបងប្អូនខ្មែរកុះករដែលរស់នៅទីនេះទៅចូលរួមគាំទ្រផ្ដល់កម្លាំងចិត្តជាក់ជាពុំខាន”។

លោកគ្រូយល់ថាកម្ពុជាបានបញ្ចូនអត្តពលិកមកប្រកួតវិញ្ញាសាទាំងពីរនេះ (ហែលទឹក និងអត្តពលកម្ម) គឺមិនមានសង្ឃឹមអាចដណ្ដើមមេដាយបានឡើយ ព្រោះវិញ្ញាសាទាំងនេះសុទ្ធតែជាប្រភេទកីឡាដែលមានការប្រកួតប្រជែងខ្ពស់ និងទាមទារឱ្យមានការបណ្ដុះបណ្ដាលបំពាក់បំប៉នខ្លាំង គួបផ្សំនឹងបច្ចេកទេសខ្ពស់ផងដែរ ទើបអាចមានលទ្ធភាពប្រជែងជាមួយបណ្ដាប្រទេសដទៃ។ យ៉ាងណាក៏ដោយ លោកគ្រូបានបង្ហាញពីការលើទឹកចិត្ត និងជំរុញឱ្យអត្តពលិកមានការខិតខំប្រឹងប្រែងប្រកួតប្រជែងនៅលើទីលានផងដែរ។ លោកគ្រូសុធាវិន្ទ៖ “យើងទាំងអស់គ្នាសុទ្ធតែបានដឹងរួចមកហើយពីការប្រកួតវិញ្ញាសាទាំងពីរប្រភេទនេះ។ សមត្ថភាពកីឡាករ កីឡាការិនីខ្មែរនៅមានកម្រិត ណាមួយយើងមិនបានទៅរំពឹងអ្វីនៅពេលដែលឃើញពួកគាត់ប្រកួតជាមួយអត្តពលិកខ្លាំងៗ ដែលគេមានបច្ចេកទេស និងបទពិសោធន៍ល្អជាងយើងនោះទេ ប៉ុន្ដែអ្វីដែលសំខាន់ គឺយើងចង់ឃើញពួកគាត់មកទីនេះប្រកួតឱ្យអស់ពីសមត្ថភាព ដើម្បីសន្សំបទពិសោធន៍ក៏ដូចជាបច្ចេកទេសល្អៗសម្រាប់យកទៅអភិវឌ្ឍខ្លួនឯងជាបន្ដទៀត”។ លោកគ្រូបានបន្តទៀតថា៖ “យ៉ាងណាក៏យើងបានឃើញអត្តពលិករបស់យើងធ្វើបានល្អដែរ ដូចជាការបំបែកឯកទកម្មខ្លួនឯងលើកំណត់ត្រាចាស់ពួកគាត់ជាដើម នេះរាប់ថាជាភាពជោគជ័យដ៏ធំធេងរបស់ពួកគាត់ និងសម្រាប់ប្រទេសកម្ពុជាយើងហើយ”។

លោក ហ៊ីម ចាន់រិទ្ធ

លោក ហ៊ីម ចាន់រិទ្ធ (២៥ឆ្នាំ) ជាបុគ្គលិកបម្រើការងារនៅក្នុងក្រុមហ៊ុនឯកជនមួយនៅប្រទេសជប៉ុន។ លោកបានប្រាប់ពីចំណាប់អារម្មណ៍របស់ខ្លួនអំពីការទស្សនាកីឡាអូឡាំពិកតាមកម្មវិធីទស្សនាពីចម្ងាយដូច្នេះថា៖ “យើងដឹងហើយថា អូឡាំពិកលើកនេះគេមិនឱ្យមានអ្នកទៅទស្សនាផ្ទាល់នោះទេ ប៉ុន្ដែអ្នករស់នៅក្នុងប្រទេសជប៉ុន អាចតាមដានរាល់ការប្រកួតក្នុងវិញ្ញាសាផ្សេងៗតាមកម្មវិធី NHK។ កម្មវិធីនេះ បានបញ្ជូនទស្សនីយភាពនៃការប្រកួត គឺមានកម្រិតច្បាស់ខ្លាំងណាស់ ហើយអាចមើលតាមបែប 3D ទៀតផង។ ខ្ញុំមានអារម្មណ៍ដូចជា ខ្លួនឯងបានទៅទស្សនាផ្ទាល់ ដោយសារបច្ចេកវិជ្ជាទំនើប គេអាចប្រើមនុស្សយន្ត (Robot) ផ្ដិតយកសកម្មភាពប្រកួតច្បាស់ពិតៗដូចយើងឃើញនឹងភ្នែកផ្ទាល់អ៊ីចឹង”។ លោកបានបន្ដទៀតថា៖ “ក្នុងកម្មវិធីនេះ មានមុខងារពិសេសត្រង់ថា គេអាចបង្ហាញពីការគាំទ្រដោយផ្ញើសារលើកទឹកចិត្តទៅកាន់អត្តពលិក ដែលកំពុងស្ថិតនៅកន្លែងប្រកួតផ្ទាល់ដូចជា ចុចរូបបេះដូង រូប sticker ផ្សេងៗ និងសរសេរជាអក្សរជាដើម។

យ៉ាងណាមិញ យុវជនខ្មែររូបនេះក៏បានសម្តែងការយល់ឃើញថា សមត្ថភាពរបស់អត្តពលិកកម្ពុជានៅមានកម្រិតបើធៀបទៅនឹងអត្តពលិកលំដាប់ពិភពលោក ប៉ុន្ដែរូបលោកជឿជាក់ថា អត្តពលិកខ្មែរអាចមានសមត្ថភាពប្រជែងយកមេដាយនៅក្នុងថ្នាក់តំបន់បាន៕

សម្រាប់ពត៌មានបន្ថែម

【NyoNyum Khmer No. 48】