ការប្រកួតកីឡាប្រជាជាតិអាស៊ីអាគ្នេយ៍ ដែលហៅកាត់ថាស៊ីហ្គេម (មកពីពាក្យអង់គ្លេស Southeast Asian Games ឬ SEA Games) គឺជាព្រឹត្តិការណ៍កីឡាពហុជាតិសាសន៍នៃបណ្ដាប្រទេសនៅអាស៊ីអាគ្នេយ៍ទាំង១១។ ស៊ីហ្គេមត្រូវគេប្រារព្ធធ្វើឡើងរៀងរាល់២ឆ្នាំម្ដង ដោយប្រទេសជាសមាជិកផ្លាស់ប្ដូរវេនគ្នាធ្វើជាម្ចាស់ផ្ទះ។ ព្រឹត្តិការណ៍នេះរៀបចំឡើងដោយ សហព័ន្ឋកីឡាប្រជាជាតិអាស៊ីអាគ្នេយ៍ (Southeast Asian Games Federation) ក្រោមការត្រួតពិនិត្យពី គណកម្មការអូឡាំពិកអន្តរជាតិ (International Olympic Committee ហៅកាត់ថា IOC ) និង ក្រុមប្រឹក្សាអូឡាំពិកអាស៊ី (Olympic Council of Asia)។

ព្រឹត្តការណ៍ប្រកួតកីឡាស៊ីហ្គេម មានដើមកំណើតពីការប្រកួតកីឡាឧបទ្វីបអាស៊ីអាគ្នេយ៍ (Southeast Asian Peninsular Games ឬ SEAP Games) ដែលមានសមាជិកដំបូងដូចជា៖ ថៃ ភូមា ( បច្ចុប្បន្នមីយ៉ាន់ម៉ា) ម៉ាឡាយ៉ា(បច្ចុប្បន្នម៉ាឡេស៊ី) ឡាវ វៀតណាមខាងត្បូង និងកម្ពុជា។ ប្រទេសទាំង ៦ ខាងលើនេះបានព្រមព្រាងគ្នាឱ្យមានការរៀបចំការប្រកួតកីឡា SEAP Games រៀងរាល់២ឆ្នាំម្ដង។ ការប្រកួតកីឡា SEAP Games លើកទី១ ធ្វើឡើងនៅទីក្រុងបាងកក ពីថ្ងៃទី១២ ដល់១៧ ខែធ្នូ ឆ្នាំ១៩៥៩។ យ៉ាងណាមិញ គេមិនឃើញមានវត្តមានរបស់ប្រទេសកម្ពុជាចូលរួមក្នុងព្រឹត្តិការណ៍នេះឡើយ។

ដោយឡែក ព្រឹត្តិការណ៍ប្រកួតកីឡា SEAP Games ឆ្នាំ១៩៦១ បានប្រារព្ធឡើងនៅទីក្រុងយ៉ាំងហ្គូន ប្រទេសភូមា (បច្ចុប្បន្ន មីយ៉ាន់ម៉ា) ជាមួយនឹងកីឡាចំនួន ១៣ប្រភេទ។ ពេលនោះហើយដែលកម្ពុជាបានចូលរួមក្នុងព្រឹត្តិការណ៍នេះជាលើកដំបូង។ វិញ្ញាសាកីឡាទាំង១៣ប្រភេទនោះមានដូចជា៖ ហែលទឹក អត្តពលកម្ម កីឡាវាយសី បាល់បោះ ប្រដាល់ ជិះកង់ បាល់ទាត់ បាញ់កាំភ្លើង ជិះទូក វាយកូនឃ្លីលើតុ កីឡាវាយកូនបាល់ បាល់ទះ និងការលើកទម្ងន់។ ដោយក្នុងកម្ពុជាសម្រេចបានសម្ធផលដូចជា៖ មេដាយមាសមួយ ប្រាក់ ៦គ្រឿង និងសំរឹទ្ធចំនួន ៤គ្រឿង។

នៅឆ្នាំ១៩៦៣ សហព័ន្ឋកីឡាប្រជាជាតិអាស៊ីអាគ្នេយ៍បានឱ្យប្រទេសកម្ពុជារៀបចំធ្វើជាម្ចាស់ផ្ទះការប្រកួតកីឡាឧបទ្វីបជាលើកដំបូង ប៉ុន្ដែកាលពីពេលនោះប្រទេសកម្ពុជាបានដកខ្លួនព្រោះមានបញ្ហានយោបាយក្នុងប្រទេស ក៏ត្រូវបានរំសាយចោល ហើយការប្រកួតកីឡាឧបទ្វីបលើកទី៣ក៏មិនបានប្រារព្ធឡើងដែរ។ ការប្រកួតកីឡាឧបទ្វីបត្រូវបានលើកទៅប្រារព្ធនៅឆ្នាំ១៩៦៥ ដែលប្រទេសម៉ាឡេស៊ីគឺជាម្ចាស់ផ្ទះ ហើយក្នុងនោះកម្ពុជាក៏មិនបានអវត្តមានដែរ។ ក្រោយមកព្រឹត្តការណ៍ប្រកួតកីឡា SEAP Games ពីចន្លោះឆ្នាំ១៩៦៧ ដល់ឆ្នាំ១៩៦៩ គេមិនឃើញមានវត្តមានប្រទេសកម្ពុជាចូលរួមឡើយ។ ជារួម បើនិយាយពីការអវត្តមានរបស់ប្រទេសកម្ពុជាក្នុងការប្រកួតកីឡាឧបទ្វីប និងកីឡាស៊ីហ្គេម ( ដូចគ្នាគ្រាន់តែមានការផ្លាស់ប្ដូរឈ្មោះហៅ) គឺមានចំនួនរហូតដល់៩ដង។ ពោលគឺលើកដំបូងនៅឆ្នាំ១៩៥៩ បំាងកក ឆ្នាំ១៩៦៧ បាំងកក ឆ្នាំ១៩៦៩ យ៉ាំងហ្គូន ឆ្នាំ១៩៧៧ កូឡាឡាំពួរ ឆ្នាំ១៩៧៩ ហ្សាការតា ឆ្នាំ១៩៨១ ម៉ានីល ឆ្នាំ១៩៨៩ កូឡាឡាំពួរ ឆ្នាំ១៩៩១ ម៉ានីល និងនៅឆ្នាំ១៩៩៣ សិង្ហបុរី។

នៅឆ្នាំ១៩៧៧ គណកម្មការកីឡាឧបទ្វីបអាស៊ីអាគ្នេយ៍បានរាប់បញ្ចូលប្រទេសឥណ្ឌូនេស៊ី និងហ្វីលីពីន រួមទាំងព្រុយណេ ឱ្យចូលរួមក្នុងព្រឹត្តិការណ៍នេះ ហើយចាប់តាំងពីពេលនោះមកកីឡាឧបទ្វីបត្រូវបានប្ដូរឈ្មោះទៅជា កីឡាអាស៊ីអាគ្នេយ៍ ឬ ស៊ីហ្គេម (Southeast Asian Games) មកទល់បច្ចុប្បន្ន។ នៅឆ្នាំ២០០៣ ប្រទេសទីម័រខាងកើតត្រូវបានដាក់បញ្ចូលជាសមាជិកទី១១នៃការប្រកួតកីឡា SEAP Games។

ចាប់តាំងពីកម្ពុជាចូលរួមប្រកួតកីឡាឧបទ្វីបអាស៊ីអាគ្នេយ៍ និងស៊ីហ្គេមអាស៊ីអាគ្នេយ៍នាឆ្នាំ១៩៦១ មកទល់ឆ្នាំ២០២១ កម្ពុជាបានឈ្នះមេដាយសរុបចំនួន ៥០៥គ្រឿង ដោយក្នុងនោះមេដាយមាសមានចំនួន ៧៨គ្រឿង ប្រាក់ ១២៨គ្រឿង និងសំរឹទ្ធ ២៩៩គ្រឿង៕