តំបន់រោងចក្រភាគច្រើនស្ថិតនៅជាយរាជធានីភ្នំពេញ ពិសេស ខណ្ឌស្ទឹងមានជ័យ ខណ្ឌពោធ៍សែនជ័យ និងខណ្ឌដង្កោ ត្រូវបានគេស្គាល់ជាទូទៅថា ជាតំបន់ប្រជុំដោយរោងចក្រកាត់ដេរ និងវាយនភណ្ឌ។ តាមបណ្តោយផ្លូវវេងស្រេង ក្នុងសង្កាត់ចោមចៅនៃខណ្ឌពោធិ៍សែនជ័យ ពីដើមទសវត្សរ៍ឆ្នាំ១៩៩០ មក ត្រូវបានគេដឹងថាជាកន្លែងប្រមូលផ្តុំដោយកម្មករោងចក្រកាត់ដេរ និងមានរថយន្តធំៗដឹកជញ្ជូនផលិតផលវាយនភណ្ឌជាច្រើនឆ្លងកាត់ជាញឹកញាប់។

I. ទីប្រជុំជននិងឱកាសអាជីវកម្ម

រោងចក្រកាត់ដេរនៅជាយរាជធានីភ្នំពេញភាគច្រើនមានទំហំធំ និងមានចំនួនកម្មករកាត់ដេររាប់រយនាក់ចូលទៅធ្វើការជារៀងរាល់ថ្ងៃ។ ជាទូទៅ នៅក្បែរខាងច្រកចូលរោងចក្រទាំងនោះ យើងតែងតែឃើញមានវត្តមានអ្នកលក់ដូរម្ហូបអាហារ និងវត្តមានអ្នកទិញដែលភាគច្រើជាកម្មកររោងចក្រ នៅអំឡុងពេលចេញទៅធ្វើការពេព្រឹក ពេលសម្រាកអាហារថ្ងៃត្រង់ និងពេលចាកចេញពីការងារ។

នៅប្រហែលម៉ោង 6:00 ព្រឹក មុនពេលទ្វាររោងចក្របើក និងពេលអាហារថ្ងៃត្រង់ យើងឃើញមានតូបលក់បាយ និងគ្រឿងឧបភោគបរិភោគផ្សេងៗច្រកក្នុងថង់ប្លាស្ទិក បានដាក់លក់តម្រៀបជួរនៅមាត់ផ្លូវចូលរោងចក្រនីមួយៗ សម្រាប់អ្នកដែលពុំមានពេលចម្អិនអាហារព្រឹក និងថ្ងៃត្រង់។ យ៉ាងណាមិញ អំឡុងពេលមុនម៉ោង 4:00 ល្ងាច ទីលានមុខរោងចក្របានប្រែជាទីធ្លាសម្រាប់ដាក់លក់ត្រី សាច់ បន្លែ និងផ្លែឈើស្រស់ៗ រួមនឹងគ្រឿងផ្សំនានាសម្រាប់អ្នកមានបំណងធ្វើម្ហូបដោយខ្លួនឯងនៅផ្ទះ។