កម្ពុជាមានរោងចក្រសហគ្រាសក្នុងវិស័យកាត់ដេរនៅទូទាំងប្រទេសចំនួន ១ ៣២៦កន្លែង និងមានកម្មករប្រមាណ៨៤ម៉ឺននាក់បម្រើការក្នុងវិស័យកាត់ដេរ។ ជាពិសេស នៅរាជធានីភ្នំពេញមានចំនួនរោងចក្រសហគ្រាសក្នុងវិស័យកាត់ដេរសម្លៀកបំពាក់ចំនួន៧២៧កន្លែង ដែលមានកម្មករនិយោជិក៣៤ម៉ឺននាក់។ តំបន់រោងចក្រភាគច្រើនស្ថិតនៅជាយរាជធានីភ្នំពេញ។ នៅសង្កាត់ចោមចៅ (ស្ថិតនៅភាគនិរតីនៃអាកាសយានដ្ឋានអន្តរជាតិភ្នំពេញ) ប្រមូលផ្តុំដោយបន្តុំតំបន់ផ្ទះជួលតម្លៃថោកៗសម្រាប់បងប្អូនកម្មកររោងចក្រ រស់នៅលាយឡំជាមួយលំនៅដ្ឋានរបស់ប្រជាពលរដ្ឋទូទៅរស់នៅក្នុងសង្កាត់នេះ។ ជាទូទៅ នៅក្នុងតំបន់ជុំវិញរោងចក្រ មានសភាពអ៊ូអរ និងសម្បូរទៅដោយហាងអាហារ និងហាងទំនិញផ្សេងៗ ដែលចាំបាច់សម្រាប់ជីវភាពរស់នៅប្រចាំថ្ងៃរបស់ពលរដ្ឋទូទៅ និងកម្មកររោងចក្រ។

យើងខ្ញុំនឹងលើកយកជ្រុងមួយនៃស្ថានភាពការងារ និងជីវភាពរស់នៅជាក់ស្តែងរបស់បងប្អូនកម្មកររោងចក្ររស់នៅក្នុងរាជធានីភ្នំពេញ ផ្សាយក្នុងអត្ថបទស្រាវជ្រាវពិសេសរបស់យើងលើកនេះដូចតទៅ។