គេហទំព័រព័ត៌មានដែលតភ្ជាប់រវាងកម្ពុជានិងជប៉ុន

"Life"Latest Posts

"Sightseeing" Latest posts

"Column" Latest Posts

"Culture" Latest Posts

"in Cambodia" Latest Posts

HOME > Khmer > Column > NyoNyum Khmer > បទសម្ភាសន៍ជាមួយលោក លូ ម៉េង ជាមេចុងភៅនិងនាយកប្រតិបត្តិនៃ Almond Hospitality Group

បទសម្ភាសន៍ជាមួយលោក លូ ម៉េង ជាមេចុងភៅនិងនាយកប្រតិបត្តិនៃ Almond Hospitality Group

លោក លូ ម៉េង ជាស្ថាបនិក និងជានាយកប្រតិបត្តិនៃ Almond Hospitality Group ដែលប្រតិបត្តិការភោជនីយដ្ឋានខ្មែរអ៊ុយគុយទាវនិងភោជនីយដ្ឋានចិន Yi Sang និង Seven Sea ជាដើម។ លោកក៏ជានាយកនៃ THALIAS hospitality ដែលគ្រប់គ្រងភោជនីយដ្ឋានម្ហូបខ្មែរមួយចំនួនដូចជា ភោជនីយដ្ឋាន MALIS ជាដើម និងជាប្រធានសហព័ន្ធចុងភៅកម្ពុជាផងដែរ។

សំណួរ៖ តើប្រហុកមានលក្ខណៈពិសេសយ៉ាងដូចម្តេចចំពោះម្ហូបខ្មែរ?

នៅក្នុងផ្ទះបាយ គេហៅប្រហុកថាជាអំបិលមានរសជាតិ។ នៅគ្រប់ក្នុងផ្ទះបាយរបស់ខ្មែរយើង ប្រហុកគឺមានវត្តមានជាប្រចាំ។

ខ្មែរយើងអាចធ្វើប្រហុកបានជារៀងរាល់ឆ្នាំ ដូច្នេះនេះជាមូលហេតុដែលប្រហុកគឺតែងតែមានវត្តមាន ហើយមិនអាចខ្វះបាននៅក្នុងផ្ទះបាយពេញមួយឆ្នាំសម្រាប់មុខម្ហូបខ្មែរ។ ប្រហុកជាគ្រឿងផ្សំមួយប្រភេទដែលជាអ្នកកំណត់នូវរសជាតិសម្រាប់ម្ហូបខ្មែរ ដែលមិនអាចខ្វះបាន។ ប្រសិនជាអ្នកចម្អិនម្ហូបខ្មែរដោយពុំដាក់ប្រហុកទេនោះ វានឹងធ្វើឱ្យអ្នកញុំាមានអារម្មណ៍ថាហាក់ដូចជាខ្វះជាតិអ្វីម្យ៉ាងជាមិនខាន។

មានខ្មែរយើងខ្លះតំណាលតគ្នាថា នៅពេលកូនប្រុសទៅដណ្តឹងកូនស្រីពីគ្រួសារណាមួយនោះ គឺគេយកប្រហុកទៅជាមួយ ដើម្បីឱ្យឪពុកម្តាយខាងកូនស្រីពេញចិត្ត។ ដូច្នេះយើងឃើញថា ប្រហុកនេះមានតម្លៃណាស់សម្រាប់មុខម្ហូបខ្មែរ និងជីវភាពរស់នៅប្រចាំថ្ងៃរបស់ខ្មែរយើង។

សំណួរ៖ តើលក្ខណៈពិសេសរបស់ប្រហុកខ្មែរ និងរបៀបប្រើប្រហុកខ្មែរវិញគឺវាយ៉ាងម៉េចដែរ?

ភាពខុសគ្នានៃប្រហុកខ្មែរ និងប្រហុកដែលផលិតនៅក្នុងប្រទេសជិតខាងយើងនោះ គឺការប្រើប្រាស់វត្ថុធាតុដើមពីធម្មជាតិ។ ត្រីធម្មជាតិពីបឹងទន្លេសាប និងទន្លេមេគង្គដែលធំធាត់ដោយការកើនឡើងនៃទឹកនៅរដូវវស្សាគឺជាលក្ខណៈពិសេសពីធម្មជាតិមួយដែលយើងមាន។ ម្យ៉ាងទៀត ប្រហុកខ្មែរគឺធ្វើឡើងដោយប្រើប្រាស់អំបិលធម្មជាតិពីខេត្តកំពត ដែលមានជាតិខនិជពីសមុទ្រក៏ធ្វើឱ្យប្រហុកខ្មែរយើងកាន់តែពិសេសថែមទៀតផងដែរ។

នៅប្រទេសកម្ពុជាគេនិយមប្រើប្រហុកជាគ្រឿងផ្សំសម្រាប់យកក្លិន និងជាទឹកជ្រលក់ផងដែរ។ ដូច្នេះប្រសិនបើយើងប្រៀបធៀបនឹងទឹកត្រី ដែលប្រទេសជិតខាងយើងប្រើជាទូទៅសម្រាប់ម្ហូបគេនោះ ឃើញថាប្រហុកយើងធ្វើឱ្យរសជាតិម្ហូបមានលក្ខណៈមុត និងស្មុគស្មាញពិសេសខុសពីគេ។ លើសពីនេះទៀត មានម្ហូបខ្មែរជាច្រើនប្រភេទដែលប្រើប្រហុក ហើយក្នុងនោះគេអាចញុំាវាជាទឹកជ្រលក់ ជាមួយសាច់គោ ត្រី និងគ្រឿងសមុទ្រ ឬបន្លៃផ្សេងៗជាដើមបានយ៉ាងឈ្ងុយឆ្ងាញ់ផងដែរ។

សំណួរ៖ សព្វថ្ងៃឃើញថាមានយុវជនខ្មែរមួយចំនួនមិនសូវចូលចិត្តប្រហុក តើមូលហេតុអ្វីដែលនាំឱ្យពួកគាត់គិតបែបនេះ?

នេះប្រហែលមកពីវិធីនៃការចម្អិនម្ហូបដែលប្រើប្រហុកមិនបានត្រឹមត្រូវហើយមើលទៅ។ ជាទូទៅ ប្រហុកទទេគឺមានក្លិនមិនសូវល្អនោះទេ ដូច្នេះចំណុចសំខាន់គឺនៅពេលចម្អិន បានន័យថាគឺគេត្រូវដឹងពីលក្ខណៈពិសេសរបស់ប្រហុក និងវិធីសាស្រ្តនៃការចម្អិនឱ្យច្បាស់។ បើពុំដូច្នោះទេ អ្នកញុំានឹងពុំទទួលបានរសជាតិ និងក្លិនឈ្ងុយឆ្ងាញ់ពីប្រហុកឡើយ។ ម្យ៉ាងទៀត ប្រសិនបើអ្នកប្រើប្រហុកពុំមានគុណភាពល្អ ក៏វាធ្វើឱ្យក្លិនមិនល្អនោះនៅសល់ក្នុងម្ហូបអ្នកផងដែរ។ ទាំងនេះនឹងនាំឱ្យអ្នកញុំាម្ហូបប្រហុកមួយចំនួនមិនចូលចិត្តវាក៏ថាបាន។

 

សំណួរ៖ តើមានមុខម្ហូបប្រហុកបែបណាដែលពិសេសនៅក្នុងហាងរបស់លោកទេ?

នៅហាងអ៊ុយគុយទាវយើងខ្ញុំ មានម្ហូបញុំាបន្លែប្រើទឹកប្រហុកពិសេសប្រចាំហាង ហើយវាក៏ពេញនិយមចំពោះជនបរទេសដែរ។ ក្រៅពីនោះយើងក៏មានម្ហូបទឹកគ្រឿង និងប្រភេទសម្លដូចជា សម្លប្រហើរ សម្លកកូរ(ខ្មែរខ្លះហៅសម្លបន្លែ១០០មុខ) ជាដើមដែលចម្អិនជាពិសេសសម្រាប់ជនជាតិខ្មែរយើង និងជនបរទេសផងដែរ។ លើសពីនេះទៀត ហាងអ៊ុយគុយទាវយើងខ្ញុំក៏មានប្រភេទគុយទាវពិសេសប្រចាំហាងផ្សេងៗដូចជា គុយទាវសម្លអង្កលីង និងម្ហូបខ្មែរពិសេសជាច្រើនទៀតផងដែរ។

គុយទាវសម្លអង្កលីង​ ៤.៥ ដុល្លារ

ញុំាសាច់គោគល់ស្លឹកគ្រៃទឹកប្រហុក ៦ ដុល្លារ

គុយទាវភ្នំពេញ / ៥ ដុល្លារ

ញុំាបន្លែ៣ប្រភេទជាមួយសាច់មាន់ ៥ ដុល្លារ

ទឹកគ្រឿងបាត់ដំបង ៥ ដុល្លារ

ភោជនីយដ្ឋានម្ហូបខ្មែរ មានសាខា៣ទីតាំងក្នុងទីក្រុងភ្នំពេញ។ លោកអ្នកអាចរីករាយជាមួយនឹងប្រភេទគុយទាវ និងមុខម្ហូបខ្មែរជាច្រើន។

  • Uy Kuyteav Restaurant – Kampuchea Krom
    N° 890, St. 128 Sangkat Tek La Ork I, Kampucheakrom Blvd,
    Phnom Penh, Cambodia.
    Hotline: +855 15 91 68 68

Hours: 6:00 am – 5:00 pm daily including Public Holidays

  • Uy Kuyteav Restaurant – Aeon Mall
    #L2, Ground Floor in Aeon Mall, next to Entrance A-Sweet Zone,
    Phnom Penh, Cambodia.
    Hotline: +855 15 26 68 68

Hours: 8:00 am – 10:00 pm daily including Public Holidays

  • Uy Kuyteav Restaurant – Hanoi Blvd
    No 186, St. 1019 (Phnom Penh Hanoi Friendship Blvd),
    Sangkat Khmuonh, Sen Sok District, Phnom Penh, Cambodia.
    Hotline: +855 95 4567 43

Hours: 6:00 am – 5:00 pm daily including Public Holidays

សម្រាប់ពត៌មានបន្ថែម ៖

【NyoNyum Khmer No. 44】









Let's like it!

We will send you the latest information