គេហទំព័រព័ត៌មានដែលតភ្ជាប់រវាងកម្ពុជានិងជប៉ុន

សួនឧទ្យាន Hitachi Seaside Park
សួនឧទ្យាន Hitachi Seaside Park
2022.10.17

មានចម្ងាយប្រមាណជិត ១៤០គីឡូម៉ែត្រ ស្ថិតនៅភាគខាងជើងឆៀងខាងកើតនៃទីក្រុងតូក្យូ Hitachi Seaside Park ជាសួនឧទ្យានដ៏ពេញនិយមមួយនៅក្នុងក្រុង Hitachinaka នៃខេត្ត Ibaraki ប្រទេសជប៉ុន។ ភ្ញៀវទេសចរអាចធ្វើដំណើរពីទីក្រុងតូក្យូ ដោយឡានក្រុងល្បឿនលឿនចេញពីស្ថានីយ៍តូក្យូ ចំណាយពេលប្រមាណជិត ២ម៉ោងដើម្បីទៅដល់សួនឧទ្យាននេះ។ ដោយមានទីតាំងបែរមុខទៅមហាសមុទ្រប៉ាស៊ីហ្វិក បានធ្វើឱ្យសួនឧទ្យាននេះមានអាកាសធាតុសមសម្របសម្រាប់ការដាំដុះផ្កាប្រភេទកម្រនិងពេញនិយមមួយចំនួនដូចជា៖ ផ្កា Narcissuses ផ្កា Summer Cypress ផ្កា Nemophila (Baby blue eyes) និងផ្កាធូលីបជាដើម។ មានភ្ញៀវទេសចរមកកម្សាន្តនៅសួនឧទ្យាននេះពេញមួយឆ្នាំ។ មានអ្នកទេសចរជនជាតិជប៉ុន និងបរទេសជាច្រើនដែលស្រឡាញ់និងចូលចិត្តផ្កាធ្វើដំណើរទៅកម្សាន្តនៅសួនឧទ្យាន Hitachi Seaside Park នេះ ដើម្បីគយគន់ទេសភាពផ្ការីកនៅតាមទីតាំងសួននីមួយៗ ក្នុងអំឡុងរដូវកាលផ្ការីកទាំងនោះ។

ទិដ្ឋភាពផ្កា Baby blue eyes រីកក្នុងសួន Miharashi Hill

នៅរដូវផ្ការីក ផ្តើមពីខែមីនា រហូតដល់ខែឧសភា សួនឧទ្យាន Hitachi Seaside Park គឺជាទីកម្សាន្តដ៏ទាក់ទាញសម្រាប់ការទស្សនាផ្កា Baby blue eyes ផ្កា Narcissuses និងផ្កាធូលីប។ អំឡុងខែមេសា និងឧសភា មានផ្កា Baby blue eyes ចំនួនប្រមាណជាង ៥លានដើម រីកស្គុះស្គាយដូចកម្រាលព្រំពណ៌ស្វាយ គ្របដណ្តប់លើទីទួលនៃសួន ឧទ្យាន នៅក្នុងទីតាំងសួន Miharashi Hill ខណៈមានផ្កា Narcissus កំពុងរីកជាច្រើននៅសួន Narcissus។ មានភ្ញៀវទេសចរជាច្រើនមកពីបណ្តាខេត្តជិតខាង រួមទាំងមានចំនួនច្រើនមកពីទីក្រុងតូក្យូផងធ្វើដំណើរមកទស្សនាក្នុងអំឡុងពេលនេះ។ គួរបញ្ជាក់ផងដែរថា រដូវផ្ការីកគឺជា រដូវដែលមានបរិយាកាសស្រស់ស្រាយ និងមានសីតុណ្ហភាពត្រជាក់ល្មម (ប្រមាណចន្លោះពី១០ ទៅ ២០អង្សាសេ) ងាយស្រួលក្នុងការរស់នៅជាងគេក្នុងចំណោមរដូវកាលទាំង ៤ នៅក្នុងប្រទេសជប៉ុន។ ម្យ៉ាងទៀត នៅប្រទេសជប៉ុន ការបើកបវេសនការឆ្នាំសិក្សាថ្មី គឺជាទូទៅធ្វើឡើងនាដើមខែមេសា ក្នុងអំឡុងរដូវផ្ការីក ដែលប្រៀបបានជាការទទួលស្វាគមន៍សម្រាប់ឆ្នាំសិក្សាថ្មីរបស់សិស្សានុសិស្សនៅប្រទេសជប៉ុន។ ក្រៅពីផ្កាសាគូរ៉ាដ៏ល្បីល្បាញ ក៏មានប្រភេទផ្កាជាច្រើនរីកនៅក្នុងអំឡុងរដូវនេះផងដែរ។

ទិដ្ឋភាពផ្កាធូលីប (មានច្រើនប្រភេទ) រីកក្នុងសួនឧទ្យានក្នុងអំឡុងរដូវផ្ការីក

លុះដល់ចុងរដូវផ្ការីកនាអំឡុងពាក់កណ្តាល ខែឧសភា និងដើមរដូវក្តៅ នាអំឡុងដើមខែមិថុនា គឺជាពេលដ៏សមស្របសម្រាប់ទស្សនាផ្កាកូឡាប។ មានភ្ញៀវទេសចរច្រើនធ្វើដំណើរមកទស្សនាផ្កាកូឡាបនៅសួនឧទ្យាន Hitachi Seaside Park ។ ផ្កាកូឡាបប្រមាណ ៣៤០០គុម្ព និងប្រមាណ ១២០ប្រភេទផ្តើមរីកនៅក្នុងសួន Hitachi Rose ខណៈក្នុងអំឡុងពេលដូចគ្នានេះដែរ ផ្កា Linaria មានចំនួនប្រមាណ ៤០០ ០០០ ដើម និងផ្កា Poppy ចំនួនប្រមាណ ១៧០ ០០០ ដើម ចាប់ផ្តើមរីក នៅក្នុងសួន Grassland Flower នៃឧទ្យាន Hitachi Seaside Park នេះ។ ចំណែកនៅរដូវក្តៅវិញ (ចាប់ពីចន្លោះខែមិថុនា ដល់ខែសីហា) ជារដូវកាលសម្រាប់ផ្កា Zinnias និងផ្កាឈូករត្ន័ ចាប់ផ្តើមរីក វិញម្តង។ ផ្កា Zinnias ប្រមាណ ៣៥០ ០០០ដើម រីកក្នុងអំឡុងខែកក្កដា សីហា និងកញ្ញា ខណៈក្នុងអំឡុងខែកក្កដា មានផ្កា ឈូករត្ន័ ចំនួនប្រមាណ ៣០ ០០០ដើម រីកគួរជាទីគយគន់នៅក្នុងសួន Miharashi no Sato ។

ទិដ្ឋភាពផ្កាកូឡាបរីកក្នុងសួន Hitachi Rose នៅរដូវក្តៅ
ផ្កា Cosmo រីក

នៅពេលរដូវរំហើយឈានមកដល់ ក្នុងអំឡុងខែកញ្ញា និងតុលា មានចំនួនភ្ញៀវទេសចរកាន់តែច្រើនមកទស្សនាផ្កា Kochia (Summer Cypress) ដែលមានចំនួនរហូតដល់ ៣២ ០០០គុម្ព ប្រែពណ៌ក្រហមឆ្អៅលាតសន្ធឹងលើទួលភ្នំ នៃសួន Miharashi Hill។ ជាមួយគ្នានេះដែរ ផ្កា Cosmos ប្រមាណជាង ២ ០០០ ០០០ ដើមក៏រំលេចជាពណ៌ផ្កាឈូកលាយក្រហមរីកស្គុះស្គាយលាតសន្ទឹងដូចកម្រាលព្រំ នៅផ្នែកមួយនៃសួន Miharashi Hill នេះផងដែរ។

Summer Cypress ប្រែពណ៌ក្រហមឆ្អៅនៅសួន Miharashi Hill

ទិដ្ឋភាពផ្កា Cosmo និង Summer Cypress រីក និងប្រែពណ៌ក្រហមឆ្អៅ នៅក្នុងសួន Miharashi Hill

ទោះរដូវរងារ នៅសួនឧទ្យាននេះទាំងស្រុងត្រូវរងនូវអាកាសធាតុ ត្រជាក់យ៉ាងណាក្តី ដោយសារមានទីតាំងស្ថិតនៅក្បែរមហាសមុទ្រ ប៉ាស៊ីហ្វិក បានធ្វើឱ្យតំបន់សួនឧទ្យាន Hitachi Seaside Park នេះ មានស៊ីតុណ្ហភាពពុំត្រជាក់ខ្លាំងដូចបណ្តាតំបន់ផ្សេងទៀតនៅក្នុងប្រទេស ជប៉ុននោះឡើយ។ ដូច្នេះ ទោះបីជានៅរដូវត្រជាក់ក្តី ភ្ញៀវទេសចរក៏អាចទស្សនាផ្កាធូលីបទឹកកក (Ice Tulip) នៅក្នុងអំឡុងខែធ្នូ និងខែមករា ផងដែរ៕

JAPAN VIEW Vol. 27

សម្រាប់ពត៌មានបន្ថែម
【NyoNyum Khmer No. 53】

តើអ្នកដឹងពីគម្រោងសាងសង់ទីក្រុងឆ្លាតវៃ ក្នុងក្រុងសៀមរាប ឬទេ?

ក្រុមហ៊ុនឯកជននឹងការបង្កើតក្រុងឆ្លាតវៃសៀមរាប

មុខមាត់ថ្មីរបស់ទីក្រុងសៀមរាបក្រោយគម្រោងសាងសង់ផ្លូវទាំង៣៨ខ្សែបញ្ចប់

តើប្រជាពលរដ្ឋរស់នៅក្នុងក្រុងសៀមរាបយល់ឃើញយ៉ាងណាចំពោះស្ថានភាពហេដ្ឋារចនាសម្ព័ន្ធដែលទើបសាងសង់រួចថ្មី និងអំពីគម្រោងទីក្រុងឆ្លាតវៃសម្រាប់ខេត្តសៀមរាប?

ហាងអាហារជប៉ុន Izakaya DAI

ហាងម្ហូបអណ្តាតគោអាំងជប៉ុន Gyutanya Re: Yosaku

សួនបៃតងអង្គរ

ហូតែល Bayon Modern Residence

この記事が気に入ったら
いいね!しよう

We will send you the latest information

Relate Article
Recommend Articles