បច្ចុប្បន្ន នៅក្នុងប្រទេសជប៉ុនមានចំនួនអ្នកឆ្លងមេរោគកូវីត១៩ កាន់តែកើនឡើងជារៀងរាល់ថ្ងៃ ដែលនាំអោយមានការព្រួយបារម្ភជាខ្លាំង។ នៅក្នុងស្ថានភាពបែបនេះ រដ្ឋាភិបាលជប៉ុនកំពុងធ្វើការយ៉ាងមមាញឹក ដើម្បីទប់ស្កាត់ និងពង្រឹងនូវការព្យាបាលអ្នកឆ្លងជម្ងឺនេះ នៅតាមមន្ទីរពេទ្យជាដើម។

ដើម្បីចូលរួមលើកទឹកចិត្តចំពោះការប្រយុទ្ធប្រឆាំងនឹងជម្ងឺឆ្លងកូវីត១៩នេះ មានក្រុមស្ម័គ្រចិត្តជប៉ុនមួយក្រុម ដែលដឹកនាំដោយ លោក Amon Miyamoto បានលើកយកចម្រៀងមនោសញ្ចេតនាជប៉ុនដ៏ល្បីល្បាញមួយបទ ដែលមានឈ្មោះថា “Ue o Muite Arukō”  មានន័យថា ”ច្រៀងដើម្បីក្តីសង្ឃឹម” ច្រៀងជុំគ្នា ដើម្បីធ្វើការលើកទឹកចិត្តដល់អ្នកជម្ងឺឆ្លងមេរោគកូវីត១៩ ដែលកំពុងសម្រាកព្យាបាលក្នុងមន្ទីរពេទ្យ ក៏ដូចជាពង្រឹងនូវ​ការលើកទឹកចិត្ត និងស្មារតីដល់ប្រជាជននៅក្នុងប្រទេសជប៉ុន និងពិភពលោកនៅក្នុងគ្រាអាសន្ននេះ។

ចម្រៀងនេះមានខ្លឹមសារបង្ហាញពី “ក្តីសង្ឃឹម” ចំពោះស្ថានភាពលំបាកដែលកំពុងជួបប្រទះ។ការជួបនូវឧបសគ្គអ្វីមួយ រមែងតែងតែនាំអោយមនុស្សម្នាក់ៗ បានរៀនសូត្រ និងទទួលនូវបទពិសោធន៍ថ្មីសម្រាប់ខ្លួន ហើយបទពិសោធន៍ទាំងនោះនឹងមិនត្រឹមតែធ្វើអោយយើងសញ្ចឹងគិត ស្វែងយល់អំពីខ្លួនយើងប៉ុណ្ណោះទេ វាអាចនាំអោយយើងយល់ដឹងអំពីសេចក្តីទុក្ខរបស់អ្នកដទៃ ហើយស្វែងយល់អំពីសេចក្តីសុខ សុភមង្គល និងសេចក្តីសង្ឃឹមរួមមួយ សម្រាប់អ្នកផងទាំងឡាយបានផងដែរ។

ដោយសារចម្រៀង “Ue o Muite Arukō” ​ នេះត្រូវបានគេស្គាល់ច្រើនទាំងក្នុងប្រទេសជប៉ុន និងជាសកល ដូច្នេះទស្សនាវដ្តីញញឹមខ្មែរ សូមធ្វើការលើកបង្ហាញនូវគេហទំព័ររ​ប​ស់ លោក Amon Miyamoto ដែលបង្កើតបទចំរៀងច្រៀងរួមគ្នា ដើម្បីផ្តល់នូ​វក្តីសង្ឃឹម ដល់អ្នករាល់គ្នានៅទូទាំងពិភពលោក នៅក្នុងស្ថានភាពឆ្លងនូវជម្ងឺកូវីត១៩ដ៏កាចសាហាវនេះ​ តាមតំណភ្ជាប់លីងខាងក្រោម។ ​

https://uewomuite-project.squarespace.com/?fbclid=IwAR0rZpt3g9ZRlbBR8HrmdNmv7QQL63E1QnYhjjr_ueGUsRbHWtK3kHb2Pdw