មាគ៌ាឆ្ពោះទៅកាន់ការប្រកួតកីឡាអូឡាំពិកទីក្រុងតូក្យូ–កំណត់ត្រាទី២នៃការតស៊ូរបស់ក្រុមកីឡាហែលទឹកជម្រើសជាតិកម្ពុជា
ពីគេហទំព័រញញឹម ចុះផ្សាយថ្ងៃទី៣០ ខែកក្កដា ឆ្នាំ២០១៩
នៅឯប្រទេសជប៉ុនមានគេនិយាយគ្នាច្រើនអំពីកាលវិភាគ និងសំបុត្រនៃការប្រគួតកីឡាអូឡាំពិកនៅទីក្រុងតូក្យូ ដែលនឹងខិតជិតចូលមកដល់នាឆ្នាំក្រោយ ក៏ប៉ុន្តែនៅឯទីក្រុងភ្នំពេញវិញ មានគ្រូបង្វឹកជប៉ុនម្នាក់កំពុងបង្វឹកកីឡាហែលទឹកដល់កីឡាករហែលទឹកជម្រើសជាតិកម្ពុជា។ លោកស្រី IKUYAMA Saki ក្នុងនាមជាសមាជិកនៃអង្គការ JICA បានមកដឹកនាំកីឡាហែលទឹកនៅប្រទេសកម្ពុជារយៈពេល៣ឆ្នាំ ហើយបច្ចុប្បន្ន លោកស្រីកំពុងបំរើការជាគ្រូបង្វឹកបង្គោល នៃកីឡាហែលទឹកជម្រើសជាតិកម្ពុជា។ នៅក្នុងការចុះផ្សាយបន្តលេខនេះ យើងខ្ញុំនឹងណែនាំពីសកម្មភាពមួយចំនួនដែលលោកស្រីបានជួបប្រទះ និងការខិតខំប្រឹងប្រែងជារៀងរាល់ថ្ងៃរបស់លោកស្រី ដើម្បីដឹកនាំក្រុមចូលរួមកីឡាអូឡាំពិកឆ្នាំ២០២០នៅទីក្រុងតូក្យូ។
ចំពោះអត្ថបទទាក់ទងនិងការតស៊ូលើកទី១ សូមស្វែងរកទីនេះ
–“ឧប្បត្តិហេតុសត្វអណ្តើក” ដែលផ្លាស់ប្តូរជីវិតរបស់នាងខ្ញុំ–
កាលពី៣ឆ្នាំមុន នាងខ្ញុំបានធ្វើបេសកកម្មនៅប្រទេសថៃជាមួយកីឡាករកម្ពុជា៦នាក់ទៀត។ ទោះជាឥឡូវនេះក្តី នាងខ្ញុំនៅចងចាំព្រឹត្តការណ៍នោះ ដូចជារឿងដែលទើបនិងកើតឡើងកាលពីម្សិលមិញ។
កាលនោះ កីឡាករដែលនាងខ្ញុំដឹកនាំ បានប្រឡប់មករកនាងខ្ញុំបន្ទាប់ពីការប្រគួតភ្លាម ដោយស្មាមញញឹម និងបានបង្ហាញនូវសេចក្តីក្លាហាននៅលើឆាកប្រគួតអន្តរជាតិ ជាមួយនិងកំណត់ត្រាថ្មីដ៏ល្អមួយសំរាប់គេ។ នាងខ្ញុំបានធ្វើការសសើរភ្លាមៗ ចំពោះលទ្ធផលហែលទឹកដ៏ល្អអស្ចារ្យរបស់ពួកគេ។ ក៏ប៉ុន្តែពេលនោះ មានបុរសម្នាក់បានដៀងក្រសែភ្នែកមើលមកពួកគេដោយមិនពេញចិត្ត។ បុរសម្នាក់នោះជាអ្នកមានទ្រព្យម្នាក់ ដែលបានផ្តល់ជំនួយជាថវិការដល់សហព័ន្ធហែលទឹក។ ពេលត្រឡប់មកសណ្ឋាគារវិញ ដោយឃើញបុរសនោះមានទឹកមុខមិនស្រួល នាងខ្ញុំបានសួរទៅកាន់គាត់ផ្ទាល់។ ពេលនោះគាត់បាននិយាយចោលទាំងព្រងើយថា “កីឡាហែលទឹក ទោះបីជាខ្ញុំចាយលុយអស់ច្រើនយ៉ាងណាក៏ដោយ ក៏មិនអាចយកមេដៃបានដដែល”។ ពេលនោះ នាងខ្ញុំបានឆ្លើយតបប្រាប់ទៅបុរសនោះវិញថា “ទោះជាពុំទាន់អាចទទួលបានមេដៃក៏ពិតមែន ប៉ុន្តែកីឡាករទទួលបានកំណត់ត្រាថ្មីដ៏ល្អមួយសំរាប់ពួកគេនៅក្នុងការប្រគួតនេះ”។ តែទោះជាយ៉ាងនេះក្តី វាហាក់ដូចជាការដែលយកប្រេងទៅចាក់លើភ្លើងអិញ្ចឹង ដោយបុរសនោះបាននិយាយទៅកាន់សិស្សរបស់នាងខ្ញុំទៀតថា “ពួកអស់នេះ សុទ្ធតែជាមនុស្សខ្ជិល” “ទោះបីជាមានគ្រូបង្វឹកជប៉ុនមកក៏ដោយ ក៏ក្រុមវានៅតែយកមេដៃពុំបានដដែលហ្នឹង” ទោះបីជានាងខ្ញុំខំប្រឹងអត់ធ្មត់នឹងសម្តីនោះក៏ដោយ មានសម្តីមួយដែលបានធ្វើឲ្យនាងខ្ញុំខឹងចាំក្នុងចិត្ត។ បុរសនោះបាននិយាយទាំងសើចចំអកថា “កីឡាករអស់នេះ ហែលដូចសត្វអណ្តើកអិញ្ចឹង!”
នៅរំពេចនោះ ហាក់ដូចជាមានអ្វីម្យ៉ាង បានធ្វើឲ្យទឹកភ្នែករបស់នាងខ្ញុំស្រក់មកមិនឈប់។ ដោយមានការខ្មះអៀននឹងសម្តីរបស់ខ្លួន បុរសនោះបាននិយាយលួងមកកាន់នាងខ្ញុំថា “មិនមែនខ្ញុំនិយាយថាអ្នកជាគ្រូមិនល្អទេ។ គឺមកពីកីឡាកររបស់អ្នកមិនល្អទេតើ …”។ បើនិយាយមើលងាយរូបនាងខ្ញុំវិញ នាងខ្ញុំនឹងមិនយំជាដាច់ខាត។ ព្រោះនាងខ្ញុំដឹងថា វាមកពីកំហុសរបស់នាងខ្ញុំ។ ក៏ប៉ុន្តែនាងខ្ញុំនៅចាំថា ពេលយំនៅកាលនោះ ក៏បាននឹកឃើញពីស្មាមញញឹមរបស់កីឡាករទាំងនោះ និងរយៈពេល១ឆ្នាំដែលបានជួបពួកគេបានកន្លងផុតទៅយ៉ាងឆាប់រហ័ស។ បុរសម្នាក់នោះ ពុំបានយល់ពីការខិតខំប្រឹងប្រែងរបស់ពួកគេឡើយ។ មូលហេតុអ្វី បានជាយើងត្រូវបានមើលងាយដោយបុរសម្នាក់នោះថា “ដូចសត្វអណ្តើក” អិញ្ចឹង?
ហេតុអ្វីត្រូវធ្វើការវិនិច្ឆ័យលើការដែលពុំបានមេដៃកីឡាហែលទឹក? ហេតុអ្វីត្រូវវិនិច្ឆ័យត្រូវតែឈ្នះតាំងពីមុនការប្រគួត? ហេតុអ្វី មិនអាចធ្វើការ “ជឿជាក់” បាន? ទាំងមនុស្សពេញវ័យ ទាំងអ្នកដឹកនាំ បើមិនជឿជាក់លើលទ្ធភាពទេនោះ តើក្មេងៗត្រូវមានអនាគតដោយរបៀបណា?!
“ហេតុអ្វីបានជាគាត់និយាយបែបនោះទៅរួច ទាំងខ្លួនមិនដឹងអ្វីសោះ?”
“បើចង់និយាយមើលងាយនាងខ្ញុំ សូមធ្វើតាមចិត្តចុះ។ តែនាងខ្ញុំនឹងមិនអនុញ្ញាតិឲ្យមើលស្រាលកីឡាករទាំងនោះឡើយ”
“បើទោះបីជាបុរសនោះមើលងាយកីឡាករទាំងនោះក៏ដោយ ក៏នាងខ្ញុំនៅតែជឿជាក់លើពួកគេដដែល”
ហេតុអ្វីបានជាត្រូវតូចចិត្តនិងរឿងបែបនោះ។
នាងខ្ញុំនៅតែមិនយល់ គ្រាន់តែពេលនោះ ទឹកភ្នែកចេះតែហូរមកដោយមិនដឹងពីមូលហេតុ តែជាមួយនិងការតូចចិត្តនោះ នាងខ្ញុំបានគិតថា “នឹងឲ្យពួកគេយកមេដៃឲ្យទាល់តែបាន”។
គិតដូចច្នោះហើយ នាងខ្ញុំបាននិយាយឡើងថា
“ខ្ញុំនឹងយកមេដៃឲ្យបានមុនត្រឡប់ទៅជប៉ុនវិញ”
បន្ទាប់ពីឧប្បត្តិហេតុនោះមក វាបានកន្លងផុត៣ឆ្នាំមកហើយ។ នាងខ្ញុំមិនទាន់បានធ្វើឲ្យបុរសនោះអស់ចិត្តនៅឡើយ។ វាជាវិថីមួយដ៏លំបាក តែក្តីសុបិននេះក៏មិនទាន់ចប់ដែរ។ នៅខ្វះមួយជំហានទៅមុខបន្តិចទៀត។ ដោយសេចក្តីជឿជាក់បែបនេះ ថ្ងៃនេះពួកយើងក៏នៅតែបន្តហែលទឹកនៅឡើយ។
និពន្ធនិងប្រវត្តរូបរបស់លោកស្រី : IKUYAMA Saki
កើតនៅឆ្នាំ១៩៩២។ ដោយមានឥទ្ធិពលពីម្តាយ លោកស្រីបានចាប់ផ្តើមកីឡាហែលទឹកពីការហែលទឹកទារកភាព ហើយបានបន្តជីវភាពប្រណាំងហែលទឹករយៈពេល២២ឆ្នាំ រហូតដល់បញ្ចប់ការសិក្សានៅសាកលវិទ្យាល័យ។ នៅក្នុងក្លឹបហែលទឹកនៃសាកលវិទ្យាល័យ Tokai លោកស្រីជាប្រធានក្រុមនារី និងបានចូលនិវត្តបន្ទាប់ពីទទួលបានសិទ្ធជាកីឡាករនិស្សិតជប៉ុននៅខែកញ្ញា ឆ្នាំ២០១៤។ បន្ទាប់ពីបានបញ្ចប់ការសិក្សាពីមហាវិទ្យាល័យសិក្សាអន្តរជាតិនៃសាកលវិទ្យាល័យ Tokai នៅខែមីនា ឆ្នាំ២០១៥ លោកស្រីបានមកប្រទេសកម្ពុជាក្នុងនាមជា កងហែលទឹកនៃកងយុវជនសហប្រតិបត្តិការអន្តរជាតិ ក្រុមទី៣ នាឆ្នាំ២០១៥ របស់អង្គការ JICA ហើយបានដឹកនាំកីឡាករក្រុមជម្រើសជាតិនិងក្រុមយុវជនសម្រាប់រយៈពេល២ឆ្នាំ។ បន្ទាប់ពីចប់អាណត្តិ បានត្រលប់មកប្រទេសកម្ពុជាវិញ ហើយបច្ចុប្បន្ន កំពុងបម្រើការជាគ្រូបង្វឹកបង្គោលនៃក្រុមជម្រើសជាតិកម្ពុជា។
ចេញសម្តែងនៅកម្មវិធី “សមត្ថភាពដែលកែប្រែពិភពលោកនៅពេលណាមួយ លើកទី៣”
កម្មវិធី “សមត្ថភាពដែលកែប្រែពិភពលោកនៅពេលណាមួយ” ជាកម្មវិធីប្រម៉ាញ់ “បច្ចុប្បន្នភាព” នៃបុគ្គលិកអង្គការ JICA ដែលផ្សាយដោយទូរទស្សន៍ BS ហ្វូជី នូវការចុះសួរសុខទុក្ខរបស់សិល្បករលោក SAITO Takumi ជាមួយកងសហប្រតិបត្តិការ JICA នៅទូទាំងពិភពលោក។ បច្ចុប្បន្ន លោកស្រី IKUYAMA Saki ជាគ្រូបង្វឹកបង្គោលនៃកីឡាហែលទឹកជម្រើសជាតិកម្ពុជា បានឡើងសម្តែងក្នុងការផ្សាយលើកទី៣ នាថ្ងៃទី១៧ ខែមិនា នៅកងយុវជនសហប្រតិបត្តិការអន្តរជាតិ OG។
អត្ថបទទាក់ទងនឹងក្រុមជម្រើសជាតិកីឡាហែលទឹកកម្ពុជាលេខមុន
Translation: NOP Visal
この記事が気に入ったら
いいね！しよう
We will send you the latest information
【世界水泳ブダペスト2017】男子50mバタフライでカンボジア人選手が躍動！
2017.07.25 水泳
ហោរាសាស្ត្រប្រចាំខែ កុម្ភះ ២០២៤
2024.02.05 Fortune Teller
បងស្រី យូគី និទានពីប្រវតិ្តនៃការបង្កើតទស្សនាវដ្តី “ញញឹម” ភាសាជប៉ុន EP3
2023.12.25 NyoNyum KhmerNyoNyum Khmer Special Topics
បងស្រី យូគី និទានពីប្រវតិ្តនៃការបង្កើតទស្សនាវដ្តី “ញញឹម” ភាសាជប៉ុន EP2
2023.12.25 NyoNyum KhmerNyoNyum Khmer Special Topics
ការរីកចម្រើននៃរាជធានីភ្នំពេញបច្ចុប្បន្ន
2023.09.13 NyoNyum Khmer
