ដោយសារតែខ្ញុំមានតួនាទីជាអ្នកគ្រប់គ្រង “ហាងញញឹម” ខ្ញុំបានទៅមើលហាងលក់ផលិតផលកំពង់ឆ្នាំង និងហាងដ៏ទៃទៀត។ វាជាប្រការល្អដែលខ្ញុំមានបទពិសោធន៍បែបនេះ ហើយក៏សប្បាយនឹងការដើរទិញអីវ៉ាន់ផ្ទាល់ខ្លួនរបស់ខ្ញុំផងដែរ។

ទំនិញនៅប្រទេសជប៉ុនថ្លៃណាស់ បើប្រៀបធៀបទៅនឹងចំណូលនិងការប្រើប្រាស់នៅស្រុកខ្មែរយើង។ ប្រទេសជប៉ុន គឺជាឋានសួគ៌សម្រាប់អ្នកមាន ព្រោះវាទំនើប និងចង់បានអ្វីក៏មាន ចាប់ពីទំនិញម៉ាកល្បីៗមានតម្លៃថ្លៃៗ ទំនិញតម្លៃមធ្យម និងថោកល្មម ក៏ដូចជាហាងលក់ផលិតផលតម្លៃ ១០០ យ៉េនផងដែរ។

ខ្ញុំសង្កេតឃើញការរៀបចំតុបតែងហាងខ្លះ គឺវាប្រហាក់ប្រហែលទៅនឹងហាងនៅស្រុកខ្មែរដែរ តែមានហាងខ្លះទៀតមានការរៀបចំតុបតែង ការដាក់តាំងទំនិញប្លែកស្អាត ដែលមានភាពទាក់ទាញភ្ញៀវអោយចង់ចូលមើល។ ចំណែកការវេចខ្ចប់ទំនិញជាអំណោយវិញ គឺមានរាងនិងម៉ូតស្អាតៗ ដែលធ្វើឱ្យអ្នកដែលបានទទួលការដូពិតជារីករាយនិងទទួលដោយក្តីពេញចិត្ត។

Ginza គឺជាតំបន់មួយដែលសំបូរទៅដោយហាងលក់ផលិតផលម៉ាកល្បីៗ និងថ្លៃកប់ពពកដូចជា កាបូប នាឡិកា ខោអាវ គឿងសម្អាង គ្រឿងអលង្ការ គ្រឿងអេឡិចត្រូនិច ហាងកាហេ្វ និងភោជនីដ្ឋានដែលមានឈ្មោះល្បីៗជាច្រើនទៀត។ វាជាតំបន់សំរាប់អ្នកមានដើរ shopping។

Shibuya 109 គឺជាអគារលក់ទំនិញចម្រុះសម្រាប់អ្នកដែលមានជីវភាពមធ្យម។ នៅទីនេះមានលក់ទំនិញជាច្រើនប្រភេទ ហើយនិងសៀវភៅផងដែរ។

នៅទីនេះខ្ញុំឃើញមានមនុស្សដើរច្រើន ឬមួយមកពីនៅជិតៗអគារនេះមានហាងផ្សេងៗទៀតជាច្រើនមានតំលៃសមរម្យ ដែលមានមនុស្សជាច្រើនចូលចិត្តមកទិញឥវ៉ាន់។ ខ្ញុំចង់ទិញរបស់ច្រើនសម្រាប់ផ្ញើជូនអ្នកផ្ទះ និងមិត្តភិត្តពេលត្រឡប់មកវិញ តែខ្ញុំទិញបានតិចតួចប៉ុណ្ណោះ ព្រោះវាមានតម្លៃថ្លៃៗពេក។
Journey គឺជាហាងលក់សម្លៀកបំពាក់ និងកាហ្វេ ហើយក្នុងនោះក៏មានលក់ផលិតផលកំពង់ឆ្នាំងផងដែរ។ ខ្ញុំបានទៅមើលនិងផ្តល់អំពីចំណាប់អារម្មណ៍របស់ខ្ញុំខ្លះៗទៅនឹងការដាក់លក់ផលិតផលកំពង់ឆ្នាំងនៅទីនោះ។ ខ្ញុំមានអារម្មណ៌សប្បាយចិត្តណាស់ ពេលដែលឃើញមានការដាក់លក់ផលិតផលកំពង់ឆ្នាំងនៅប្រទេសជប៉ុន បើទោះជាតំលៃវាថ្លៃបន្តិច តែខ្ញុំគិតថាប្រជាជនជប៉ុនអាចទិញបាន។ ខ្ញុំក៏សង្ឃឹមថានៅទីនេះ និងលក់ផលិតផលកំពង់ឆ្នាំងបានច្រើន និងធ្វើអោយប្រជាជនខ្មែរមានការងារធ្វើ និងទទួលបានចំណូលប្រសើរជាងមុន។

កាលវិភាគ

អត្ថបទដែលបានចេញផ្សាយនេះគឺមាននៅក្នុងទស្សនាវដ្តី ញញឹមខ្មែរ លេខ ២២ ដែលចែកជូនអាន ដោយឥតគិតថ្លៃ!!!

សម្រាប់ពត៌មានបន្ថែម ៖

NyoNyum Khmer No.22

(ភាសាខ្មែរ) ការធ្វើដំណើរទៅប្រទេសជប៉ុនជាលើកដំបូងរបស់ខ្ញុំ! 【ដំណើរកំសាន្តរបស់ផល្លី】

Read More