វិស័យសោតទស្សន៍នៅកម្ពុជាមានការប្រកួតប្រជែងខ្លាំងគួរឱ្យកត់សម្គាល់ នៅឆ្នាំ២០១២។ នាដើមខែមករា ឆ្នាំ២០១២ ក្រុមហ៊ុន ហង្សមាស ដែលបច្ចុប្បន្នជាក្រុមហ៊ុនទូរទស្សន៍ឯកជនដ៏ល្បីល្បាញបំផុតមួយនៅកម្ពុជា បានចាប់ផ្ដើមផ្សាយសាកល្បងកម្មវិធីទូរទស្សន៍របស់ខ្លួនដំបូង ដើម្បីចូលរួមប្រកួតប្រជែងជាមួយក្រុមហ៊ុនទូរទស្សន៍ដទៃទៀត ដែលកំពុងមានសកម្មភាពនៅកម្ពុជា។ អំឡុងឆ្នាំ២០១៣ ដោយសារកំណើនអ្នកប្រើប្រាស់បណ្តាញសង្គម (ហ្វេសប៊ុកជាពិសេស) កើនឡើងខ្លាំងយ៉ាងគំហុក បានធ្វើឱ្យក្រុមហ៊ុន ទូរទស្សន៍ងាកមកពង្រីកការផ្សាយតាមបណ្តាញសង្គមជាហូរហែ ដើម្បីទាក់ទាញអ្នកទស្សនាប្រើទូរសព្ទស្មាតហ្វូន ដែលកំពុងមានចំនួនច្រើនលើសលប់។ បច្ចុប្បន្ន តើស្ថានភាពទស្សនាកម្មវិធីទូរទស្សន៍មានកាប្រែប្រួល និងទទួលការចាប់អារម្មណ៍ពីទស្សនិកជនបែបណាខ្លះ?

បណ្តាញក្រុមហ៊ុនទូរទស្សន៍ធំៗទាំង៣ និងទូរទស្សន៍ពេញនិយមដទៃនៅកម្ពុជា

នៅខែមីនា ឆ្នាំ២០២២ តំណាងក្រុមហ៊ុនសម្ព័ន្ធទូរទស្សន៍កម្ពុជា (ដែលក្នុងនោះមានក្រុមហ៊ុនទូរទស្សន៍ធំៗចំនួន ៣ គឺក្រុមហ៊ុន CBS, ក្រុមហ៊ុន Bayon TV និងក្រុមហ៊ុន Hang Meas) បានព្រមព្រាងបង្កើតក្រុមហ៊ុនថ្នាលទូរទស្សន៍ឌីជីថលកម្ពុជា ឯ.ក ក្នុងគោលបំណងជម្រុញការផ្សព្វផ្សាយជាប្រព័ន្ធឌីជីថលមានគុណភាពខ្ពស់ក្នុងការបញ្ជូនរូបភាព និងសំឡេងទៅកាន់ទស្សនិកជននៅទូទាំងប្រទេសកម្ពុជា។ ក្រុមហ៊ុនចំនួន ៣ ខាងលើជាក្រុមហ៊ុនទូរទស្សន៍ចម្បងនៅកម្ពុជា។ តើបណ្តាញក្រុមហ៊ុនទាំង ៣ នេះ និងប៉ុស្តិ៍ទូរទស្សន៍ដទៃទៀត ដែលមានសមត្ថភាពផ្សាយគ្របដណ្តប់ធំទូលាយមានកម្មវិធីផ្សាយ និងការនិយមដូចម្តេចខ្លះ?

ក្រុមហ៊ុន CBS

ក្រុមហ៊ុន CBS បង្កើតឡើងដោយក្រុមហ៊ុនរ៉ូយ៉ាល់គ្រុប និងបានបង្កើតបណ្តាញទូរទស្សន៍កម្ពុជា (CTN) ក្នុងឆ្នាំ២០០៣ ។ ជាមួយនឹងពាក្យស្លោក “បង្កើនជីវភាពរស់នៅ របស់ប្រជាពលរដ្ឋកម្ពុជាទាំងអស់ តាមរយៈការផ្តល់ជូននូវកម្មវិធីទូរទស្សន៍លំដាប់កំពូល ដែលមានចំណេះដឹង ការអប់រំ និងបំផុសគំនិត” ក្រុមហ៊ុន CBS បានបន្តពង្រីកវិសាលភាពផ្សព្វផ្សាយរបស់ខ្លួន ដោយបង្កើតឡើងនូវកម្មវិធីទូរទស្សន៍ MYTV នាដើមឆ្នាំ២០០៩ និង CNC នៅពាក់កណ្តាលឆ្នាំ២០១២ ដើម្បីសម្របតាមតម្រូវការរបស់អ្នកទស្សនាកម្មវិធីទូរទស្សន៍នៅកម្ពុជា ដែលមានចំនួនច្រើនលើសលប់ជាងបណ្តាញផ្សព្វផ្សាយដទៃ។

ទូរទស្សន៍ CTN

ទូរទស្សន៍ CTN បង្កើតឡើងដំបូងដោយការបណ្តាក់ទុនរួមគ្នារវាងក្រុមហ៊ុន Royal Group និង Modern Times Group (ក្រុមហ៊ុនកម្សាន្តផ្នែកឌីជីថលប្រចាំសហភាពអឺរ៉ុប)។ នៅឆ្នាំ ២០១៣ CTN បានក្លាយជាប៉ុស្តិ៍ទូរទស្សន៍មានប្រជាប្រិយភាពជាងគេនៅកម្ពុជា ដោយមានចំនួនអ្នកទស្សនាច្រើនជាយុវវ័យ។

“សំណើចតាមភូមិ”

រាល់ថ្ងៃសៅរ៍ ពីម៉ោង ៩យប់ (ទស្សនាការសម្តែងផ្ទាល់តាមបណ្តាខេត្ត ចាប់ពីម៉ោង ៥ល្ងាច!)

កម្មវិធីប្រគុំតន្រ្តីទទួលបានការនិយមគាំទ្រច្រើនពីប្រជាពលរដ្ឋខ្មែរទូទៅ មិនថាចាស់ ឬក្មេងតាំងពីដើម រហូតមកដល់បច្ចុប្បន្ន។ ជាទូទៅ កម្មវិធីប្រគុំតន្រ្តីចាក់ផ្សាយនៅអំឡុងម៉ោងសម្រាកពីការងារ ពិសេសម៉ោងក្រោយអាហារពេលល្ងាច និងថ្ងៃចុងសប្តាហ៍។ កម្មវិធីប្រគុំតន្រ្តីភាគច្រើនទទួលបានការឧបត្ថម្ភធំ ដោយក្រុមហ៊ុនភេសជ្ជៈ ផ្សាយពេញមួយឆ្នាំ ឬតាមរដូវកាល។ “សំណើចតាមភូមិ” ជាកម្មវិធីប្រគុំតន្រ្តីរបស់ទូរទស្សន៍ CTN ធ្វើឡើងនៅតាមស្រុកស្រែពេញនិយមតាំងពីដើមរហូតដល់បច្ចុប្បន្ន។

លក្ខណៈពិសេសនៃកម្មវិធី៖

● មានបង្ហាញជាវីដេអូខ្លីៗពីទិដ្ឋភាពពិសេសៗនៅភូមិស្រុក ឬខេត្តដែលព្រឹត្តិការប្រគុំតន្រ្តីចុះទៅផ្ទាល់ (ឧ. ការណែនាំពីតំបន់រមណីយដ្ឋានសំខាន់ៗ ឬអាហារពិសេសប្រចាំតំបន់ និងការលេងល្បែងកម្សាន្តនានាជាដើម)

● មានតារាកំប្លែងផ្លាស់ប្ដូគ្នាពីមួយជំនាន់ទៅមួយជំនាន់ដូចជា៖ ក្រុម នាយកុយ និងនាយក្រឹម > ពាក់មី > ក្រុមកំប្លែងពូណុយ និងពូណម

ទូរទស្សន៍ MYTV

MYTV បើកដំណើរការផ្សាយនៅដើមឆ្នាំ២០០៨ ជាផ្នែកផ្សព្វផ្សាយថ្មីមួយបន្ទាប់ពីទូរទស្សន៍ CTN និងមានប្រជាប្រិយភាពចំពោះយុវជន។ MYTV ផ្តោតសំខាន់លើការបង្កើតកម្មវីធីកម្សាន្តដោយខ្លួនឯងជាពិសេស ដើម្បីចូលរួមលើកកម្ពស់ការច្នៃប្រឌិតកម្មវិធីសិល្បៈកម្សាន្ត នៅកម្ពុជា។ ប៉ុស្តិ៍ MYTV នេះក៏ពេញនិយមចំពោះកម្មវិធីចាក់ផ្សាយរឿងភាគខ្មែរ និងបរទេសមានដូចជា៖ ឥណ្ឌា ហ្វីលីពីន និងចិន ជាដើមផងដែរ។

កម្មវិធី «កំពូលមិត្ត»

រាល់ថ្ងៃចន្ទ ពីម៉ោង៖ ៨ ដល់ ៩ យប់

ជាកម្មវិធីសំណើចដែលរៀបរៀងឡើងជាសាច់រឿងបែបកំប្លែងដោយនិយាយពិភាក្សាគ្នាពីរឿងនេះរឿងនោះរបស់តួរអង្គ ៦នាក់ដែលជាមិត្តភក្តិនឹងគ្នា។

កម្មវិធី «ពីនេះពីនោះជាមួយសុខគា»

រាល់ថ្ងៃចន្ទ ពីម៉ោង៖ ៩ ដល់ ១០យប់

កញ្ញា ឈាវ ហ៊ីម (២៣ឆ្នាំ) និស្សិតនៅវិទ្យាស្ថានភាសាបរទេស

«នាងខ្ញុំទស្សនាកម្មវិធី “កំពូលមិត្ត” ម្ដងម្ដាលដើម្បីកម្សាន្តអារម្មណ៍។ នាងខ្ញុំសង្កេតឃើញថាកម្មវិធីនេះទទួលបានការគាំទ្រច្រើនពីសំណាក់យុវវ័យ ព្រោះវាក៏ជាកម្មវិធីមួយដែលអាចធ្វើឱ្យអ្នកទស្សនាផ្ទុះសំណើចបានដោយឈុតនិយាយកំប្លែងក្រមិចក្រមើមពីសំណាក់តួអង្គសម្តែង»។

កញ្ញា ម៉េង សាវីន (២៣ឆ្នាំ) គ្រូបង្រៀន នៅរាជធានីភ្នំពេញ

«នាងខ្ញុំធ្លាប់មើលកម្មវិធីនេះ តាមទូរទស្សន៍ CTN ពេលទំនេរពីការសិក្សា។ នាងខ្ញុំតែងតែមើលកម្មវិធីនេះ ព្រោះចូលចិត្តការបកស្រាយចម្រៀងសម័យដើម និងការសម្ដែងកំប្លែងរបស់ក្រុមនាយពាក់មី។ លើសពីនេះ នាងខ្ញុំក៏ចូលចិត្តមើលពីទិដ្ឋភាពនៅស្រុកស្រែដែលកម្មវិធីសំណើចតាមភូមិថតមកចាក់ផ្សាយផងដែរ»។

លោក សារឿន ភារិន (២១ឆ្នាំ) កសិករ រស់នៅខេត្តកំពង់ចាម

អំពីទូរទស្សន៍ CNC

CNC បានសម្ពោធការផ្សាយនៅឆ្នាំ២០១២។ ជាបណ្ដាញទូរទស្សន៍ពេញនិយមមួយរបស់ក្រុមហ៊ុន CBS បន្ទាប់ពីប៉ុស្តិ៍ CTN និង MYTV ។ CNC ផ្ដោតការផ្សាយលើកម្មវិធីព័ត៌មានជាតិ និងអន្តរជាតិ រួមទាំងកម្មពិធីប្រកួតកីឡា ប្រដាល់ជាតិ កីឡាបាល់ទាត់អន្តរជាតិ។

អត្ថបទបន្ទាប់យើងនឹងលើកឡើងអំពីស្ថានភាពរបស់ប៉ុស្តិ៍បាយ័នវិញម្ដង។ ដូច្នេះ សូមកុំភ្លេចតាមដានទាំងអស់គ្នា។