មានទីកំណើតនៅទីក្រុងភ្នំពេញ និងជាកូនខ្មែរមានឪពុកជាជនជាតិជប៉ុនផង យុវតី Erika Isabel (១៥ឆ្នាំ) ជាកីឡាករជម្រើសជាតិវិញ្ញាសាកីឡាហែលទឹកកម្ពុជាសម្រាប់ព្រឹត្តិការណ៍ប្រកួតកីឡាស៊ីហ្គេម២០២៣។ Erika ជាកីឡាករហែលទឹកដ៏មានទេពកោសល្យម្នាក់ ដែលចូលចិត្តកីឡាហែលទឹកតាំងពីកុមារភាពមក ហើយបានចូលប្រឡូកជាកីឡាករហែលទឹកនៅឆ្នាំ២០១៩។
នៅខែកុម្ភៈ ឆ្នាំ២០២៣ កន្លងទៅនេះ យុវតី Erika ត្រូវបានជ្រើសរើសជាកីឡាការិនីហែលទឹកជម្រើសជាតិកម្ពុជា សម្រាប់ចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី៣២។ Erika មានការតាំងចិត្ត និងខិតខំហ្វឹកហាត់កីឡាហែលទឹកជាប្រចាំ ដោយពុំគិតពីការនឿយហត់ឡើយ។ Erika ៖ «តាមពិតទៅ នាងខ្ញុំហ្វឹកហាត់ច្រើនតាំងពីពុំទាន់ក្លាយជាកីឡាករជម្រើសជាតិមកម្លេះ តែក្រោយពីជាប់ជាបេក្ខភាពសម្រាប់ចូលប្រកួតក្នុងព្រឹត្តិការណ៍ស៊ីហ្គេម២០២៣ នេះមក ការហ្វឹកហាត់គឺធ្វើឡើងច្រើនលើសពីធម្មតា។ ពោលគឺ នាងខ្ញុំត្រូវហាត់តាំងពីព្រឹកព្រលឹមរហូតដល់ពេលល្ងាច ១ អាទិត្យចំនួន ៧ដង រហូតដល់ព្រឹត្តិការណ៍កីឡាស៊ីហ្គេមចាប់ផ្តើម»។

 
កាលវិភាគហ្វឹកហាត់៖

• ពេលព្រឹកហាត់នៅសាលាអន្តរជាតិភ្នំពេញ ( International School of Phnom Penh) ពីម៉ោង៦ ដល់ម៉ោង ៧ព្រឹក រាល់ថ្ងៃចន្ទ​ ដល់ថ្ងៃសុក្រ
• ពេលល្ងាច (ម៉ោង ៥ ដល់ម៉ោង ៨យប់) ថ្ងៃចន្ទ ដល់ថ្ងៃសុក្រ ហ្វឹកហាត់ជាមួយគ្រូ​​បង្វឹកខាងសហព័ន្ធកីឡាហែលទឹកកម្ពុជា
• ចុងសប្តាហ៍ហាត់ជាមួយគ្រូជប៉ុន ពីម៉ោង៧ ដល់ម៉ោង១១ថ្ងៃត្រង់ (ផ្តើមហាត់តាំងពីឆ្នាំ២០២១ រហូតមក)

ទោះមានចិត្តភ័យបន្តិចបន្តួចខ្លះៗក្តី Erika មានអារម្មណ៍រំភើប និងរីករាយខណៈខ្លួនត្រូវបានជ្រើសតាំងជាកីឡាករជម្រើសជាតិសម្រាប់ព្រឹត្តិការស៊ីហ្គេមឆ្នាំ២០២៣ នេះ។ សម្រាប់ការហាត់សមដើម្បីត្រៀមខ្លួនប្រកួតក្នុងព្រឹត្តិការណ៍កីឡាស៊ីហ្គេមលើកនេះ Erika បានថ្លែងថាខ្លួនត្រូវបានជួយជ្រោមជ្រែងជាច្រើនពីសាលា និងសហព័ន្ធកីឡាហែលទឹកកម្ពុជា រួមទាំងក្រុមគ្រួសារ។ «បន្ទាប់ពីនាងខ្ញុំត្រូវបានខាងសហព័ន្ធកីឡាហែលទឹកជ្រើសតាំងជាបេក្ខជនសម្រាប់ចូលប្រកួតស៊ីហ្គេមខាងមុខ ខាងសាលារៀនក៏ទទួលស្គាល់នាងខ្ញុំ ហើយបានជួយជ្រោមជ្រែងសម្រាប់ការហ្វឹកហាត់ត្រៀមខ្លួននេះ ជាពិសេស ខាងសហព័ន្ធដោយមើលឃើញថានាងខ្ញុំមានវ័យក្មេងជាងគេផង នាងខ្ញុំក៏ត្រូវបានយកចិត្តទុកដាក់ច្រើនពីគ្រូបង្វឹករបស់សហព័ន្ធផងដែរ។ លើសពីនេះ មានក្រុមគ្រួសារ សាច់ញាតិ និងមិត្តភក្តិរស់នៅជុំវិញក៏ជួយមើលថែ និងលើកទឹកចិត្តដល់រូបនាងខ្ញុំរហូតមកច្រើនផងដែរ»។ នៅអំឡុងពេលហាត់ត្រៀមជាមួយនឹងកាលវិភាគដ៏មមាញឹក Erika ក៏បានជួបនឹងបញ្ហាខ្លះៗដែរ ប៉ុន្តែយុវតីរូបនេះតាំងចិត្តថាពុំត្អូញត្អែរអំពីវាឡើយ ហើយខិតខំបន្តនូវអ្វីដែលខ្លួនកំពុងធ្វើសម្រាប់គោលដៅដែលខ្លួនចង់បាន។

ការត្រៀមខ្លួនចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី៣២នេះ គឺជាចំណុចសាកល្បងដ៏ធំមួយសម្រាប់យុវតី Erika ដែលទាមទារនូវការខិតខំប្រឹងប្រែងជាច្រើន ដើម្បីពង្រឹងសមត្ថភាពបន្ថែមចូលរួមប្រកួតប្រជែងជាមួយកីឡាករជម្រើសជាតិឆ្នើមៗមកពីបណ្តារប្រទេសអាស៊ានដទៃទៀត។ Erika បានបង្ហើបប្រាប់ពីចំណុចដែលខ្លួនកំពុងធ្វើការពង្រឹងពេលបច្ចុប្បន្នដូច្នេះថា៖ « ចំពោះនាងខ្ញុំ ចំណុចដែលត្រូវកែលម្អរ គឺការបន្ថែមកម្លាំងជើងដើម្បីបង្កើនល្បឿនហែលឱ្យកាន់តែលឿន ខណៈកម្លាំងដៃពេលហែលគឺនាងខ្ញុំធ្វើបានល្អច្រើនហើយ»។

ក្រៅពីគ្រូបង្វឹកខ្មែរ Erika ក៏មានគ្រូបង្វឹកជនជាតិជប៉ុនផ្ទាល់ខ្លួនម្នាក់ផងដែរ។ គ្រូបង្វឹកជប៉ុនតែងតែផ្តល់ជាជំនួយដោយផ្តោតលើការហ្វឹកហាត់ផ្នែកបច្ចេកទេសពេលហែល។ « គ្រូបង្វឹកជប៉ុនមើលឃើញច្រើនពីកង្វះខាតខាងបច្ចេកទេសលម្អិតតូចៗពេលនាងខ្ញុំហែល ដែលអ្នកធម្មតាពុំអាចដឹង។ ឧទាហរណ៍ដូចជា ការប្រើប្រាស់ដៃពុំទាន់ត្រូវទាំងស្រុង ដែលវាជាឧបសគ្គនាំឱ្យហែលយឺតពេលហែលជាដើម។ ដូច្នេះគាត់ជួយកែសម្រួលនូវចំណុចបច្ចេកទេសទាំងនោះឱ្យខ្ញុំបានច្រើន »។ យ៉ាងណាមិញ កញ្ញាក៏បានប្រាប់ពីលក្ខណៈពិសេសរបស់គ្រូបង្វឹកខ្មែរ ដែលតែងតែជួយជ្រោមជ្រែងច្រើនលើការគោរពនូវការទទួលទានអាហារត្រឹមត្រូវ និងការរក្សាកម្លាំង រួមទាំងការម៉ាស្សាសាច់ដុំ និងជម្រុញលើកទឹកចិត្តកញ្ញាជាដើម ទោះស្ថិតនៅក្នុងស្ថានភាពលំបាកបែបណាក៏ដោយ។

គួររំឮកដែរថា យុវតី Erika ធ្លាប់ចូលរួមហ្វឹកហាត់ជាមួយក្រុមហែលទឹករបស់សាលាហែលទឹក Itoman ដែលជាសាលាហែលទឹកដ៏ល្បីល្បាញ និងកំពូលមួយក្នុងប្រទេសជប៉ុន។ នៅអំឡុងឆ្នាំ២០២២ កញ្ញាបានចូលរួមហាត់ក្នុងក្រុមហែលទឹកសាលា Itoman ជប៉ុនចំនួន ២លើក រយៈពេល ២សប្តាហ៍ក្នុងមួយលើកៗ ដែលលើកទីមួយធ្វើឡើងនៅខែកក្កដា និងលើកទីពីរនៅខែធ្នូ នៅទីក្រុង Nagoya ប្រទេសជប៉ុន។ ក្រៅពីប្រទេសជប៉ុន និងនៅកម្ពុជា កញ្ញាពុំបានចេញទៅហាត់នៅប្រទេសផ្សេងទៀតឡើយ។ កញ្ញាគិតថាខ្លួននៅកំពុងស្ថិតនៅក្នុងស្ថានភាពត្រៀមខ្លួននៅឡើយសម្រាប់ព្រឹត្តិការណ៍កីឡាស៊ីហ្គេមខាងមុខនេះ ហើយសង្ឃឹមយ៉ាងមុតមាំថាខ្លួនមានសក្តានុពលច្រើន និងអាចធ្វើបានប្រសើរជាងបច្ចុប្បន្ននេះ ដើម្បីចូលរួមប្រកួតដណ្តើមយកមេដាយជូនជាតិ៕