បច្ចុប្បន្ន ប៉ែកខាងជើងទីក្រុងភ្នំពេញ កំពុងត្រូវបានអភិវឌ្ឍន៍ដោយគម្រោងធំៗមួយចំនួនរបស់រដ្ឋ និងឯកជន។ វត្តមាននៃការកសាងក្រសួងរៀបចំដែនដី និងនគរូបនីយកម្មថ្មី វិមានឈ្នះឈ្នះ និងពហុកីឡដ្ឋានមរតកតេជោ ដែលត្រូវបានប្រើប្រាស់ក្នុងការប្រារព្ធព្រឹត្តិការណ៍ប្រកួតកីឡាស៊ីហ្គេមឆ្នាំ២០២៣ កម្ពុជាធ្វើជាម្ចាស់ផ្ទះលើកដំបូងដ៏គគ្រឹកគគ្រេងនាខែឧសភាកន្លងទៅថ្មីៗនេះ បានធ្វើឱ្យតំបន់ភាគខាងជើងទីក្រុងភ្នំពេញកាន់តែរីកចម្រើន និងមានភាពទាក់ទាញ។ បច្ចុប្បន្ន គេក៏សង្កេតឃើញមានសំណង់បុរីលំនៅដ្ឋាន និងផ្ទះអាជីវកម្ម មានគ្រប់លំដាប់ថ្នាក់ត្រូវបានសាងសង់ឡើងជាច្រើនកន្លែងនៅប៉ែកខាងជើងនេះដែរ។ លោកបណ្ឌិត គីម ហ៊ាង ម្ចាស់គម្រោងសាងសង់បុរី វិមានសំណាង បានផ្តល់បទសម្ភាសន៍ជាមួយទស្សនាវដ្តីញញឹម អំពីការសាងសង់បុរីលំនៅដ្ឋានប្រណីតនៅភាគខាងជើងទីក្រុងភ្នំពេញ ស្ថិតនៅតាមបណ្តោយមហាវិថីឈ្នះឈ្នះ ដែលជាតំបន់មានសក្តានុពលអភិវឌ្ឍថ្មីរបស់ទីក្រុងភ្នំពេញនាពេលបច្ចុប្បន្ន ដូចខាងក្រោម។

1.តំបន់ប៉ែកខាងជើងទីក្រុងភ្នំពេញតាមបណ្តោយមហាវិថីឈ្នះឈ្នះនេះ កំពុងត្រូវបានអភិវឌ្ឍជាតំបន់រស់នៅថ្មី ដែលទទួលការចាប់អារម្មណ៍ច្រើនពីអ្នកវិនិយោគផ្នែកអចលនទ្រព្យ និងពលរដ្ឋនាពេលបច្ចុប្បន្ន។ លោកបណ្ឌិតអាចរៀបរាបពីភាពទាក់ទាញនៃគម្រោងបុរី វិមានសំណាង នេះ បន្តិចបានទេ?

តាមពិតទៅ មុននឹងជ្រើសរើសយកទីតាំងសាងសង់បុរីនេះ ខ្ញុំបានពិនិត្យមើលគម្រោងទីតាំងសាងសង់ប្រមាណ១០០កន្លែង ដើម្បីជ្រើសរើសទីតាំងសមរម្យបំផុតសម្រាប់សាងសង់ រួមទាំងសិក្សាអំពីតម្រូវការផ្ទះសម្រាប់រស់នៅរបស់ពលរដ្ឋនាពេលបច្ចុប្បន្ន និងសម្រាប់អនាគត។ ក្នុងនោះយើងឃើញមានទីតាំងចំនួន៥ ទៅ ៧កន្លែង ដែលយើងអាចមានលទ្ធភាពថាគួរនិងត្រូវសាងសង់មួយណាមុនគេ។ ក្រោយការសិក្សារួចមកឃើញថា ការសាងសង់ផ្ទះល្វែងមានចំនួនច្រើនលើសលុបក្នុងរយៈពេលប្រមាណ២០ឆ្នាំចុងក្រោយនេះ។ ជាក់ស្តែង នៅក្នុងរាជធានីភ្នំពេញសព្វថ្ងៃ ចំនួនផ្ទះល្វែងទំហំ ៤ម៉ែត្រគុណ១២ម៉ែត្រ និង ៤ម៉ែត្រគុណ១៦ម៉ែត្រ មានចំនួនច្រើនពេកលើសពីតម្រូវការរួចទៅហើយ។ ម្យ៉ាងទៀត ក្នុងរយៈពេល១០ឆ្នាំចុងក្រោយនេះ ការសាងសង់ផ្ទះលីងវីឡា (ផ្ទះវីឡាកូនកាត់) និងវីឡាភ្លោះក៏មានចំនួនច្រើនរួចហើយផងដែរ។ យ៉ាងណាមិញ សព្វថ្ងៃនេះគម្រោងសាងសង់ផ្ទះវីឡាទោលប្រណីត គឺនៅមានកម្រិត និងមានតម្រូវការខ្ពស់ទៅវិញ។ យោងលើទិដ្ឋភាពជាក់ស្តែងបែបនេះ នៅចុងឆ្នាំ២០២១ យើងខ្ញុំបានសម្រេច សាងសង់គម្រោងវីឡាទំនើបនេះឡើង ហើយជាលទ្ធផលក្រោយគម្រោងនេះចាប់ផ្តើមលក់ភ្លាម គឺនៅអំឡុងមួយឆ្នាំដំបូងក្នុងឆ្នាំ២០២២ យើងលក់បានប្រមាណ ៤០លានដុល្លារសហរដ្ឋអាមេរិក។ ដូច្នេះ បុរី វិមានសំណាង យើងខ្ញុំជាគម្រោងផ្ទះវីឡាទំនើបសម្រាប់អភិជន និងពលរដ្ឋរស់នៅភ្នំពេញដែលមានធនធាន ពោលគឺគម្រោងនេះបង្កើតឡើងឱ្យ​មានជាសហគមន៍អភិជនទំនើបក្នុងតំបន់នេះ ដែលកំពុងមានសក្តានុពលលើវិស័យអចលនទ្រព្យលំដាប់ខ្ពស់ ដែលនៅមានចំនួនតិចតួចបំផុតនៅឡើយនៅកម្ពុជា។

ម្យ៉ាងទៀត បើយើងក្រឡេកមើលពីតំបន់ប៉ែកខាងជើងក្រុងភ្នំពេញសព្វថ្ងៃនេះវិញ ឃើញថាការសាងសង់ក្រសួងមួយចំនួនរបស់ស្ថាប័នរដ្ឋ មានដូចជាក្រសួងដែននីនិងនគរូបនីយកម្ម និងស្ថាប័នក្រសួងមួយចំនួនទៀតដែលកំពុងសាងសង់នៅតំបន់នេះ ក៏ដូចជាវត្តមានពីស្ថាប័នអប់រំឯកជននិងរដ្ឋមានដូចជាសាលាអន្តរជាតិធំៗ សាកលវិទ្យាល័យរដ្ឋនិងឯកជន ក៏ដូចជាផ្សារទំនើបអ៊ីអន២សែនសុខជាដើម គឺចំណាយពេលធ្វើដំណើរដោយយានយន្តត្រឹមតែប្រមាណ ១៥នាទីប៉ុណ្ណោះពីបុរីយើងខ្ញុំ។ ជារួម ការអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ធំទូលាយតភ្ជាប់តំបន់សំខាន់ៗពីកណ្តាលទីក្រុងភ្នំពេញ និងការមានប្រព័ន្ធទឹកភ្លើងប្រើប្រាស់គ្រប់គ្រាន់ដែលទើបសាងសង់ហើយថ្មីផង បានធ្វើឱ្យតំបន់នេះផ្ទុះនូវសក្តានុពលជាតំបន់ងាយស្រួលសម្រាប់ការរស់នៅ និងមានផាសុកភាព។

2.តើអ្វីជាសក្តានុពលសំខាន់នៃតំបន់ភាគខាងជើងក្រុងភ្នំពេញនេះ?

បើនិយាយអំពីសក្តានុពលនៃនៅប៉ែកខាងជើងនេះ ប្រៀបធៀបជាមួយប៉ែកខាងកើតនិងខាងលិចក្រុងភ្នំពេញវិញឃើញថា​ សព្វថ្ងៃមានការកសាងបុរីផ្ទះលំនៅដ្ឋាន និងផ្ទះអាជីវកម្មជាច្រើននៅប៉ែកខាងជើងនេះ ខណៈប៉ែកខាងកើត និងខាងលិចគឺនៅមានចំនួនតិចតួចនៅឡើយ។ ដូចយើងឃើញមានស្រាប់ គឺវត្តមានបុរីជាច្រើនត្រូវបាននិងកំពុងសាងសង់នៅប៉ែកខាងជើងនេះមានដូចជា៖ បុរីជីបម៉ុង បុរីប៉េងហួត បុរីភ្នំពេញថ្មី និងបុរីអង្គរជាដើម។

3.សូមលោកបណ្ឌិតប្រាប់ពីការអភិវឌ្ឍន៍នៅតំបន់នេះ និងស្ថានភាពនៃចំនួនប្រជាពលរដ្ឋចូលមករស់នៅក្នុងតំបន់ភាគខាងជើងភ្នំពេញនេះ ធៀបកាលពីជាង១០ឆ្នាំមុន។

ទំនោរនៃការអភិវឌ្ឍន៍ហេដ្ឋារចនាសម្ព័ន្ធ ការសាងសង់ស្ថាប័នរដ្ឋ និងការវិនិយោគរបស់វិស័យឯកជនធំៗ ធ្វើឱ្យមានកំណើនប្រជាពលរដ្ឋមករស់នៅតំបន់ខាងជើងភ្នំពេញសព្វថ្ងៃកើនឡើងជាលំដាប់។ ខ្ញុំសូមបញ្ជាក់ដែរថា កាលពីជាង១០ឆ្នាំមុន បើគេនិយាយពីក្រុងភ្នំពេញ គឺភាគច្រើនបំផុតគេសំដៅលើខណ្ឌទាំង ៤ នៅកណ្តាលរាជធានីភ្នំពេញមានដូចជា៖ ខណ្ឌដូនពេញ ខណ្ឌចំការមន ខណ្ឌ៧មករា និងខណ្ឌទួលគោកប៉ុណ្ណោះ ព្រោះតំបន់នានាជុំវិញខណ្ឌទាំង ៤ ខាងលើនេះ គឺមានការអភិវឌ្ឍន៍តិចតួចបំផុតនៅឡើយ។ ដូច្នេះនៅតំបន់នេះកាលពីជាង១០ឆ្នាំមុន គឺនៅពុំទាន់មានការអភិវឌ្ឍន៍អ្វីច្រើននៅឡើយទេ គឺទើបតែរយៈពេលជិត១០ឆ្នាំចុងក្រោយនេះប៉ុណ្ណោះ។

យ៉ាងណាមិញ ការអភិវឌ្ឍទីក្រុងសព្វថ្ងៃ គឺកើតមានឡើងគ្រប់ទិសទាំង ៤ មានលិចកើតជើងត្បូងជុំវិញក្រុងភ្នំពេញ។ បើយើងមើលត្រួសៗពីលក្ខណៈពិសេសនៃតំបន់ទិសទាំង ៤ នេះវិញឃើញថា ប៉ែកខាងកើតជាតំបន់មានសំណង់លំនៅដ្ឋានពលរដ្ឋរស់នៅអចិន្រ្តៃច្រើន និងដោយសារមានទន្លេសាប និងទន្លេមេគង្គប្រសព្វគ្នានៅតំបន់នេះផង ធ្វើឱ្យតំ​បន់នេះមានសក្តានុពលខ្ពស់សម្រាប់វិស័យទេសចរណ៍ដែរ។ ខុសពីការអភិវឌ្ឍន៍នៅភាគខាងត្បូងភ្នំពេញ ដែលមានលំហរផ្ទៃដីសាងសង់នៅខ្លីព្រោះវាទាល់នឹងក្រុងតាខ្មៅ ខេត្តកណ្តាល និងផ្នែកខាងលិចភ្នំពេញ ដែលជាតំបន់រោងចក្រឧស្សាហកម្ម សម្រាប់ប៉ែកខាងជើងភ្នំពេញនេះ គឺមានសក្តានុពលច្រើនសម្រាប់ការអភិវឌ្ឍន៍ក្រុងនាពេលអនាគត។

ម្យ៉ាងទៀត បើយើងមើលពីទំនោរការផ្លាស់ទីលំនៅដ្ឋានរបស់ពលរដ្ឋមានធនធានវិញ ឃើញថាពួកគាត់មួយចំនួនចេញពីកណ្តាលក្រុងដែលជាទីក្រុងចាស់ មកតាំងទីលំនៅក្នុងខណ្ឌទួលគោក និងសែនសុខ ដែលជាក្រុងមានការអភិវឌ្ឍន៍ថ្មី ធ្វើឱ្យដីនិងលំនៅដ្ឋានក្នុងខណ្ឌទាំង ២ នេះឡើងខ្ពស់ខ្លាំងដូចសព្វថ្ងៃ។ ក្នុងរយៈពេល១០ឆ្នាំចុងក្រោយនេះ ការអភិវឌ្ឍន៍​​​ថ្មីៗមានដូចជាផ្សារទំនើបអ៊ីអន២ ផ្សារម៉ាក្រូ និងពហុកីឡាដ្ឋានជាតិតេជោ។ល។ លើតំបន់ប៉ែកខាងជើងនៃខណ្ឌទាំង​ ២ ខាងលើនេះ ធ្វើឱ្យសក្តានុពលនៃតំបន់ប៉ែកខាងជើងភ្នំពេញកាន់តែមានភាពទាក់ទាញ ខណៈតម្លៃដីធ្លីក៏ចេះតែឡើងថ្លៃ ហើយចំនួនប្រជាពលរដ្ឋមកទិញលំនៅដ្ឋានថ្មីក្នុងតំបន់នេះក៏ឃើញមានកើនឡើងច្រើនផងដែរ។

4.ដោយផ្អែកលើសក្តានុពលនៃតំបន់នេះ តើទុនវិនិយោគពីបរទេស និងក្នុងស្រុកលើផ្នែកអ្វីដែលមានចំនួនច្រើនជាងគេ?

ការវិនិយោគលើវិស័យសំណង់និងពានិជ្ជកម្ម គឺមានការរីកចម្រើនច្រើន។ ស្របនឹងការរៀបចំឱ្យមានហេដ្ឋារចនាសម្ព័ន្ធផ្លូវថ្នល់ និងទឹកភ្លើងដែលចាំបាច់សម្រាប់ការរស់នៅប្រចាំថ្ងៃរបស់ប្រជាពលរដ្ឋ ដូចដែលយើងទាំងអស់គ្នាមើលឃើញច្បាស់ហើយថា ការសាងសង់ស្ថាប័នរដ្ឋមួយចំនួននៅតំបន់ភាគខាងជើងនេះមានដូចជា ក្រសួងដែនដីនិងនគររូបនីយកម្ម ស្ថាបនស្នងការនគបាលរាជធានីភ្នំពេញ និងគម្រោងសាងសង់ក្រសួងនៃស្ថាប័នរដ្ឋមួយចំនួនទៀតក៏មាននៅតំបន់នេះដែរ។ ចំណែកឯវត្តមាននៃការវិនិយោគទុនសាងសង់ផ្សារទំនើប សាលារៀន និងមន្ទីរពេទ្យ ជាពិសេស បុរីលំនៅដ្ឋានរស់នៅគឺមានជាបន្តបន្តាប់រួចទៅហើយនៅក្នុងតំបន់នេះ។

5.តើអត្រានៃការលក់ដូរដីធ្លី ឬផ្ទះរបស់ពលរដ្ឋរស់នៅក្នុងតំបន់នេះមានការវិវត្តន៍កម្រិតណា?

ការលក់ដូរដីធ្លី គឺមានច្រើននិងសកម្មខ្លាំងណាស់ក្នុងតំបន់ប៉ែកខាងជើងភ្នំពេញនេះ។ ដោយសារវាជាតំបន់មានសក្តានុពលល្អចំពោះការសាងសង់លំនៅដ្ឋានរស់នៅ ហើយសព្វថ្ងៃក្នុងតំបន់បុរី វិមានសំណាងនេះ មានប្រជាពលរដ្ឋជាអ្នកមានជាច្រើនកំពុងតែចាប់អារម្មណ៍ ព្រោះតំបន់នេះនឹងស្ថិតក្នុងតំបន់លំនៅដ្ឋានរស់នៅ និងពានិជ្ជកម្មដ៏សំខាន់ថ្មីមួយរបស់ទីក្រុងភ្នំពេញ។

6.លោកបណ្ឌិតមើលឃើញយ៉ាងណាអំពីទំនោរនៃការឡើងថ្លៃដីធ្លី, និងការលក់ដូរអចលនព្រទ្យ នៅក្នុងតំបន់នេះសព្វថ្ងៃនេះ?

ដូចដែលយើងបានឃើញសព្វថ្ងៃអ៊ីចឹង គឺថាការសាងសង់បុរីលំនៅដ្ឋាន ផ្សារទំនើប ពហុកីឡដ្ឋានជាតិតេជោ និងក្រសួងរបស់ស្ថាប័នរដ្ឋមួយចំនួន​ ដែលបានរៀបរាប់ពីខាងលើនេះ គឺឆ្លុះបញ្ចាំងយ៉ាងច្បាស់ថាវាជាតំបន់អភិវឌ្ឍនិងមានសក្តានុពលស្រាប់រួចទៅហើយ។ កាលពីប្រមាណ ៥ឆ្នាំមុន គឺនៅមានភាពស្រពិចស្រពិលក្រោយពីយើងបានឮពីព័ត៌មានអំពីការកសាងក្រសួងមួយចំនួនរបស់រដ្ឋនៅប៉ែកខាងជើងភ្នំពេញ។ យ៉ាងណាមិញ បច្ចុប្បន្ន ជាតួយ៉ាងដូចយើងទាំងអស់គ្នាឃើញផ្ទាល់នឹងភ្នែកហើយថា ការសាងសង់ស្ថាប័នទាំងនោះគឺមានរួចទៅហើយ និងខ្លះទៀតកំពុងដំណើរការគម្រោងសាងសង់ជាបន្តបន្ទាប់ ខណៈការសាងសង់ និងវិនិយោគលើវិស័យអចលនទ្រព្យ និងពានិជ្ជកម្មក៏កំពុងមានយ៉ាងសកម្មផងដែរ។ ខ្ញុំគិតថាទំនោរនេះនឹងនៅតែបន្តរីកចម្រើនកាន់តែខ្លាំងទៅមុខទៀត។

7.សូមប្រាប់ពីស្ថានភាពនៃការលក់ផ្ទះលំនៅដ្ឋាននៅក្នុងបុរីលោកបណ្ឌិតបច្ចុប្បន្ន។ តើមានអតិថិជនប្រភេទណាជាវច្រើនជាងគេ?

ស្ថានភាពនៃការជាវលំនៅដ្ឋានរស់នៅក្នុងបុរី វិមានសំណាង យើងខ្ញុំ គឺដំណើរការល្អ ពោលគឺមានអតិថិជនមានធនធានច្រើនរូបបានទិញអចលនទ្រព្យពីបុរីយើងរួចទៅហើយ។ មូលហេតុដែលនាំឱ្យបុរីយើងលក់ផ្ទះបានចំនួនច្រើន ព្រោះការសាងសង់លំនៅដ្ឋានជាផ្ទះវីឡាប្រណីតក្នុងបុរីវិមានសំណាងនេះ គឺធ្វើឡើងដោយយកចិត្តទុកដាក់ខ្ពស់បំផុតលើគុណភាពសំណង់ និងភាពទាន់សម័យសម្រាប់ការស់នៅជាសហគម​ន៍បែបអភិជនសម័យទំនើប។ ម្យ៉ាងទៀត ក្រុមហ៊ុនយើងខ្ញុំក៏កំណត់យកគោលការលក់ក្នុងតម្លៃថោកសមរម្យ ពោលគឺយើងខ្ញុំពុំគិតតែពីផលចំណេញច្រើនពេកពីអតិថិជននោះទេ។ ការផ្តល់នូវសេវាកម្មសាងសង់លំនៅដ្ឋានល្អ មានគុណភាព ចំនួនច្រើនជូនអតិថិជន ជាប្រការដែលក្រុមហ៊ុនយើងខ្ញុំកំពុងយកចិត្តទុកដាក់ ព្រោះការបង្កើតសហគមន៍រស់នៅប្រណីតដ៏ធំមួយសម្រាប់ពលរដ្ឋមករស់នៅភាគខាងជើងក្រុងភ្នំពេញនេះ គឺជាក្តីសុបិនរបស់យើងខ្ញុំ។ យើងខ្ញុំរំពឹងថាបុរីលំនៅដ្ឋាន វិមានសំណាងយើងខ្ញុំនឹងក្លាយជាសហគមន៍រស់នៅមួយទំនើប ដើម្បីស្រូបយកពលរដ្ឋមករស់នៅក្នុងតំបន់នេះកាន់តែច្រើនថែមទៀត៕

• អំពីលោកឧកញ៉ា បណ្ឌិត គីម ហ៊ាង ជាម្ចាស់គម្រោងសាងសង់បុរីលំដាប់អភិជន វិមានសំណាង

លោក បណ្ឌិត គីម ហ៊ាង មានអាជីពក្នុងវិស័យអចលនទ្រព្យកម្ពុជា ជាពិសេស នៅក្នុងទីក្រុងភ្នំពេញរយៈពេលជាង ២០ឆ្នាំ។ បច្ចុប្បន្ន លោកបណ្ឌិតជាស្ថាបនិកសាងសង់គម្រោងបុរីលំនៅដ្ឋានបែបអភិជន វិមានសំណាង ហើយក្រុមហ៊ុនរបស់លោកផ្តោតលើសេវាសាងសង់ និងលក់អចលនទ្រព្យក្នុងបុរី វិមានសំណាង។

អាសយដ្ឋាន៖ មហាវិថីឈ្នះឈ្នះ ចម្ងាយ២៥០០ម៉ែត្រខាងជើងក្រសួងដែនដីថ្មី

𝐖𝐞𝐛𝐬𝐢𝐭𝐞: boreyvimeansamnang.com