ការផ្តើមដំណើរការអ៊ែបថ្មី “Cambodia Ride” នៅក្នុងខេត្តសៀមរាប!

TOP › Column › Top Runner › ការផ្តើមដំណើរការអ៊ែបថ្មី “Cambodia Ride” នៅក្នុងខេត្តសៀមរាប!

2024.01.19

Top Runner

ស្របនឹងការបើកដាក់ឱ្យដំណើរការអាកាសយានដ្ឋានអន្តរជាតិថ្មីនៅខេត្តសៀមរាបនៅថ្ងៃទី១៦ ខែតុលា ឆ្នាំ២០២៣នេះ កម្មវិធី (អ៊ែប) ហៅតាក់ស៊ី ដែលជាសេវាកម្មដឹកជញ្ជូនថ្មីឈ្មោះថា “Cambodia Ride” បានផ្តើមដាក់ឱ្យដំណើរការ។

អ៊ែបដឹកជញ្ជូនដូចជា Grab និង PassApp កំពុងពេញនិយមនៅក្នុងប្រទេសកម្ពុជា ប៉ុន្តែលក្ខណៈពិសេសរបស់អ៊ែប “Cambodia Ride” គឺការផ្តល់ជាសេវាកម្មដឹកជញ្ជូនភ្ញៀវទេសចរតែមួយគត់ ដែលអតិថិជនអាចហៅរថយន្តជិះពីក្នុងអាកាសយានដ្ឋានខេត្តសៀមរាប។ កម្មវិធីនេះធ្វើឡើងក្រោមកិច្ចសហការណ៍ក្នុងភាពជាដៃគូជាមួយសមាគមដឹកជញ្ជូនភ្ញៀវទេសចរណ៍ សម្រាប់អាកាសយានដ្ឋានអន្តរជាតិសៀមរាប (TTA TTA ; Tourist Transportation Association For Siem Reap International Airport)។ អ៊ែបនេះ មានមុខងារកក់យានជំនិះទុកមុនរហូតដល់រយៈពេល៣ខែ និងមានមុខងារជួលពេលវេលាដ៏ងាយស្រួលសម្រាប់ការទស្សនាក្នុងទីក្រុង និងប្រាង្គប្រាសាទនានា និងមានភាពខុសប្លែកពីកម្មវិធីផ្សេងទៀត ដោយមានចំនួន២៦ភាសា រួមទាំងភាសាជប៉ុនផងដែរ។ ជាងនេះទៀត សេវាកម្មនេះត្រូវបានគេនិយាយថាជាសេវាកម្មដំបូងគេក្នុងវិស័យដឹកជញ្ជូនភ្ញៀវទេសចរ ដែលអនុញ្ញាតឱ្យអ្នកទេសចរភេទស្រីអាចធ្វើការជ្រើសរើសអ្នកបើកបរភេទស្រីដូចគ្នាដែលអាចទុកចិត្តបាន (*មានតែរ៉ឺម៉កតែប៉ុណ្ណោះ)។

លើសពីនេះ ប្រព័ន្ធហៅភ្ញៀវជិះ BtoB ត្រូវបានបង្កើតឡើងដោយអនុញ្ញាតឱ្យសណ្ឋាគារ និងភ្នាក់ងារទេសចរណ៍ អាចបញ្ជាទិញការជិះសម្រាប់ភ្ញៀវរបស់ខ្លួន ដែលសេវាបែបនេះនឹងធ្វើឱ្យប្រសើរឡើងច្រើនដល់ភាពងាយស្រួលនៅក្នុងសេវាកម្មដឹកជញ្ជូនភ្ញៀវទេសចរក្នុងអាជីវកម្មទេសចរណ៍។

នៅក្នុងការចុះផ្សាយនេះ យើងខ្ញុំបានសម្ភាសន៍អ្នកបើកបរក្នុងសមាគម TTA, អ្នកបើកបរស្រី្ត និងប្រតិបត្តិករសណ្ឋាគារ អំពីចំណាប់អារម្មណ៍របស់ពួកគាត់ពាក់ព័ន្ធនឹងការប្រើប្រាស់អ៊ែប “Cambodia Ride”។

បទសម្ភាសន៍លោក អមតៈ ពីសមាគមតាក់ស៊ីទេសចរណ៍ (TTA)

សូមលោកណែនាំខ្លួន និងប្រាប់យើងខ្ញុំអំពី TTA

ខ្ញុំមានអាយុ ៤៤ឆ្នាំ មានកូនពីរនាក់ និងមានស្រុកកំណើតនៅខេត្តសៀមរាប។ ខ្ញុំចាប់ផ្តើមដឹកភ្ញៀវទេសចរបរទេសដោយម៉ូតូហុងដាឌ្រីមដែលខ្ញុំទិញកាលពីខ្ញុំនៅជានិស្សិត។ ខ្ញុំគិតថាវាជាអាជីពមួយបម្រើការក្នុងវិស័យទេសចរ ដូច្នេះខ្ញុំបានសម្រេចចិត្តធ្វើជាអ្នកបើកបរអាជីពកាលពី១៨ឆ្នាំមុនមក។ ខ្ញុំបានចូលរួមជាមួយ TTA ក្នុងឆ្នាំ២០០៨។

TTA គឺជាសមាគមដឹកភ្ញៀវទេសចរមួយ ដែលបានបង្កើតឡើងដើម្បីបម្រើសេវាដឹកអតិថិជនដោយរថយន្តតាក់ស៊ីពីអាកាសយានដ្ឋានអន្តរជាតិខេត្តសៀមរាប។ បច្ចុប្បន្ននេះ យើងមានអ្នកបើកបរចំនួន ៣៣០នាក់។ មានតែសមាជិក TTA ប៉ុណ្ណោះ ដែលអាចរង់ចាំអតិថិជននៅព្រលានយន្តហោះដើម្បីបើកតាក់ស៊ីបាន។

តើលោកយល់ឃើញយ៉ាងណាបន្ទាប់ពីបានប្រើប្រាស់អ៊ែប “Cambodia Ride” នេះជាក់ស្តែង?

កាលពីជំនាន់គ្មានទូរសព្ទទំនើប ឬ Wi-Fi យើងស្វែងរកភ្ញៀវទេសចរនៅបញ្ជរអាកាសយានដ្ឋាន ហើយសុំឱ្យពួកគាត់ឡើងជិះតាក់ស៊ីយើង ប៉ុន្តែឥឡូវនេះយើងរស់នៅក្នុងសម័យកាលស្មាតហ្វូន។ អ៊ែប “Cambodia Ride” អនុញ្ញាតឱ្យមានការកក់ទុកជាមុន ដែលខ្ញុំគិតថាវាជាសេវាកម្មដ៏ងាយស្រួលសម្រាប់ភ្ញៀវទេសចរបរទេស។ កម្មវិធីនេះងាយស្រួលប្រើនៅពេលយើងបានសុំានឹងការប្រើ ហើយវាពិតជាងាយស្រួលប្រើប្រាស់ណាស់។

សូមប្រាប់យើងខ្ញុំអំពីចំណុចដែលលោកនឹងរំពឹងពីអ៊ែប “Cambodia Ride” នាពេលអនាគត។

សម្រាប់យើងខ្ញុំ ចំណុចសំខាន់នៃការទំនាក់ទំនងរបស់យើងជាមួយអតិថិជនគឺនៅបញ្ជរអាកាសយានដ្ឋាន ដូច្នេះយើងខ្ញុំសប្បាយចិត្តណាស់ ដែលមានឱកាសកាន់តែច្រើនពីការបញ្ជាទិញពីខាងសណ្ឋាគារ និងភ្នាក់ងារទេសចរណ៍តាមរយៈអ៊ែប “Cambodia Ride” នេះ។ លើសពីនេះ ប្រព័ន្ធនេះត្រូវបានដំណើរការដោយក្រុមហ៊ុនជប៉ុន ដូច្នេះអ្នកអាចប្រើវាដោយភាពជឿជាក់។ យើងខ្ញុំជាអ្នកបើកបរក្នុងសមាគម TTA នឹងប្រឹងប្រែងលើកកំពស់គុណភាពសេវាកម្មរបស់ពួកយើង ដើម្បីអោយអតិថិជនបានប្រើប្រាស់សេវាកម្មយើងខ្ញុំដោយទំនុកចិត្ត ហើយចូលរួមជាមួយ “Cambodia Ride” ធ្វើយ៉ាងណាឱ្យភ្ញៀវទេសចរណ៍មកខេត្តសៀមរាបមានចំនួនកាន់តែច្រើនឡើង។

កិច្ចសម្ភាសន៍ជាមួយអ្នកស្រី សុមុនតា ប្រធានក្រុមស្ត្រីបើកបររ៉ឺម៉ក

សូមប្រាប់យើងខ្ញុំអំពីរូបអ្នកស្រី និងក្រុមការងារអ្នកបើករ៉ឺម៉កស្ត្រី

ខ្ញុំជាម្តាយទោលមានកូន៣នាក់ក្នុងបន្ទុក។ ខ្ញុំចង់ធ្វើការក្នុងវិស័យទេសចរណ៍ក្នុងខេត្តសៀមរាប ព្រោះទីនេះមានភ្ញៀវទេសចរមកពីគ្រប់ទិសទី ដូច្នេះទើបខ្ញុំចាប់យករបរជាអ្នកបើកបរនេះ។ កាលពី៣ឆ្នាំមុន ខ្ញុំបានផ្តើមបង្កើតក្រុមអ្នកបើកបររ៉ឺម៉កស្រី្ត ដោយមានអ្នកបើកបរជាស្ត្រីដទៃទៀតចូលរួម។ ក្រុមរបស់យើងយកការសាមគ្គីភាពជាចម្បង។ យើងជួយគ្នាទៅវិញទៅមកដោយបែងចែកការកុម្ម៉ង់ទាំងអស់នោះនៅក្នុងក្រុម។

តើយល់ឃើញយ៉ាងណាចំពោះអ៊ែប “Cambodia Ride”

ក្រុមរបស់យើងមានគម្រោងជួល និងបណ្តុះបណ្តាលអ្នកបើកបរជាស្ត្រីបន្ថែមទៀត ដើម្បីឱ្យស្ត្រីអាចក្លាយជាមនុស្សឯករាជ្យ រឹងមាំដោយខ្លួនឯង និងរស់នៅដោយមិនពឹងផ្អែកលើអ្នកដទៃ។ ខ្ញុំចង់ឱ្យស្ត្រីជាច្រើនមានទំនុកចិត្តថាពួកគាត់អាចរកចំណូលបានឋិតថេរសម្រាប់ផ្គត់ផ្គង់គ្រួសាររបស់ពួកគាត់។

យើងសង្ឃឹមថាអ៊ែប “Cambodia Ride” នឹងស្វាគមន៍ភ្ញៀវទេសចរជាច្រើនមកពីជុំវិញពិភពលោក ហើយជាលទ្ធផល វានឹងផ្តល់ឱកាសការងារជាច្រើនដល់ក្រុមរបស់យើង។ យើងមានមោទនភាពក្នុងការផ្តល់សេវាកម្មដឹកជញ្ជូនប្រកបដោយគុណភាពដល់ភ្ញៀវទេសចរមកពីជុំវិញពិភពលោក។

បទសម្ភាសន៍អ្នកស្រី Jenny ជាអ្នកគ្រប់គ្រងសណ្ឋាគារ

សូមណែនាំខ្លួន និងប្រាប់យើងខ្ញុំអំពីសណ្ឋាគាររបស់អ្នកស្រី

នាងខ្ញុំបើកសណ្ឋាគារមួយឈ្មោះថា Angkor Style Resort & Spa។ នាងខ្ញុំជាម្តាយទោលចិញ្ចឹមកូន៤នាក់នៅក្នុងបន្ទុក និងគ្រប់គ្រងបុគ្គលិក១២នាក់។ នាងខ្ញុំក៏ជាអនុប្រធានសមាគមសណ្ឋាគារកម្ពុជា និងជាសមាជិកនៃបណ្តាញគ្រប់គ្រង BNI Cambodia ផងដែរ។ Angkor Style Resort & Spa ជាសណ្ឋាគារប្រណីត ដែលមាន ៣៣បន្ទប់ ហើយមុនពេលមានការផ្ទុះឡើងនៃជំងឺកូវីដ១៩នេះ មានភ្ញៀវជាង ៩០% ជាជនបរទេស ជាពិសេសមកពីអឺរ៉ុបបានមកស្នាក់នៅសណ្ឋាគារយើងខ្ញុំ។

តើអ្នកស្រីមានចំណាប់អារម្មណ៍បែបណានៅពេលត្រូវបានគេណែនាំឱ្យប្រើអ៊ែប “Cambodia Ride” ជាលើកដំបូង?

សម្រាប់ភ្ញៀវទេសចរបរទេសដែលមកលេងខេត្តសៀមរាប គឺភាគច្រើនពួកគាត់ត្រូវជួបអ្នកបើកបរតាក់ស៊ីដំបូងគេ។ មានករណីឈ្លោះប្រកែកគ្នាអំឡុងពេលចរចាតម្លៃតាក់ស៊ីកើតមានឡើងផងដែរ ដូច្នេះក្នុងនាមជាអ្នកធ្វើការក្នុងឧស្សាហកម្មទេសចរណ៍ នាងខ្ញុំមានការព្រួយបារម្ភចំពោះបញ្ហាបែបនេះ។ ការកំណត់តម្លៃរបស់អ៊ែប “Cambodia Ride” គឺច្បាស់លាស់ ហើយពុំបាច់ចាំចរចា និងធ្វើឱ្យបញ្ហាពាក់ព័ន្ធដែលកើតមានកន្លងមកក៏លែងមាន ដូច្នេះនាងខ្ញុំគិតថាវាជាគំនិតដ៏ល្អមួយក្នុងការនាំយកសេវាកម្មបែបនេះមកប្រើប្រាស់ ខណៈវាក៏មានសុវត្ថិភាពសម្រាប់ភ្ញៀវទេសចរទៀតដែរ។ ជំនួយបច្ចេកទេសដែលផ្តល់ដោយក្រុមហ៊ុនជប៉ុនក៏ជាកត្តាសំខាន់សម្រាប់យើងខ្ញុំធ្វើការសម្រេចចិត្តណែនាំអ៊ែប “Cambodia Ride” នេះដែរ។

សូមប្រាប់យើងខ្ញុំពីអ្វីដែលអ្នកស្រីរំពឹងពីអ៊ែប “Cambodia Ride” នេះ

ជាមួយនឹងការបើកដាក់ឱ្យប្រើប្រាស់អាកាសយានដ្ឋានអន្តរជាតិសៀមរាបថ្មីនេះ សេវាជូនភ្ញៀវទេសចរពីអាកាសយានដ្ឋាននឹងកាន់តែមានសារៈសំខាន់សម្រាប់ប្រតិបត្តិករសណ្ឋាគារ។ ក្នុងនាមនាងខ្ញុំជាម្ចាស់អាជីវកម្មស្រ្តីម្នាក់ នាងខ្ញុំសូមថ្លែងអំណរគុណចំពោះក្រុមហ៊ុនបង្កើតអ៊ែប “Cambodia Ride” ដែលបានចូលរួមជួយយ៉ាងសកម្មដល់ការងារស្រ្តីជាអ្នកបើកបរ។ ដើម្បីធ្វើឱ្យអ៊ែប “Cambodia Ride” កាន់តែត្រូវបានគេស្គាល់ និងធ្វើឱ្យមានការអភិវឌ្ឍវិស័យទេសចរណ៍ក្នុងខេត្តសៀមរាប យើងខ្ញុំនឹងជួយផ្សព្វផ្សាយជូនសមាជិកសមាគមសណ្ឋាគារកម្ពុជាឱ្យបានស្គាល់កាន់តែច្រើន។

Ending:

អ៊ែប “Cambodia Ride” ជាក់ស្តែង ត្រូវបានបង្កើត និងសាកល្បងប្រើប្រាស់តាំងពីឆ្នាំ២០២០មកម្លេះ ដោយក្រុមហ៊ុន Nippon Koei Co., Ltd. (ទីស្នាក់ការកណ្តាល៖ សង្កាត់ Chiyoda-ku, ទីក្រុងTokyo) ដែលជាផ្នែកមួយនៃការផ្សព្វផ្សាយទីក្រុងឆ្លាតវៃក្នុងខេត្តសៀមរាប។ ក្រុមហ៊ុន Nippon Koei Co., Ltd. បាននិងកំពុងអភិវឌ្ឍគម្រោងខ្នាតធំ ដែលទាក់ទងនឹងការសាងសង់ និងអភិវឌ្ឍន៍ទីក្រុងឆ្លាតវៃ រួមទាំងគម្រោងផ្លូវដែកជាច្រើនឆ្នាំមកហើយ ប៉ុន្តែអ៊ែប “Cambodia Ride” គឺត្រូវបានបង្កើតឡើងដោយការិយាល័យផ្សព្វផ្សាយ Incubation របស់ក្រុមហ៊ុន ដែលមានឯកទេសក្នុងការអភិវឌ្ឍន៍អាជីវកម្មថ្មី។ ជាចុងបញ្ចប់ យើងខ្ញុំបានសាកសួរលោកនាយក Otsuka អំពីគោលដៅចម្បង ដែលលោកចង់បានពីកម្មវិធីអ៊ែប “Cambodia Ride” នេះ។

«ការបន្តស្ថាបនាផ្លូវទេសចរណ៍មានស្រាប់ដដែលៗសម្រាប់រមណីយដ្ឋានអង្គរ ដែលជាសម្បត្តិបេតិកភណ្ឌពិភពលោក គឺជាបញ្ហាកំពុងប្រឈមមួយព្រោះគ្មានមធ្យោបាយធ្វើដំណើរសមស្រប ដែលនាំឱ្យចំនួនអ្នកទេសចរមកទស្សនាច្រើនលើកមានចំនួនតិចតួច និងការទស្សនាប្រាសាទបុរាណស្ថិតនៅទីតាំងស្ងាត់និងឆ្ងាយ និងមធ្យោបាយថ្មីក្នុងការចូលទៅកាន់ទីរមណីយដ្ឋានថ្មីៗនៅមានកម្រិត។ អ៊ែប “Cambodia Ride” ត្រូវបានបង្កើតឡើងដើម្បីចូលរួមសម្រួលនូវបញ្ហាប្រឈមនេះ។

អ៊ែប “Cambodia Ride” មិនត្រឹមតែធ្វើអោយប្រសើរឡើងនូវសុវត្ថិភាព សន្តិសុខ និងភាពងាយស្រួលក្នុងការធ្វើដំណើរទេសចរណ៍របស់ភ្ញៀវទេសចរប៉ុណ្ណោះទេ យើងខ្ញុំមានគោលដៅធ្វើឱ្យប្រសើរឡើងនូវបរិស្ថានក្នុងខេត្តសៀមរាប ផ្តល់ឱកាសការងារ អភិវឌ្ឍធនធានមនុស្ស ធ្វើឱ្យគោលដៅទេសចរណ៍ទាំងមូលមានភាពឆ្លាតវៃ និងរួមចំណែកដល់ការអភិវឌ្ឍន៍ប្រកបដោយចីរភាពនៅក្នុងតំបន់ជុំវិញ។ យើងខ្ញុំក៏មានគោលដៅភ្ជាប់ទិន្នន័យជាមួយការចល័តផ្សេងទៀត និងសេវាកម្មឌីជីថលនៃអាជីវកម្មទេសចរណ៍ផ្សេងៗ រួមទាំងអនុវត្តយន្តការផ្សេងៗជួយទប់ស្កាត់ការកកស្ទះភ្ញៀវទេសចរណ៍ក្នុងតំបន់ណាមួយ និងធ្វើឱ្យសម្រេចបាននូវគោលដៅអព្យាក្រឹតកាបូន ដើម្បីចូលរួមចំណែកក្នុងការបង្កើតគោលដៅទេសចរណ៍ប្រកបដោយនិរន្តរភាព និងវិបុលភាព។

ដើម្បីសម្រេចបាននូវគោលដៅបែបនេះ ដំបូង យើងត្រូវលើកកំពស់គុណភាព និងខ្លឹមសារនៃសេវាកម្មរបស់យើងជាមុនសិន ដើម្បីឈានទៅដល់កម្រិតដែលឱ្យភ្ញៀវទេសចរស្រឡាញ់ទុកចិត្តនឹងនិយាយថា៖ «នៅខេត្តសៀមរាបមាន “Cambodia Ride” ដែរតើស៎។»

យើងខ្ញុំសុំអនុញ្ញាតបញ្ជាក់ផងដែរថា លោក Kobota Yukata ដែលជាស្ថាបនិកក្រុមហ៊ុន Nippon Koei Co., Ltd. គឺជាវិស្វករជនជាតិជប៉ុនដំបូងគេ ដែលធ្វើការយ៉ាងយកចិត្តទុកដាក់លើការចូលរួមស្តារ និងកសាងប្រទេសកម្ពុជាក្នុងទសវត្សរ៍ឆ្នាំ១៩៥០។ ការយកចិត្តទុកដាក់របស់ស្ថាបនិកយើងខ្ញុំរូបនេះ ក៏ត្រូវបានបន្តមកដល់យើងខ្ញុំបច្ចុប្បន្ននេះផងដែរ។ ដូច្នេះយើងខ្ញុំនឹងធ្វើការយ៉ាងយកចិត្តទុកដាក់លើអាជីវកម្មទេសចរណ៍នៅខេត្តសៀមរាបក្នុងប្រទេសកម្ពុជា។»