មានអតិថិជនជាច្រើនតែងតែចង់បាននូវម្ហូបអាហារដែលមានសុវត្ថិភាពចំពោះសុខភាព។ នៅប្រទេសកម្ពុជាបច្ចុប្បន្ន មានអ្នកប្រើប្រាស់ជាច្រើនកំពុងចាប់អារម្មណ៍ និងជឿជាក់លើកសិផលក្នុងស្រុក ដោយសារមានការព្រួយបារម្ភកាន់តែកើនឡើងចំពោះកសិផលនាំចូលពីក្រៅប្រទេស ដែលប្រើប្រាស់ថ្នាំ និងជីគីមី។ ដើម្បីឆ្លើយតបនឹងតម្រូវការរបស់អតិថិជននាពេលបច្ចុប្បន្ននេះ មានអ្នកស្ម័គ្រចិត្តមួយចំនួនកំពុងធ្វើការជាមួយកសិករនៅមូលដ្ឋាន។ យើងខ្ញុំ បានជួបជាមួយពួកគាត់ ដើម្បីសាកសួរអំពីមូលហេតុនៃការធ្វើសកម្មភាពទាំងនោះ។

ខ្ញុំចង់ឃើញកសិករខ្មែរមានក្តីសង្ឃឹមលើរបរកសិកម្មរបស់គាត់

កញ្ញា UEHATA Ikumi ជាបុគ្គលិកម្នាក់កំពុងបំរើការនៅផ្សារទំនើបអុីអនក្នុងទីក្រុងភ្នំពេញ។ កញ្ញាបានប្រាប់ឱ្យដឹងថា៖ “នាងខ្ញុំដំបូងពិតជាពុំមានចំណាប់អារម្មណ៍អ្វីចំពោះវិស័យកសិកម្ម និងប្រទេសកម្ពុជានោះទេ”។ តែមានថ្ងៃមួយ នៅពេលកំពុងបំរើការក្នុងផ្សារទំនើបអ៊ីអននៅប្រទេសជប៉ុន កញ្ញាត្រូវបានគេផ្លាស់ប្តូរពីការងារជាអ្នកគ្រប់គ្រងការលក់ផលិតផលសំអាងការ ទៅកាន់កន្លែងលក់កសិផលកសិកម្មវិញ។ នាពេលនោះ នៅក្នុងកំឡុងពេលធ្វើការផ្ទាល់ជាមួយកសិករ កញ្ញាបានយល់ឃើញថា វិស័យកសិកម្មជប៉ុនហាក់ដូចជាពិបាកក្នុងការអភិវឌ្ឍអោយប្រសើរជាងនេះ ព្រោះជប៉ុនកំពុងជួបបញ្ហាប្រឈមមួយចំនួនដូចជា៖ ការកើនឡើងនៃចំនួនមនុស្សចាស់ ការជាវផលិតផលកសិកម្មមានការធ្លាក់ចុះ និងការខ្វះនូវចំនួនអ្នកបន្តវេនធ្វើកសិកម្មជាដើម។ ដោយយល់ឃើញពីបញ្ហាទាំងនេះ កញ្ញាបានគិតពីដំណោះស្រាយមួយ ដើម្បីអោយផលិតផលកសិកម្មជប៉ុនអាចមានលទ្ធភាពផ្គត់ផ្គង់ទៅក្នុងទីផ្សារក្រៅប្រទេស។

ក្រោយមក តាមរយៈរបបកម្មសិក្សារបស់ក្រុមហ៊ុនអុីអន កញ្ញាបានមកប្រទេសកម្ពុជានៅឆ្នាំ២០១៦។ ពេលមកដល់កម្ពុជាដំបូងកញ្ញាបានសង្កេតឃើញថា នៅផ្សារទំនើបអ៊ីអននៅកម្ពុជាពេលនោះខុសប្លែកពីផ្សារទំនើបអ៊ីអន ដែលកញ្ញាបានឃើញនៅប្រទេសវៀតណាមឬម៉ាឡេស៊ី ដែលមានប្រជាពលរដ្ឋទូទៅមកទិញឥវ៉ាន់ជាធម្មតា ប៉ុន្តែកាលនោះ នៅប្រទេសកម្ពុជាវិញមានអតិថិជនខ្មែរជាច្រើនបានមកផ្សារអុីអន ដើម្បីតែមើលមុខទំនិញក្នុងហាងតែប៉ុណ្ណោះ។ ដោយឃើញពីស្ថានភាពពិតបែបនេះ កញ្ញាផ្តើមមានចំណាប់អារម្មណ៍ចំពោះការបំពេញការងារនៅកម្ពុជា ដែលជារឿងថ្មីមួយសម្រាប់កញ្ញា តាំងពីពេលនោះមក។ បន្ទាប់ពីហេតុការណ៍នោះកញ្ញាមានការប្រឹងប្រែងក្នុងការងារប្រចាំថ្ងៃរបស់ខ្លួន រាល់ពេលធ្វើការប្រមូលកសិផលពីកសិករខ្មែរ មកដាក់លក់នៅក្នុងផ្សារទំនើបអ៊ីអនរហូតមក។

បេសកកម្មរបស់កញ្ញាគឺការដាក់តម្រៀបផលិតផលកសិកម្មខ្មែរដើម្បីអោយអតិថិជនអាចស្គាល់ពីកសិករ។ កញ្ញាបានថ្លែងដូចនេះថា៖ “កាលពីដំបូង វាពិតជាមានការលំបាកក្នុងការប្រមូលកសិផលដែលមានគុណភាពកំណត់តាមការកុម្ម៉ង់យកមកដាក់តាំងលក់នៅក្នុងហាង ក៏ប៉ុន្តែបច្ចុប្បន្ននេះ មានភាពប្រសើរឡើងច្រើន ព្រោះមានក្រុមហ៊ុនផ្គត់ផ្គង់ជាដៃគូធ្វើការប្រមូលកសិផលពីកសិករដែលមានកិច្ចសន្យាជាមួយក្រុមហ៊ុន”។

នៅក្នុងហាងមានតម្រៀបនូវប្រភេទកសិផលផ្សេងៗ ដែបានបែងចែកតាមស្លាកសញ្ញានិងស្តង់ដារ ទទួលស្គាល់ដោយស្ថាប័នរដ្ឋាភិបាលនិងក្រុមហ៊ុន។ ឧទាហរណ៍ នៅប្រទេសកម្ពុជាមានរបបទទួលស្គាល់វិធាននៃការអនុវត្តកសិកម្មល្អ ក្នុងការងារផលិតកម្មផ្លែឈើនិងបន្លែស្រស់ (ច្បាប់កំណត់ការគ្រប់គ្រងចំការកសិកម្មសុវត្ថិភាពអាហារ ការរក្សាបរិស្ថាន សុវត្ថិភាពការងារ សិទ្ធមនុស្ស និងសុខមាលភាព) ដែលមានឈ្មោះថា Cambodia Good Agricultural Practice (CamGAP)។ ប្រសិនបើកសិករខ្មែរមានការយល់ដឹងអំពីការលក់ផលិតផលត្រូវនឹងស្តង់ដារបែបនេះ កសិករទាំងនោះនឹងធ្វើការស្វែងយល់ពីតម្រូវការទីផ្សារ ហើយពួកគាត់នឹងអាចធ្វើការផលិតដោយយកចិត្តទុកដាក់លើសុវត្ថិភាពកសិផលជាក់ជាមិនខាន។ លើសពីនេះទៀត ការពិតដែលពួកគាត់អាចទទួលបានប្រាក់ចំណូលកើន និងមានចំណូលទៀតទាត់ពីតម្លៃបន្ថែមបែបនោះវានឹងជួយអោយកសិករខ្មែរមានក្តីសង្ឃឹម។ កញ្ញា Ikumi បានបន្តទៀតថា៖ “នៅពេលដែលនាងខ្ញុំធ្វើសកម្មភាពជាអ្នកសម្របសម្រួលរវាងកសិករដែលជាអ្នកផលិតនិងអតិថិជន នាងខ្ញុំបានឮពីកសិករខ្លះនិយាយថា ពួកគាត់ធ្វើកសិកម្មចំណេញជាងមុន ជាដើម។ រឿងរ៉ាវដែលបានជួបនិងឮទាំងនេះ ជាក្តីបំណងនិងជាការលើកទឹកចិត្តមួយសម្រាប់នាងខ្ញុំ ក្នុងការបំពេញការងារនេះរហូតមក”។

សម្រាប់ពត៌មានបន្ថែម ៖

【NyoNyum Khmer No. 39】

(日本語) NyoNyum Khmer 39号は「カンボジア農業について」

Read More

(ភាសាខ្មែរ) បទសម្ភាសន៍ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញនិងពេញសមត្ថភាពជប៉ុនប្រចាំកម្ពុជា

Read More

(ភាសាខ្មែរ) បញ្ហាធំៗចំនួន ៦ នៅក្នុងវិស័យកសិកម្មនៅកម្ពុជា

Read More