ចំណាប់អារម្មណ៍របស់កីឡាករ កីឡាការិនី នៅក្នុងព្រឹត្តិការណ៍អូឡាំពិកតូក្យូ២០២០ កីឡាករ ហែម ប៉ុច

TOP › 未分類 › ចំណាប់អារម្មណ៍របស់កីឡាករ កីឡាការិនី នៅក្នុងព្រឹត្តិការណ៍អូឡាំពិកតូក្យូ២០២០ កីឡាករ ហែម ប៉ុច

2021.11.22

未分類

កីឡាករ ហែម ប៉ុច

វិញ្ញាសាហែលទឹក ៥០ម៉ែត្រ សេរីផ្នែកបុរស

ថេរវេលា៖ ២៤.៩១ លំដាប់ទី៥២

អត្តពលិកជម្រើសជាតិវ័យក្មេង លោក ហែម ប៉ុច (២២ឆ្នាំ) បានផ្ដើមអាជីពជាអ្នកហែលទឹក នៅក្នុងអំឡុងឆ្នាំ២០១៥។ ឆ្លើយតបនឹងទស្សនាវដ្តីញញឹមដែលបានសាកសួរលោកអំពីចំណាប់អារម្មណ៍ចំពោះវត្តមាននៅក្នុងកីឡាអូឡាំពិកតូក្យូ២០២០ កន្លងទៅថ្មីៗនេះ លោកបានថ្លែងពីក្តីរំភើបចិត្ត ដែលបានចូលរួមប្រកួតក្នុងព្រឹត្តិការណ៍ជាប្រវត្តិសាស្រ្តនៅប្រទេសជប៉ុនមួយនេះ។ លោកបានប្រាប់ថា៖ “ខ្ញុំពិតជាមានអារម្មណ៍សប្បាយ និងរំភើបជាខ្លាំង ដែលបានទៅចូលរួមប្រកួតក្នុងព្រឹត្តិការណ៍មួយនេះ ហើយការស្វាគមន៍របស់បងប្អូនជប៉ុន គឺពិតជាធ្វើឱ្យខ្ញុំមានភាពកក់ក្ដៅខ្លាំងណាស់”។

លោក ហែម ប៉ុច ក៏បានចាប់អារម្មណ៍ខ្លាំងលើភាពទាក់ទាញរបស់សណ្ឋាននៃអាងហែលទឹក និងកន្លែងហ្វឹងហាត់ ព្រមទាំងបានស្ងើចសរសើរចំពោះការរៀបចំរបស់ជប៉ុនផងដែរ។ លោកបាននិយាយដោយខ្លីថា៖ “អាងហែលទឹកគឺស្អាតទាក់ទាញ ដែលឃើញហើយធ្វើឱ្យយើងមានចិត្តចង់ប្រកួត។ ហើយពេលឃើញមានបងប្អូនជប៉ុនស្វាគមន៍ និងអមដំណើរ ធ្វើឱ្យខ្ញុំមានអារម្មណ៍ថាខ្លួនឯងជាជនពិសេស។ ចំពោះម្ហូបអាហារវិញ គឺរៀបចំបានយ៉ាងល្អ មានច្រើនមុខ និងមានរសជាតិឆ្ងាញ់”។ ចំពោះចំណេះដឹង និងបទពិសោធន៍ថ្មីដែលលោកទទួលបានពីការចូលរួមនោះគឺ៖ បច្ចេកទេសត្រៀមខ្លួនមុនពេលប្រកួត អេឡង់លោត ឬការលោតដេប៉ាឱ្យបានលឿងជាងគេ របៀបកម្ដៅសាច់ដុំមុនពេលប្រកួត និងបច្ចេកទេសហែល។

កីឡាករ ហែម ប៊ុច ទទួលបាននិទ្ទេសលេខ៤ ដោយបំបែកកំណត់ត្រាល្បឿនចាស់របស់ខ្លួន

សូមបញ្ជាក់ថា លោក ហែម ប៉ុច ធ្លាប់បានចូលរួមក្នុងការហ្វឹកហាត់ដកស្រង់បទពិសោធន៍បច្ចេកទេសហែលទឹកនៅប្រទេសជប៉ុន ក្នុងកម្មវិធី JENESYS 2018។ បច្ចុប្បន្ន លោក ហែម ប៉ុច កំពុងស្ថិតក្នុងកាលៈទេសៈរង់ចាំការជ្រើសរើសពីសំណាក់សហព័ន្ធកីឡាហែលទឹក ក៏ដូចជាគណៈកម្មាធិការជាតិកីឡាអូឡាំពិកកម្ពុជា ដើម្បីចូលរួមការប្រកួតស៊ីហ្គេមដែលកម្ពុជាត្រៀមខ្លួនធ្វើជាម្ចាស់ផ្ទះនាឆ្នាំ២០២៣។ លោកបានប្តេជ្ញាចិត្តដើម្បីធ្វើយ៉ាងណាឱ្យមានសមិទ្ធផលថ្មីដែលល្អជាងមុន។ លោកបានប្រាប់ដូច្នេះថា៖ “ប្រសិនបើខ្ញុំបានប្រកួតនៅស៊ីហ្គេម២០២៣ ខ្ញុំនឹងព្យាយាមពង្រឹងសមត្ថភាពខ្លួន និងធ្វើយ៉ាងណាឱ្យទទួលបានសមិទ្ធផលល្អជាងមុន ដោយបំបែកកំណត់ត្រាចាស់ និងឡើងដល់វគ្គផ្ដាច់ព្រ័ត្រ ឱ្យខានតែបាន”។