សិប្បកម្មធុងបរិស្ថាន ដើម្បីបរិស្ថានរស់នៅស្អាតទាំងអស់គ្នា - NyoNyum - Comprehensive information site of Cambodia travel, sightseeing, souvenirs etc.

សិប្បកម្មធុងបរិស្ថាន ដើម្បីបរិស្ថានរស់នៅស្អាតទាំងអស់គ្នា

TOP › Column › NyoNyum Khmer Special Topics › សិប្បកម្មធុងបរិស្ថាន ដើម្បីបរិស្ថានរស់នៅស្អាតទាំងអស់គ្នា

2022.03.22

ការកែច្នៃសំរាមនៅកម្ពុជា

បើនិយាយដល់ការកែច្នៃសំរាមនៅកម្ពុជាវិញ យើងមិនទាន់ឃើញមានការកែច្នៃសំរាមទ្រង់ទ្រាយធំ ដើម្បីផលិតជាថាមពលសម្រាប់ប្រើប្រាស់នៅឡើយទេ។ ការកែច្នៃសំរាម គឺជាវិធីមួយដ៏សំខាន់ដើម្បីចូលរួមដោះស្រាយបញ្ហាសំរាមដែលកំពុងជួបប្រទេះ។ តាមរបាយការណ៍របស់ក្រសួងបរិស្ថានបានឱ្យដឹងថា សំរាមដែលបានបង្កើតឡើងនៅកម្ពុជាក្នុងមួយថ្ងៃៗមានជាង ១ ម៉ឺនតោន និងជិត ៤ លានតោនក្នុងមួយឆ្នាំ។ សំរាមទាំងនោះមាន ៦៥ ភាគរយជាសំណល់សរីរាង្គ ២០ ភាគរយជាសំណល់ប្លាស្ទិក និងនៅសេសសល់គឺជាសំណល់រឹង និងសំណល់ផ្សេងទៀត។ បច្ចុប្បន្ន មានអង្គការ និងក្រុមហ៊ុនវិនិយោគទុនបរទេសជាច្រើន កំពុងចាប់អារម្មណ៍នឹងការកែច្នៃវិស័យសំរាមនៅទីលានចោលសំរាមខណ្ឌដង្កោ ធ្វើជាថាមពលប្រើប្រាស់។ ទោះជាការកែច្នៃសំរាមគឺជាវិធីមួយដ៏សំខាន់ក្នុងការកាត់បន្ថយបរិមាណសំរាមនៅលើទីលានចោលសំរាមក្តី បច្ចុប្បន្ន គេពុំទាន់ឃើញមានវត្តមានក្រុមហ៊ុនវិនិយោគ ឬអង្គការណាមួយបាននឹងកំពុងធ្វើការកែច្នៃសំរាមឱ្យទៅជាថាមពលប្រើប្រាស់ពិតប្រាកដនៅឡើយទេ។ យ៉ាងណាមិញមានអង្គការ និងសាជីវកម្មឯកជនមួយចំនួនកំពុងចាប់អារម្មណ៍នឹងការកែច្នៃសំរាមមួយចំនួនធ្វើជាវត្ថុប្រើប្រាស់នានាដើម្បីចូលរួមចំណែកកាត់បន្ថយបញ្ហាសំរាមនៅកម្ពុជា។

សិប្បកម្មធុងបរិស្ថាន គឺជាសិប្បកម្មកែច្នៃឡើងវិញនូវសំបកកង់រថយន្តចាស់ៗដែលប្រើការលែងកើត ធ្វើជាធុងសំរាមប្រើប្រាស់នៅទីសាធារណៈ និងឯកជន។ សិប្បកម្មនេះ បានផ្តល់នូវផលចំណេញជាច្រើនដល់ការរស់នៅប្រចាំថ្ងៃរបស់ប្រជាជនគ្រប់ស្រទាប់វណ្ណៈ ហើយវាបានជួយធ្វើឱ្យប្រសើរផងដែរដល់បរិស្ថាន និងការគ្រប់គ្រងសំរាម។ បច្ចុប្បន្ន សិប្បកម្មធុងបរិស្ថាន កំពុងទទួលបានការនិយមគាំទ្រច្រើនពីសំណាក់បងប្អូនប្រជាជនខ្មែរ។

បងស្រី សឿង សុថារី ម្ចាស់សិប្បកម្មធុងបរិស្ថានមានវ័យជាង ៣០ ឆ្នាំ មានស្រុកកំណើតនៅស្រុកព្រៃឈរ ខេត្តកំពង់ចាម ហើយបច្ចុប្បន្ន បងស្រី កំពុងរស់នៅក្នុងរាជធានីភ្នំពេញ។ បងស្រីបានបង្កើតសិប្បកម្មនេះឡើងដំបូងកំឡុងឆ្នាំ២០១០ ដោយចិត្តស្រឡាញ់ និងមានបេះដូងជាអ្នកចង់ចូលរួមក្នុងការជួយការពារបរិស្ថាន។ ប៉ុន្តែក្នុងដំណើរការនៃការចាប់ផ្ដើមអាជីវកម្មនេះ បានជួបនឹងឧបសគ្គច្រើន ជាពិសេសនោះគឺសិប្បកម្មនេះមិនសូវទទួលបានការគាំទ្រពីមហាជននោះទេ។ អាស្រ័យបែបនេះហើយ បងស្រី ក៏បានសម្រេចចិត្តផ្អាក់ដំណើរការមួយរយៈពេលនៅឆ្នាំ២០១៥។

យ៉ាងណាមិញ បងស្រី ក៏មិនបានបោះបង់អាជីពមួយនេះរហូតដែរ។ ដោយចិត្តនៅតែស្រឡាញ់ និងនៅតែចង់ចូលរួមជួយសង្គមខាងផ្នែកនេះ បងស្រី ក៏សម្រេចចាប់ផ្ដើមសិប្បកម្មនេះឡើងវិញម្តងទៀតនៅឆ្នាំ២០១៨។ ដោយក្តីព្យាយាមនិងខិតខំប្រឹងប្រែង មិនយូរប៉ុន្មានផលិតកម្មរបស់បងស្រី ក៏ទទួលបានការគាំទ្រពីសំណាក់ប្រជាជន ហើយបានធ្វើឱ្យធុងបរិស្ថានរីកសាយការប្រើប្រាស់ជាហូរហែ។ សិប្បកម្មធុងបរិស្ថានរបស់បងស្រី សុថារីមានដូចជា៖ ធុងសំរាម ផើងផ្កា កៅអីជាឈុត រូបសត្វ និងមានការទទួលកម៉្មង់តាមតម្រូវចិត្តភ្ញៀវមួយចំនួនផងដែរ។ ចំពោះបច្ចេកទេសនៃការផលិតវិញ រាល់សិប្បករ ឬកម្មករ ដែលបម្រើការនៅសិប្បកម្មធុងបរិស្ថាន គឺសុទ្ធតែឆ្លងកាត់ការហ្វឹកហាត់យ៉ាងស្ទាត់ជំនាញ់ពីប្រធានផ្នែក។ ប៉ុន្តែចំពោះការងារនេះ បងស្រីបានបញ្ជាក់បន្ថែមដូច្នេះថា៖ “ការធ្វើធុងបរិស្ថានពីកង់ឡាននេះ តម្រូវឱ្យសិប្បករតស៊ូ និងអត់ធ្មត់ខ្លាំង និងទាមទារឱ្យកម្មករគ្រប់រូបយកចិត្តដាក់ខ្ពស់ទៅលើតួនាទីរបស់ខ្លួន ព្រោះរាល់ផលិតផលសុទ្ធតែធ្វើដោយដៃ បើប្រហែសនឹងចៀរវៀច ឬមានគ្រោះថ្នាក់ដល់ពួកគាត់ ហើយផលិតផលដែលចៀរវៀច ឬមានបញ្ហាក៏មិនអាចលក់ចេញបានដែរ”។ ជាលទ្ធផលក្នុងការខិតខំប្រឹងប្រែងរបស់បងស្រី និងសហការីនៃសិប្បកម្មនេះ ធុងបរិស្ថានទទួលបានការគាំទ្រច្រើនឡើងពីក្រសួងបរិស្ថាន អង្គការ ស្ថាប័នឯកជន មន្ទីរបរិស្ថានតាមបណ្តារខេត្ត និងប្រជាពលរដ្ឋជាវប្រើតាមផ្ទះ និងក្នុងគម្រោងសប្បុរសធម៌ផ្សេងៗជាដើម។ មកទល់បច្ចុប្បន្ននេះ សិប្បកម្មរបស់បងស្រីមមារញឹកច្រើន ដ្បិតតម្រូវការប្រើប្រាស់ធុងបរិស្ថានពីសំណាកប្រជាពលរដ្ឋមានការកើនឡើង។ ក្នុងនោះផងដែរ បងស្រី ក៏ទទួលបានគម្រោងមួយរវាងកិច្ចសហការក្រសួងបរិស្ថាន និងអង្គការ UNDP ដែលក្នុងគម្រោងនេះ បងស្រី ត្រូវទទួលបន្ទុកផ្គត់ផ្គង់ធុងសម្រាមក្នុងសាលារៀន៨០កន្លែង សម្រាប់៧ខេត្តក្រុង។ ចំពោះតម្លៃធុងបរិស្ថាននេះវិញ បងស្រី បានបញ្ជាក់ដូច្នេះថា៖ “ធុងសម្រាមច្នៃពីសំបកកង់ឡានមួយមានតម្លៃ ១០ម៉ឺនរៀន ហើយច្រើនឆ្នាំទៅមុខទៀតក៏មិនមានការចុះថ្លៃ ឬឡើងថ្លៃនោះទេ គឺលក់ក្នុងតម្លៃនេះដដែល”។

បងស្រី សុថារី បានរំឭកថា “សិប្បកម្មធុងបរិស្ថាន ដំបូងឡើយគឺមិនមានដៃគូសហការណាមួយចូលរួមចំណែកឡើយ ប៉ុន្តែមកទល់ពេលនេះ ដោយក្រសួងបរិស្ថានបានមើលឃើញពីកិច្ចខិតខំប្រឹងប្រែងមួយនេះ បានផ្ដល់ជាប័ណ្ណសរសើរជាប្រតិបត្តិករគំរូ និងលើកទឹកចិត្តឱ្យបន្តសិប្បកម្មនេះបន្តទៀត។ ក្រៅពីនេះ សុទ្ធសឹងតែជាការខិតខំប្រឹងប្រែងរបស់ពួកយើងទាំងស្រុង ហើយចំពោះគម្រោងជំនួយធំៗ ពួកយើងមិនទាន់ទទួលបានគម្រោងណាមួយនៅឡើយទេ។ បច្ចុប្បន្ននេះបើទោះបីជា យើងបានដើរមកឆ្ងាយពីអតីតកាល និងមានការនិយមគាំទ្រផលិតផលរបស់យើងច្រើនក៏ដោយ តែសង្វាក់ផលិតផលរបស់យើងនៅមានកម្រិតនៅឡើយ”។ ទោះជាបែបនេះក្ដី ក៏បងស្រីមិនមានបំណងបោះបង់អាជីពនេះជាលើកទី២ដែរ ដ្បិតសិប្បកម្មនេះ មិនមែនផ្តោតសំខាន់តែការលក់ផលិតផលនោះទេ ប៉ុន្តែវាជាផ្នែកមួយក្នុងការជួយសង្គមបរិស្ថាន និងនាំឱ្យប្រជាពលរដ្ឋចេះទុកដាក់សំរាម។

ចក្ខុវិស័យនាថ្ងៃអនាគតរបស់បងស្រី គឺមិនមែនត្រឹមតែការលក់ផលិតផលឱ្យបានច្រើននោះទេ ប៉ុន្តែបងស្រី ក៏កំពុងព្យាយាមបណ្ដុះបណ្ដាល និងផ្សព្វផ្សាយទៅកាន់សាធារណៈជនផងដែរ តាមរយៈសិក្ខាសាលា វេទិកាសាធារណៈ ដើម្បីពន្យល់ណែនាំទៅដល់ប្រជាជនឱ្យចូលរួមថែទាំបរិស្ថាន។ ទន្ទឹមនឹងនេះនាថ្ងៃខាងមុខ បងស្រីសង្ឃឹមថា សិប្បកម្មនេះនឹងទទួលបានជំនួយពីស្ថាប័ន ឬក្រុមហ៊ុនវិនិយោគណាមួយ ដែលមានបំណងចូលរួមចំណែកធ្វើឱ្យប្រសើរឡើងនូវបរិស្ថាន។ មួយវិញទៀត បងស្រីក៏មានបំណងពង្រីកទីផ្សារលក់ឱ្យប្រសើរជាងនេះនៅក្នុងស្រុក និងទៅកាន់ទីផ្សារបរទេសផងដែរ៕

សម្រាប់ពត៌មានបន្ថែម

【NyoNyum Khmer No. 50】