ភិក្ខុ លន សុជាតិ (២៣វស្សា)

គង់នៅវត្តសារាវ័ន្ត បានបួសជាព្រះសង្ឃរយៈពេល ១០វស្សា បច្ចុប្បន្ន សិក្សាជំនាញរដ្ឋបាលអប់រំ ឆ្នាំទី៣ នៅពុទ្ធិកសាកលវិទ្យាល័យព្រះសីហនុរាជ។ ព្រះអង្គបានមានសង្ឃដីកាអំពីមូលហេតុ នៃការជ្រើសរើសសាកលវិទ្យាល័យនេះ និងមុខជំនាញការងារសម្រាប់ខ្លួននាពេលអនាគតយ៉ាងដូច្នេះថា៖ «ដោយសារពុទ្ធិកសាកលវិទ្យាល័យព្រះសីហនុរាជនេះបានផ្តល់នូវអាហារូបករណ៍ ១០០% និងមានមុខវិជ្ជាជំនាញផ្នែករដ្ឋបាលអប់រំ ដែលអាត្មាចង់សិក្សា និងដោយសារទីនេះក៏ជាសាកលវិទ្យាល័យសម្រាប់សង្ឃផងដែរនោះ ដូច្នេះអាត្មាក៏សម្រេចចិត្តមកសិក្សានៅទីនេះតែម្តងទៅ។ ម្យ៉ាងទៀត ដោយអាត្មាចូលចិត្តការបង្រៀន ហើយចាប់អារម្មណ៍នឹងការគ្រប់គ្រងផ្នែករដ្ឋបាលផង អាត្មាគិតថាបន្ទាប់ពីរៀនចប់ អាត្មាអាចជួយជាការងារបង្រៀនស្ម័គ្រចិត្តនៅវត្ត និងស្នើសុំការងារជាបុគ្គលិកផ្នែកការិយាល័យគ្រប់គ្រងក្នុងវត្ត»។

យុវសិស្ស សុខ ចាន់គន្ទី (២២ឆ្នាំ)

សិក្សាផ្នែកគ្រប់គ្រងទូទៅ ឆ្នាំទី១ នៅពុទ្ធិកសាកលវិទ្យាល័យព្រះសីហមុនីរាជា។ បានសម្រេចចិត្តមកសិក្សានៅសាកលវិទ្យាល័យនេះ តាមការណែនាំរបស់បងប្រុសខ្លួន និងដោយបានទទួលអាហារូបករណ៍ ១០០% ពីសាកលវិទ្យាល័យផង។ ក្រោយពីរៀនចប់យុវសិស្ស ចាន់គន្ទី ថានឹងស្វែងរកការងារធ្វើនៅទីក្រុងភ្នំពេញមួយរយៈ ហើយត្រឡប់ទៅបំពេញការងារណាមួយដែលសមស្របនៅឯស្រុកកំណើតរបស់ខ្លួននៅខេត្តសីហនុវិញ។

យុវតី គន់ ស្រីការ (១៩ឆ្នាំ)

មានស្រុកកំណើតនៅខេត្តកំពត សិក្សាផ្នែកគ្រប់គ្រងទូទៅ ឆ្នាំទី១ នៅពុទ្ធិកសាកលវិទ្យាល័យព្រះសីហមុនីរាជា។ កញ្ញា ស្រីការ ៖ «ដោយសារជីវភាពគ្រួសារពុំអាចផ្គត់ផ្គង់ថ្លៃសិក្សាបាន ខណៈនាងខ្ញុំមានបងស្រីម្នាក់កំពុងសិក្សានៅសាកលវិទ្យាល័យឯកជនមួយនៅក្នុងរាជធានីភ្នំពេញហើយនោះ ទើបនាងខ្ញុំសម្រេចចិត្តមកសិក្សានៅសាកលវិទ្យាល័យនេះ ព្រោះទទួលបានអាហារូបករណ៍ពេញ ១០០%។ បន្ទាប់ពីរៀនចប់ នាងខ្ញុំមានបំណងស្វែងរកការងារធ្វើនៅភ្នំពេញ»។

គួររំឭកដែរថា តាមរយៈរបាយការណ៍ពីអ្នកនាំពាក្យក្រសួងធម្មការ និងសាសនា បានឱ្យដឹងថា បច្ចុប្បន្ន នៅកម្ពុជាមានវត្តចំនួនជាង ៥១០០វត្ត ហើយព្រះសង្ឃមានចំនួន ៧០៩០០អង្គ។ ចំពោះវិស័យអប់រំផ្នែកព្រះសង្ឃវិញ គឺមានសាលាពុទ្ធិកបឋមសិក្សា ចំនួនជាង ៩៦០កន្លែង ដែលមានសិស្សសមណសិស្សជាង ២៤០០រូប/អង្គ សាលា ពុទ្ធិកមធ្យមសិក្សាបមឋភូមិមានចំនួន ៣៩កន្លែង មានសិស្ស-សមណសិស្សជាង ៦៣០០រូប/អង្គ សាលាពុទ្ធិកមធ្យមសិក្សាទុតិយភូមិមាន ១៣កន្លែង មានសិស្ស -សមណសិស្សជាង២៣០០រូប/អង្គ ពុទ្ធិកសាកលវិទ្យាល័យថ្នាក់បរិញ្ញាបត្រមាន ៥ កន្លែង និងមាននិស្សិត-សមណនិស្សិត ៣៧០០រូប/អង្គ និងពុទ្ធិកសាកលវិទ្យាល័យថ្នាក់បរិញ្ញាបត្រជាន់ខ្ពស់មាន ៥កន្លែង មាននិស្សិត-សមណនិស្សិតជាង ៧៩០រូប/អង្គ៕

សម្រាប់ពត៌មានបន្ថែម
【NyoNyum Khmer No. 54】

តើត្រូវធ្វើដូចម្តេចដើម្បីក្លាយជាព្រះសង្ឃ ហើយព្រះសង្ឃមានការអប់រំយ៉ាងដូចម្តេចខ្លះ?

ការអប់រំរបស់ព្រះសង្ឃ