ណុប​ វិសាល បានរស់នៅនិងសិក្សានៅប្រទេសជប៉ុនពីឆ្នាំ២០១០ដល់២០១៨

នៅក្នុងការចុះផ្សាយលើកនេះ វិសាលនឹងនិយាយអំពីការថតរូបអនុស្សាវរីយមុនអាពាហ៍ពិពាហ៍នៅប្រទេសជប៉ុន បន្ទាប់ពីរូបលោកបានជួបនារីខ្មែរម្នាក់ ក្នុងកំឡុងពេលសិក្សានៅប្រទេសជប៉ុន និងក្រោយមកបានរៀបអាពាហ៍ពិពាហ៍ជាមួយនាង។

​តូក្យូជាទីក្រុងដែលយើងទាំងពីរបានជួបគ្នាដំបូង

យើងបានជួបគ្នានៅប្រទេសជប៉ុននាចុងឆ្នាំ២០១៧។ នាងបានមកប្រទេសជប៉ុនដើម្បីដឹកនាំនិងធ្វើការសំដែងរបាំសហសម័យកម្ពុជា។ កាលនោះក្នុងនាមជាអ្នកបកប្រែម្នាក់ ខ្ញុំបានទៅកាន់រោងល្ខោនដែលនាងសំដែង ហើយបានជួបធ្វើការជាមួយនាង ដែលជាអ្នកដឹកនាំការសំដែងរបាំនោះ។ ការសំដែងនោះ បានធ្វើឡើងនៅឯរោងល្ខោនមួយនៅសង្កាត់ Koenji នៃទីក្រុង Tokyo។

រោងល្ខោន ZA-KOENJI Public Theater ជាកន្លែងដែលយើងបានជួប និងធ្វើការជាមួយគ្នាជាលើកដំបូង។ ក្រោយពីបានស្គាល់គ្នារយៈពេលជាង៣ខែរួចមក យើងក៏បានសំរេចចិត្តសុំឪពុកម្តាយរបស់យើងទាំងពីរភ្ជាប់ពាក្យនឹងគ្នា។ បន្ទាប់ពីបានប្រារព្ធពិធីភ្ជាប់ពាក្យជាលក្ខណៈប្រពៃណីខ្មែរនៅប្រទេសកម្ពុជារួចមក យើងក៏បានសំរេចចិត្តជ្រើសរើសយកទីក្រុងតូក្យូ ដើម្បីថតរូបអនុស្សាវរីយសំរាប់អាពាហ៍ពិពាហ៍របស់យើង។ តូក្យូជាទីក្រុងដែលមានតំបន់ទេសចរស្អាតៗជាច្រើនសំរាប់ទស្សនា ជាពិសេសនៅរដូ​វផ្ការីក។​ យើងបានសំរេចចិត្តជ្រើសរើសយកទីប្រជុំជន Asakusa ដែលជាទីប្រជុំជនដ៏ចំណាស់និងល្បីល្បាញ​ ហើយក៏មានប្រជាប្រិយភាពមួយក្នុងទីក្រុងតូក្យូផងដែរ ដើម្បីថតរូបអនុស្សាវរីយមុនអាពាហ៍ពិពាហ៍។

នាចុងខែមិនាដើមរដូវផ្ការីកឆ្នាំ២០១៨ យើងបានទូរស័ព្ទទៅកាន់ហាង Studio មួយកន្លែងនៅតំបន់ Asakusa ដើម្បីកក់ណាត់ថ្ងៃថត។ បន្ទាប់ពីតុបតែងនិងស្លៀកពាក់សំលៀកបំពាក់អាពាហ៍ពិពាហ៍ប្រពៃណីជប៉ុនហៅថា Kimono រួចមក យើងត្រូវបានណែនាំឲ្យដើរឆ្លងកាត់ និងថតរូបនៅឯវត្តដ៏ចំណាស់ និងល្បីល្បាញមួយឈ្មោះ Sensoji ហើយដើរឆ្ពោះទៅកាន់ដងស្ទឹង Sumida ដែលនៅជិតនោះ។

នៅតាមបណ្តោយដងស្ទឹង Sumida នោះ ​មានដើមផ្កាសាគូរ៉ារីកស្គុះស្គាយជាច្រើនដុះតម្រង់ជួរគ្នា ដែលទាក់ទាញទាំងភ្ញៀវទេសចរជប៉ុន និងបរទេសយ៉ាងច្រើនកុះករមកទស្សនា។ អមទៅដោយភ្ញៀវទេសចរជាច្រើននោះ ជាងថតរូបជប៉ុនម្នាក់ រួមជាមួយនឹងសហការីស្រ្តីម្នាក់ដែលជាអ្នកតុបតែងរបស់គាត់ បានជួយរៀបចំនិងខិតខំផ្តិតយករូបភាពល្អៗនៃផ្កាសាគូរ៉ានិងរូបយើងទាំងពីរនាក់។

នៅមុខវត្ត Sensoji

ការជ្រើសរើសយកការទស្សនាទីក្រុងតូក្យូក្នុងកំឡុងពេលផ្ការីក ជាជម្រើសមួយដ៏ល្អសំរាប់ពួកយើង។ អមទៅដោយផ្កាសាគូរ៉ារីកយ៉ាងស្គុះស្គាយនៅស្ទើរគ្រប់ទីកន្លែង និងអាកាសធាតុត្រជាក់ល្មម (ប្រហែលពី១៥ទៅ២០អង្សាសេ) បានផ្តល់បន្ថែមនូវអនុស្សាវរីយដ៏ល្អថែមទៀត សំរាប់ការជួបរបស់ពួកយើង។ យើងជឿជាក់ថា ការថតរូបអនុស្សាវរីយមុនអាពាហ៍ពិពាហ៍រួមគ្នាជាមួយផ្កាសាគូរ៉ា   នឹងនាំមកនូវសុភមង្គលនិងការចាប់ផ្តើមថ្មីហើយល្អៗមកដល់ពួកយើងទាំងពីរនាក់៕

Note:

◆ព័ត៌មានទាក់ទងនិងការថតរូបនៅ Studio ខាងលើ សូមស្វែងរកនៅក្នុងលីងខាងក្រោម：

【Studio AQUA Asakusa】

https://d-weddingphoto.com/studios/studio-aqua-asakusa/

• ចំណាយពេល៖ ពី២ទៅ៣ម៉ោង

• ថ្លែសេវ៉ាកម្ម៖ ពី$៧០០～

NyoNyum Khmer No.35

(日本語) 最新号は「日本のスイーツ」特集！NyoNyum Khmer35号を発行しました

Read More

រីករាយជាមួយការចាប់ផ្តើមសិក្សាភាសាជប៉ុន និងសកម្មភាពផ្សេងៗក្នុងសាលា! OISCA High School ដែលពេញលេញ តាមស្តង់ដាអន្តរជាតិ

Read More

(ភាសាខ្មែរ) នំប្រពៃណីនិងរដូវទាំង ៤ របស់ប្រទេសជប៉ុន 【Special】

Read More

(ភាសាខ្មែរ) 【Japan View】ពិធីបុណ្យដែលមានឥទ្ធិពលខ្លាំងក្លាស្នងពីសម័យកាលមួយទៅសម័យកាលមួយ

Read More

(ភាសាខ្មែរ) បង្ហើបពីគន្លឹះនៃការត្រៀមប្រកួតកីឡាតូក្យូអូឡាំពិកដែលប្រារព្ធឡើងនាឆ្នាំក្រោយ សំរាប់កីឡាស៊ីហ្គេមនៅកម្ពុជាឆ្នាំ 2023

Read More