ការរីកចម្រើននៃការបង្រៀនតាមបែបឌីជីថលក្នុងវិស័យឯកជន - NyoNyum - Comprehensive information site of Cambodia travel, sightseeing, souvenirs etc.

ការរីកចម្រើននៃការបង្រៀនតាមបែបឌីជីថលក្នុងវិស័យឯកជន

TOP › Column › NyoNyum Khmer › ការរីកចម្រើននៃការបង្រៀនតាមបែបឌីជីថលក្នុងវិស័យឯកជន

2021.07.26

E-School Cambodia ជាកម្មវិធីបង្រៀនគួរពីចម្ងាយ ឬអាចហៅបានម៉្យាងទៀតថា ជាសាលាបង្រៀនគួរតាមប្រព័ន្ធអនឡាញ។ សាលាបង្រៀនគួរតាមប្រព័ន្ធអនឡាញនេះ បានបង្កើតឡើងនៅក្នុងឆ្នាំ២០១៧ ដោយស្ថាបនិកឈ្មោះលោក ឈន ឈុនឡេង ជាជនជាតិខ្មែរ។ ក្នុងគោលបំណងអភិវឌ្ឍវិស័យអប់រំតាមបែបឌីជីថល ដើម្បីជួយសម្រួលដល់ការសិក្សារបស់សិស្សានុសិស្សដែលមានគោលបំណងចង់ពង្រឹងសមត្ថភាពរបស់ខ្លួន តាមរយៈការរៀនពីខ្សែវីដេអូជាច្រើនពីសំណាក់សាស្រ្តាចារ្យល្បីៗដូចជាសាស្រ្តាចារ្យ ជ័យ ថាវី ផ្នែកគីមីវិទ្យា ឡុង សារិន ផ្នែកអក្សរសាស្រ្តខ្មែរ ម៉ៅ វណ្ណនី ផ្នែកជីវវិទ្យា ទាង ប៉ាង ផ្នែករូបវិទ្យា និងលោកសាស្រ្តាចារ្យ សុខធី ផ្នែកគណិតវិទ្យា រួមទាំងលោកគ្រូ អ្នកគ្រូមួយចំនួនទៀតដែលមានបទពិសោធន៍ និងចំណេះដឹងទូលំទូលាយ។

E-School Cambodia ជាកម្មវិធីសិក្សាមួយដែលឈានមុខគេនៅប្រទេសកម្ពុជា។ ដោយហេតុថា កម្មវិធីនេះមានលក្ខខណ្ឌពិសេសប្លែកពីកម្មវិធីសិក្សាអនឡាញដទៃត្រង់ថា មានសហស្ថាបនិកដែលជាសាស្រ្តាចារ្យល្បីៗថ្នាក់ជាតិដោយមានការទទួលស្គាល់ពីក្រសួងអប់រំ យុវជន និងកីឡា បានចូលរួមជួយជ្រោមជ្រែងផ្តល់ជាចំណេះដឹងទូទៅ ដែលធ្វើអោយកម្មវិធីនេះទទួលបានទំនុកចិត្តពីសិស្សានុសិស្សទូទាំងប្រទេសកម្ពុជា។ ទាក់ទងនឹងកម្មវិធី E-School នេះទៀតសោត គឺមានមុខងារ និងតួនាទីច្រើន ធ្វើអោយងាយស្រួលក្នុងការសិក្សា ព្រមទាំងមានភាពទាក់ទាញមិនងាយធុញទ្រាន់។ កម្រិតវីដេអូវិញ មានគុណភាពខ្ពស់ និងច្បាស់ត្រជាក់ភ្នែក ជាពិសេសសិស្សានុសិស្សអាចទាញយកហ្វាល់ឯកសារ និងអានបានដោយសេរីនូវសៀវភៅមេរៀនផ្សាយដោយក្រសួងអប់រំ យុវជន និងកីឡាជាច្រើន។ លក្ខណៈពិសេសជាងគេមួយទៀតនោះគឺ នៅក្នុងកម្មវិធីនេះមានថ្នាក់បំប៉នសម្រាប់សិស្សានុសិស្សណាដែលមានសមត្ថភាពខ្សោយខ្លាំង ហើយព្រមទាំងមានការធានាពីសាលាថា “អ្នកណាៗក៏អាចរៀនចេះបានដែរ”។

ក្នុងកម្មវិធីសិក្សានេះ មានចាប់ពីកម្រិតបឋមសិក្សារហូតដល់មធ្យមសិក្ស ពោលគឺចាប់ពីថ្នាក់ទី១ រហូតដល់ថ្នាក់ទី១២ ដោយមានរួមបញ្ចូលមុខវិជ្ជាសំខាន់ៗដូចជា អក្សរសាស្ត្រខ្មែរ គណិតវិទ្យា គីមីវិទ្យា រូបវិទ្យា ជីវវិទ្យា និងប្រវត្តិវិទ្យាជាដើម។ បច្ចុប្បន្ន សាលាគួរតាមអនឡាញខាងលើ បានយកចិត្តទុកដាក់ខ្លាំងទៅលើការផលិតវីដេអូបង្រៀនចាប់ពីកម្រិតថ្នាក់អនុវិទ្យាល័យឡើងទៅ ដើម្បីឆ្លើយតបទៅនឹងតម្រូវការរបស់សិស្សានុសិស្សដែលពិបាកក្នុងការមករៀននៅក្នុងថ្នាក់ផ្ទាល់ ដោយសារស្រុកទេសកំពុងទទួលរងការឆ្លងរីករាលដាលជំងឺកូវីដ១៩។

កម្មវិធីសិក្សានេះ ជាមធ្យោបាយមួយដ៏ល្អសម្រាប់សិស្សានុសិស្សបំប៉នចំណេះដឹង និងពង្រឹងសមត្ថភាពដើម្បីត្រៀមប្រឡងថ្នាក់មធ្យមសិក្សាទុតិយភូមិ។ សិស្សានុសិស្សគ្រប់រូប ទាំងអ្នកនៅក្នុងរាជធានីភ្នំពេញ និងបណ្តាខេត្តនានា ក៏អាចមានឱកាសរៀនបានដូចគ្នា ដោយគ្រាន់តែបង់ប្រាក់ប្រមាណ១៥ដុល្លា សម្រាប់មុខវិជ្ជាសិក្សាមួយមុខដែលសិស្សអាចរៀនបានដោយខ្លួនឯងរហូតចាប់ពី ៥០ ទៅ ១០០ មេរៀនឯណោះ ហើយមិនមែនសម្រាប់តែសិក្សានុសិស្ស អនុវិទ្យាល័យ និងវិទ្យាល័យតែប៉ុណ្ណោះទេសូម្បីតែនិស្សិត និងបេក្ខជន ដែលមានបំណងចង់ប្រឡងចូលរៀននៅសាកលវិទ្យាល័យ ឬស្ថាប័នរដ្ឋមួយចំនួន ក៏ជ្រើសរើសកម្មវិធីសិក្សានេះ ដើម្បីពង្រឹងសមត្ថភាពខ្លួនឯងបានដែរ។
សម្រាប់ពត៌មានបន្ថែម

【NyoNyum Khmer No. 46】

ការរីកចម្រើននៃការបង្រៀនតាមបែបឌីជីថលក្នុងវិស័យឯកជន