(ភាសាខ្មែរ) បទសម្ភាសន៍ អ្នកស្រាវជ្រាវ ម្ហូបខ្មែរ បងស្រី ណាក់ ”ប្រហុកជាគ្រឿងផ្សំពុំអាចខ្វះបាននៅក្នុងម្ហូបខ្មែរ”

TOP › Column › NyoNyum Khmer › (ភាសាខ្មែរ) បទសម្ភាសន៍ អ្នកស្រាវជ្រាវ ម្ហូបខ្មែរ បងស្រី ណាក់ ”ប្រហុកជាគ្រឿងផ្សំពុំអាចខ្វះបាននៅក្នុងម្ហូបខ្មែរ”

2021.03.29

អំពីបងស្រី ណាក់៖

ជាអ្នកស្រាវជ្រាវអំពីម្ហូបខ្មែរ។ បានបោះពុម្ភផ្សាយសៀវភៅ “NHUM” នៅឆ្នាំ ២០១៩ ។ មានបង្កើតកម្មវិធីចម្អិនម្ហូប ហើយធ្វើការចែកចាយនៅលើប្រព័ន្ធផ្សព្វផ្សាយសង្គម SNS ក៏ដូចជាមានបើកថ្នាក់ចម្អិនម្ហូប និងភោជនីយដ្ឋានឯកជន ព្រមទាំងមានដំណើរកម្សាន្តតាមទីផ្សារនានាជាដើមផងដែរ។

NHUM -recipes from a Khmer Home Kitchen

សៀវភៅចម្អិនម្ហូបខ្មែរដែលមានមុខម្ហូបប្រមាណ ៨០ មុខ និងមានកម្រាស់ជាង ២០០ ទំព័រ។ មានដាក់លក់ជាភាសាខ្មែរ និងភាសាអង់គ្លេស។ មានដាក់លក់ផងដែរនៅក្នុងហាងញញឹម (Nyonyum Shop) (សាខាទួលទំពូង)

សំណួរៈ តើមូលហេតុអ្វីនាំឱ្យអ្នកប្រែក្លាយជាអ្នកស្រាវជ្រាវអំពីម្ហូបខ្មែរ ដែលនៅមានចំនួនតិចតួចនៅឡើយនៅកម្ពុជានាពេលបច្ចុប្បន្ន?

តាមពិតទៅ ដើមឡើយនាងខ្ញុំចូលចិត្តចម្អិនអាហារ ក៏ប៉ុន្តែនាងខ្ញុំបានធ្វើការងារផ្សេងរហូតមកអស់មួយរយៈ។ ទើបក្រោយមក នាងខ្ញុំមើលឃើញថាម្ហូបអាហារទាក់ទងនឹងវប្បធម៌ និងប្រពៃណីរបស់ខ្មែរ ទើបនាងខ្ញុំងាកមកចាប់អារម្មណ៍នឹងការងារនេះវិញម្តង។ ទាំងពេលសម្រេចចិត្តពេលនោះ និងឥឡូវនេះគឺនៅដដែល គឺថានាងខ្ញុំនៅតែចង់ថែរក្សា និងពង្រីកនូវវប្បធម៌ និងសិល្បៈខ្មែរ ដើម្បីជាស្ពានសម្រាប់អនាគតមួយ ដែលអាចឱ្យយើងនិយាយពីប្រទេសរបស់យើង និងមានមោទនភាពចំពោះខ្លួនយើងជាខ្មែរ។ វប្បធម៌នៅក្នុងប្រទេសនីមួយៗតែងតែមានការផ្លាស់ប្តូរ និងប្រែប្រួលទៅតាមសម័យកាល និងដោយសារឥទ្ធិពលនៃវប្បធម៌បរទេសជាដើម។ ក៏ប៉ុន្តែនៅប្រទេសកម្ពុជា ដោយទទួលរងនូវផលប៉ះពាល់យ៉ាងខ្លាំងដោយសារសង្គ្រាម បានធ្វើឱ្យយើងបាត់បង់នូវអ្វីៗជាច្រើន។ ស្ថិតនៅក្នុងកាលៈទេសៈបែបនេះ នាងខ្ញុំបានមើលឃើញពីតម្លៃនៃម្ហូបអាហារដែលចាំបាច់សម្រាប់ជីវភាពរស់នៅប្រចាំថ្ងៃរបស់យើង។ដូច្នេះនាងខ្ញុំគិតថាការថែរក្សា និងផ្សព្វផ្សាយនូវមុខម្ហូបខ្មែរគឺពិតជារឿងសំខាន់សម្រាប់អ្នកជំនាន់ក្រោយ ហើយវាជាទំនួលខុសត្រូវមួយចំពោះយើងខ្ញុំឥឡូវនេះ ។

ជាទូទៅនាងខ្ញុំតែងតែចូលចិត្តចែករំលែកនូវរឿងរ៉ាវ និងធ្វើការប្រាស្រ័យទាក់ទងជាមួយអ្នកដទៃ ដូច្នេះការងារបច្ចុប្បន្ននេះស័ក្ដិសមនឹងនាងខ្ញុំច្រើនជាងការងារធ្វើជាចុងភៅដែលត្រូវនៅក្នុងផ្ទះបាយ។

សំណួរ៖ ក្នុងនាមជាអ្នកស្រាវជ្រាវអំពីម្ហូបខ្មែរ និងជាជនជាតិខ្មែរផងដែរនោះ តើប្រហុកសំខាន់ដូចម្តេចខ្លះចំពោះម្ហូប និងសម្រាប់ជនជាតិខ្មែរ?

ប្រហុកជាគ្រឿងផ្សំមួយដែលពុំអាចខ្វះបានសម្រាប់ម្ហូបខ្មែរ។ ជាពិសេសនៅតាមតំបន់ជនបទវាជាប្រភពនៃអាហារូបត្ថម្ភមួយដ៏សំខាន់នៅក្នុងរដូវប្រមូលផលពីស្រែចំការ ហើយជាការពិតណាស់ខ្មែរយើងមានការកែច្នៃម្ហូបជាច្រើនចេញពីប្រហុកនេះ។ ដូច្នេះ នាងខ្ញុំចាប់អារម្មណ៍ខ្លាំងលើការស្វែងយល់ពីរសជាតិនិងវិធីចម្អិនខុសៗគ្នាទាំងនោះអាស្រ័យទៅតាមតំបន់នីមួយៗ។

នាងខ្ញុំមានមីងម្នាក់រស់នៅជនបទដែលមានចម្ងាយប្រហែល ៥០ គីឡូម៉ែត្រពីទីក្រុងភ្នំពេញ កាលនាងខ្ញុំមានអាយុ ប្រមាណ ៦-៧ ឆ្នាំ នាងខ្ញុំចាំថាបានទៅលេងនិងស្នាក់នៅទីនោះ។ ក្រោយមកមីងខ្ញុំបានដឹកកង់ជូននាងខ្ញុំត្រឡប់មកផ្ទះវិញ ដោយដាក់ឱ្យនាងខ្ញុំអង្គុយនៅក្នុងអង្រឹងក្រម៉ាចងនឹងដៃកង់នោះ។ ពេលខ្ញុំត្រឡប់មកផ្ទះវិញភ្លាម ម្តាយខ្ញុំសួរខ្ញុំថា “ម៉េចហើយ?” ហើយនាងខ្ញុំបានឆ្លើយថា៖ “ខ្ញុំញ៉ាំប្រហុក” ព្រោះក្នុងកំឡុងពេលស្នាក់នៅនោះ នាងខ្ញុំចាំបានថាមីងគាត់ធ្វើម្ហូបប្រហុកឱ្យញុំាស្ទើរាល់ថ្ងៃ ហើយនេះជាអនុស្សាវរីយមួយដែលពុំអាចភ្លេចបានចំពោះនាងខ្ញុំនិងប្រហុក។

នាងខ្ញុំរស់នៅជាមួយកូនពីរនាក់ ហើយយើងតែងតែធ្វើម្ហូបខ្មែរដែលប្រើប្រហុកជាប្រចាំផងដែរ។ ទោះញុំាឬពុំញុំាជាជម្រើសរបស់ពួកគេ ប៉ុន្តែអ្វីដែលសំខាន់នោះគឺនាងខ្ញុំចង់ឱ្យពួកគេចងចាំពីឫសគល់នៃម្ហូបខ្មែរ តាមរយៈអ្វីដែលពួកគេបានញុំាទាំងនោះ។

ជាមួយគ្នានេះដែរ នាងខ្ញុំក៏ចូលចិត្តញ៉ាំអាហារបរទេសផ្សេងៗផងដែរ។ ប្រជាជនខ្មែរចូលចិត្តរបស់ថ្មីៗ និងឆ្ងាញ់ណាស់។ ប៉ុន្តែទោះជាយ៉ាងនោះក្តី សម្រាប់នាងខ្ញុំវិញ គឺនៅតែចូលចិត្តម្ហូបខ្មែរជាងគេ ព្រោះរសជាតិដែលអណ្តាតបានចាំហើយ យើងមិនអាចភ្លេចវាវិញបានដោយងាយៗឡើយ។

សំណួរៈ បន្ទាប់ពីការចេញផ្សាយសៀវភៅរបស់អ្នកឈ្មោះថា “NHUM” នេះ គឺមានរយៈពេល ២ឆ្នាំមកហើយ។ តើ នាពេលអនាគតនឹងមានគម្រោងធ្វើអ្វីខ្លះទៀតដែរ?

នៅពេលចេញផ្សាយសៀវភៅចម្អិនម្ហូបខ្មែរនេះដំបូងនៅឆ្នាំ 2019 គឺមានការកក់និងជាវច្រើនពីបណ្តាប្រទេសនានា ។ ឥឡូវនេះសៀវភៅ “NHUM” នេះត្រូវបានដាក់លក់ទៅកាន់ប្រទេសជាង ៤០ ដូច្នេះបច្ចុប្បន្នគេក៏អាចរកជាវបានតាមរយៈអាម៉ាហ្សូនបានផងដែរ។ ដូចដែលខ្ញុំបាននិយាយនៅមុននេះអីចឹង សកម្មភាពរបស់ខ្ញុំគឺដើម្បីធ្វើការផ្សព្វផ្សាយពីប្រទេសកម្ពុជា តាមរយៈ “ម្ហូបខ្មែរ” ដើម្បីឱ្យប្រជាជនខ្មែរមានមោទនភាព និងជឿជាក់លើសក្តានុពលរបស់ខ្លួនដែលមាន។ ជាមួយគ្នានេះ ការផ្សព្វផ្សាយពីខាងក្រៅ ក៏ជារឿងសំខាន់ផងដែរ។ បច្ចុប្បន្ន វាមានការលំបាកក្នុងការធ្វើដំណើរទៅមកពីបរទេស ក៏ប៉ុន្តែនាងខ្ញុំមានបំណងពង្រឹងនូវអ្វីចំពោះមុខដែលខ្លួនអាចធ្វើបានជាមុនសិន។

យ៉ាងណាមិញ យើងខ្ញុំមានបំណងបោះពុម្ពផ្សាយសៀវភៅថ្មីបន្ទាប់ផងដែរ។ ការបោះពុម្ពផ្សាយសៀវភៅ “NHUM” គឺយើងខ្ញុំបានខិតខំច្រើនអស់ពីលទ្ធភាពម្តងរួចមកហើយ ក៏ប៉ុន្តែយើងខ្ញុំតែងតែធ្វើការស្រាវជ្រាវ និងរៀនសូត្រនូវអ្វីថ្មីៗ ពីទីកន្លែងនិងមនុស្សថ្មីៗនានានៅតាមមូលដ្ឋាន ហើយខិតខំធ្វើការចងក្រងបន្តនូវចំណេះដឹងទាំងអស់នោះសម្រាប់ផ្សព្វផ្សាយបន្ត និងបន្សល់ទុកឱ្យយុវជនជំនាន់ក្រោយផងដែរ។ ដូច្នេះសូមប្រិយមិត្តរង់ចាំការបោះពុម្ពផ្សាយសៀវភៅលើកទី២ របស់យើងខ្ញុំនៅក្នុងពេលឆាប់ៗខាងមុខនេះកុំបីខាន!