មគ្គុទេសក៍ទេសចរនឹងការផ្តើមប្រកបអាជីវកម្មថ្មី-របរលក់ទាអាំង - NyoNyum - Comprehensive information site of Cambodia travel, sightseeing, souvenirs etc.

មគ្គុទេសក៍ទេសចរនឹងការផ្តើមប្រកបអាជីវកម្មថ្មី-របរលក់ទាអាំង

TOP › Column › NyoNyum Khmer Special Topics › មគ្គុទេសក៍ទេសចរនឹងការផ្តើមប្រកបអាជីវកម្មថ្មី-របរលក់ទាអាំង

2023.04.18

NyoNyum Khmer Special Topics

លោក លាង រដ្ឋា (៤១ឆ្នាំ) ជាមគ្គទេសក៍ទេសចរភាសាជប៉ុន មានស្រុកកំណើត និងរស់នៅខេត្តសៀមរាប។ លោកបានផ្តើមការងារជាមគ្គទេសក៍នៅឆ្នាំ២០០៨។ ដោយសារិវបត្តិជំងឺកូវីដ១៩ លោកបានសាកល្បងអាជីវកម្មថ្មី គឺបើកហាងលក់ទាអាំង លើចិញ្ចើមផ្លូវមួយកន្លែងក្នុងក្រុងសៀមរាប ដើម្បីសម្រួលដល់ជីវភាពរស់នៅ ខណៈពុំមានភ្ញៀវទេសចរជប៉ុនមកទស្សនាតំបន់អង្គរក្នុងអំឡុងពេលកូវីដ១៩កន្លងទៅ។

❤បំណងវិលត្រឡប់ទៅការងារមគ្គុទេសក៍វិញ៖ ៨០%

មូលហេតុផ្តើមអាជីវកម្មថ្មីលើអាជីពជាមគ្គុទេសក៍ទេសចរ៖

«ខ្ញុំបានចាប់ផ្តើមរបរលក់ទាអាំងនៅដើមឆ្នាំ២០២១ ខណៈកូវីដ១៩កំពុងផ្ទុះនិងមានការបន្ទូរបន្ថយការរឹតត្បិតឡើងវិញ។ តាមពិតទៅ ខ្ញុំក៏បានសង្កេតឃើញសន្ទុះនៃចំនួនភ្ញៀវទេសចរជប៉ុន ដាំក្បាលចុះនៅអំឡុងឆ្នាំ២០១៧តមក ហើយក៏មានបំណងបង្កើតអាជីវកម្មមួយសម្រាប់គ្រួសារ ដើម្បីជួយស្វែងរកចំណូលទ្រទ្រង់គ្រួសារដែរ ក៏ប៉ុន្តែដោយសារចេះតែមានភ្ញៀវជាហូរហែរខ្លះៗរហូតមក ក៏ចេះតែពុំមានពេលគ្រប់គ្រាន់សម្រាប់ត្រៀមរករបរថ្មីនេះទៅ។ យ៉ាងណាមិញ នៅដើមឆ្នាំ២០២១ ដោយជួបវិបត្តិប្រាក់ចំណូលខ្លាំងពេលគ្មានភ្ញៀវទេសចរជប៉ុន ខ្ញុំក៏បែរមកប្រកបរបរលក់ទាអាំងនេះតែម្តងទៅ»។

បច្ចេកទេសអាំងទាឱ្យមានរសជាតិឈ្ងុយឆ្ងាញ់៖

«ខ្ញុំបានរៀនពីរបៀបចម្អិនទាអាំងនេះពីមិត្តភក្តិខ្ញុំរស់នៅខេត្តកាលពី៥ឆ្នាំមុន ខណៈពេលទៅលេងផ្ទះរបស់គាត់ ហើយគាត់បានទទួលស្វាគមន៍ខ្ញុំជាមួយម្ហូបទាអាំងពិសេសនោះ។ ដោយយល់ឃើញថាថ្វីដៃអាំងទារបស់គាត់ល្អ ខ្ញុំបានសុំឱ្យគាត់បង្រៀនជាពិសេសនូវរបៀបអាំងទា និងសាច់ជ្រូកដែលមានរស់ជាតិ ឆ្ងាញ់ខុសប្លែកពីកន្លែងផ្សេងៗដែលខ្ញុំធ្លាប់បានហូបពីមុន។ ជាពិសេស រូបមន្តសាច់ជ្រូកអាំងស្បែកស្រួយ ដោយមិនយកទៅបំពងដូចអ្វីដែលខ្ញុំធ្លាប់ឃើញពីមុន ធ្វើឱ្យរស់ជាតិកាន់តែឈ្ងុយឆ្ងាញ់!

បញ្ហាប្រឈមក្នុងការបើកប្រកបរបរថ្មីនេះ៖

«ការរកអតិថិជនក៏មានផលលំបាកព្រោះអំឡុងពេលកូវីដ១៩ ទោះយើងលក់ក្នុងតម្លៃថោកប៉ុណ្ណាក៏ដោយ ក៏សឹងតែរកអតិថិជនមកជាវពីយើងពុំបានដែរ ពោលគឺស្ថានភាពសេដ្ឋកិច្ចគ្រួសារនីមួយៗក៏ជួបវិបត្តិខ្លាំង។ ម្យ៉ាងទៀត ការបង្កើតគំនិតអាជីវកម្មថ្មីនេះក៏វាជាការងារថ្មីសម្រាប់ខ្លួនខ្ញុំទៅទៀត ដែលតម្រូវឱ្យខ្ញុំត្រូវគិតច្រើន និងពិបាកយល់ពីតម្រូវការភ្ញៀវទោះបីជាគាត់ជាជនជាតិខ្មែរយើងដូចគ្នាក្តី»។ ទោះការស្វែងរកចំណូល និងអតិថិជនគឺពិបាកខុសពីរបរជាមគ្គទេសក៍ទេសចរក្តី ក៏លោកបានខិតខំតស៊ូជំនះនូវបញ្ហាចំពោះមុខរហូតតាំងពីចាប់ផ្តើមដំបូងតមក ហើយបច្ចុប្បន្ន ក៏មានភ្ញៀវស្គាល់ និងមកជាវទាអាំងពីហាងគាត់ជាប្រចាំផងដែរ។

ចំណុចពិសេសនៃអាជីវកម្មនេះ៖

«ដោយសារពិបាកក្នុងការប៉ាន់ប្រមាណចំនួនភ្ញៀវទេសចរជប៉ុនមកទស្សនាទឹកដីអង្គរខេត្តសៀមរាបនាពេលខាងមុខ ក្រោយវិបត្តិជំងឺកូវីដ១៩បញ្ចប់ ខ្ញុំពុំមានបំណងបោះបង់ចោលអាជីវកម្មលក់ទាអាំងនេះទេ។ ទោះវិបត្តិជំងឺកូវីដ១៩ បានបញ្ចប់ ហើយកំណើនភ្ញៀវទេសចរកើនឡើងវិញក៏ដោយ ក៏ខ្ញុំនៅតែបន្តរបរលក់ទាអាំងនេះដដែល ព្រោះខ្ញុំរីករាយនឹងឃើញអតិថិជនថ្មីនិងចាស់បន្តមកជាវ និងពិសារទាអាំងពីតូបខ្ញុំរាល់ល្ងាចដើម្បីពិសារជុំជាមួយគ្រួសារគាត់។ ពោលគឺខ្ញុំនឹងបន្តធ្វើការងារជាមគ្គុទេសក៍ទេសចរភាសាជប៉ុនផង និងប្រកបអាជីវកម្មនេះផង!»៕

គេហទំព័រទំនាក់ទំនងសេវាកម្មមគ្គុទេសក៍ទេសចររបស់លោក រដ្ឋា៖
https://cambodia-guide-ratha.jimdofree.com/
ទីតាំងតូបលក់ទាអាំង៖ (មើលផែនទីហ្គោហ្គល)

សម្រាប់ពត៌មានបន្ថែម
【NyoNyum Khmer No. 56】