មតិយោបល់អ្នកប្រើប្រាស់ ការទូទាត់ប្រាក់តាមប្រព័ន្ធអេឡិចត្រូនិក

TOP › Column › NyoNyum Khmer Special Topics › មតិយោបល់អ្នកប្រើប្រាស់ ការទូទាត់ប្រាក់តាមប្រព័ន្ធអេឡិចត្រូនិក

2021.09.20

NyoNyum Khmer Special Topics

ការទូទាត់ប្រាក់នាពេលបច្ចុប្បន្នកំពុងមានភាពសម្បូរបែប និងមានជម្រើសជាច្រើនសម្រាប់អ្នកប្រើប្រាស់។ ជាក់ស្ដែងដូចជា នៅតាមផ្សារទំនើប ហាងលក់សម្ភារៈប្រើប្រាស់ផ្សេងៗ ហាងកាហ្វេ និងភោជនីយដ្ឋានជាដើម កំពុងមានសេវាកម្មទូទាត់ប្រាក់តាមបែបឌីជីថលដោយគ្រាន់តែធ្វើការស្កេនឃ្យូអរកូដ (QR Code) ឬប្រើកាតធានាគារ។
តើមានការប្រើប្រាស់ការទូទាត់តាមប្រព័ន្ធអេឡិចត្រូនិកក្នុងជីវិតរស់នៅប្រចាំថ្ងៃបែបណាខ្លះ? តើអ្នកប្រើប្រាស់យល់ឃើញយ៉ាងដូចម្តេចចំពោះការទូទាត់ប្រាក់បែបប្រព័ន្ធអេឡិចត្រូនិកនេះ?

អ្នករស់នៅទីក្រុង

លោក យ៉ូន វឌ្ឍនៈ អាយុ ២២ ឆ្នាំ

ស្រុកកំណើត ខេត្តកំពង់ចាម
បច្ចុប្បន្ន ជានិស្សិតពេទ្យ កំពុងសិក្សានៅសាកលវិទ្យាល័យវិទ្យាសាស្រ្តសុខាភិបាល

លោក វឌ្ឍនៈ បានប្រាប់ឱ្យដឹងថា គាត់បានយល់ដឹងពីការទូទាត់ប្រាក់តាមបែបឌីជីថល ចាប់តាំងពីមកបន្ដការសិក្សានៅរាជធានីភ្នំពេញ។ “ខ្ញុំស្គាល់ការចាយលុយតាមកាតធានាគារនៅពេលឡើងមករៀននៅភ្នំពេញ។ ការទូទាត់ប្រាក់នៅទីនេះមានច្រើនបែបណាស់ ដោយពេលខ្លះទៅខ្ញុំមិនមានលុយនៅជាប់ខ្លួនក៏អាចទិញរបស់អ្វីមួយបានដែរ ដោយគ្រាន់តែឱ្យគេគិតតាមកាត (Card) ឬស្កេនឃ្យូអរកូដ (QR Code) ជាការស្រេច”។ លោកបានបន្តឱ្យដឹងទៀតថា ជាទូទៅ រូបលោកនិយមចាយប្រាក់តាមបែបឌីជីថលនេះ នៅតាមផ្សារទំនើបសម្រាប់ទូទាត់ទៅលើអីវ៉ាន់ផ្សេងៗ និងទៅលើថ្លៃសំបុត្រកុនជាដើម ព្រោះថាការទូទាត់ដោយរបៀបនេះ គេមានបញ្ចុះតម្លៃផងដែរ។ “មែនទែនទៅខ្ញុំប្រើការទូទាត់លុយតាមបែបឌីជីថល នៅពេលដែលទៅកន្លែងមានសេវាកម្មបែបនេះតែប៉ុណ្ណោះ
ដូចជានៅ ផ្សារទំនើប រោងភាពយន្ដជាដើម។ ខ្ញុំគិតថា វាងាយស្រួល និងចំណេញបន្ដិចដែរ ដោយសារពេលយើងគិតលុយតាមរបៀបហ្នឹង គេមានបញ្ចុះតម្លៃខ្លះដែរ។ មួយវិញទៀត ខ្ញុំទូទាត់លុយរបៀបនេះនៅពេលទិញរបស់អនឡាញ កម្ម៉ង់ម្ហូបតាម APP (កម្មវិធីសម្រាប់បញ្ជាទិញម្ហូបផ្សេងៗក្នុងទូរស័ព្ទដៃ) និងប្រើសម្រាប់បញ្ចូលកាតទូរស័ព្ទ”។
យ៉ាងណាមិញលោកក៏បានលើកឡើងពីផលវិបាកមួយចំនួននៃការទូទាត់ប្រាក់តាមបែបឌីជីថលនេះដែរ។ ដោយបានប្រាប់ថា “ការទូទាត់ប្រាក់បែបនេះវាលក្ខណៈងាយស្រួលក៏ពិតមែន ប៉ុន្ដែខ្ញុំគិតថា ការចាយ ក្រដាស់ប្រាក់ដោយផ្ទាល់វាងាយស្រួលជាង ដោយសារយើងមិនចាំបាច់យកលុយទៅដាក់នៅក្នុងកុងធានាគារ ហើយណាមួយ
របស់របរនៅស្រុកយើងភាគច្រើនគេនិយមគិតលុយផ្ទាល់ៗនៅឡើយ”។

លោក យ៉េត សាវ័ន្ត អាយុ ៣២ ឆ្នាំ

រស់នៅក្នុងទីក្រុងភ្នំពេញ
ជានាយកប្រតិបត្តិនៃក្រុមហ៊ុន
ប្រឹក្សាយោបល់ MM4A

លោក សាវ័ន្ត ចាប់ផ្តើមប្រើការទូទាត់តាមអេឡិចត្រូនិកនៅឆ្នាំ ២០១៨ ។ លោកយល់ឃើញថាវាមានភាពងាយស្រួលក្នុងការប្រើប្រាស់ និងមិនចាំបាច់បង់ថ្លៃសេវា ដូច្នេះទើបលោកបន្តប្រើប្រាស់វារហូតតាំងពីពេលនោះមក។ ប៉ុន្តែដោយសារជំងឺកូវីដ-១៩ បច្ចុប្បន្ន លោកមានការប្រើប្រាស់ការទូទាត់តាមកម្មវិធីទូរស័ព្ទដៃរបស់ធនាគារនេះ
កាន់តែញឹកញាប់ជាងមុន។ លោក សាវ័ន្តបានថ្លែងដូច្នេះថា៖ “ខ្ញុំតែងតែប្រើកម្មវិធីទូរស័ព្ទចល័តរបស់ធនាគារ ABA ព្រោះវាមានសេវាបង់ប្រាក់ធំទូលាយ និងមានមុខងារខ្ពស់។ ចាប់តាំងពីមានជំងឺកូវីដ១៩ ផ្ទុះឡើងកាលពីឆ្នាំមុនមក ការប្រើសេវាទូទាត់បែបអេឡិចត្រូនិកបានកើនឡើងច្រើនជាងមុន ជាពិសេសនៅពេលញ៉ាំអាហារនៅតាមភោជនីយដ្ឋាន និងការដើរទិញអីវ៉ាន់នៅផ្សារទំនើប ក៏ដូចជាការទូទាត់ថ្លៃអគ្គិសនី ទឹក និងការបង់ប្រាក់ប្រចាំខែសម្រាប់ការចោលសំរាមជាដើមគឺ ខ្ញុំធ្វើឡើងដោយការទូទាត់តាមទូរស័ព្ទដៃទាំងអស់។ វាពិតជាងាយ-
ស្រួល និងចំណេញពេលវេលា” ។
មុនពេលមានជំងឺកូវីដ១៩កើតឡើង លោកបានលើកឡើងនូវផលវិបាកមួយចំនួននៅពេលទូទាត់វិក្កយបត្រប្រើប្រាស់ម្តងៗ ដែលត្រូវចំណាយពេលវេលារង់ចាំយូរ និងត្រូវប្រជ្រៀតក្នុងហ្វូងមនុស្សដើម្បីទៅបង់ប្រាក់ម្តងៗ។ ចាប់តាំងពីមានការទូទាត់ពីចម្ងាយត្រូវបានណែនាំខ្ញុំលែងមានការព្រួយបារម្ភអំពីរឿងទៅតម្រង់ជួរណែនណាន់ទៅដោយមនុស្សនៅកន្លែងបង់ភ្លើង និងទឹកទៀតហើយ។ ក្រៅពីអាចធ្វើវាបានភ្លាមៗ យើងមានកំណត់ត្រាទូទាត់នៅសល់នៅក្នុងទូរស័ព្ទទៀត ដូច្នេះទាំងពេលវេលា និងសុវត្ថិភាព គឺវាជួយបានច្រើនណាស់”។

អ្នករស់នៅតាមខេត្ត

កញ្ញា គុណ ស៊ាងអ៊ី អាយុ ២១ ឆ្នាំ

រស់នៅខេត្តត្បូងឃ្មុំ
ជាគ្រូបង្រៀនកិច្ចសន្យានៅសាលាបឋមសិក្សាភូមិស្អំ ខេត្តត្បូងឃ្មុំ

អ្នកគ្រូបានប្រាប់ពីបទពិសោធន៍របស់ខ្លួនអំពី ទំនើបកម្មនៃការទូទាត់សាច់ប្រាក់តាមប្រព័ន្ធឌីជីថលថា វាពិតជាមានភាពងាយស្រួលសម្រាប់ការបញ្ជាទិញអីវ៉ាន់ពីចម្ងាយ (ប្រព័ន្ធអនឡាញ) និងការបញ្ចូលទឹកប្រាក់
ក្នុងទូរសព្ទដៃ។ មួយវិញទៀត វាពុំចាំបាច់ប្រើក្រដាសប្រាក់ផ្ទាល់ដើម្បីបង្ការពីការឆ្លងមេរោគ ក្នុងបរិបទកូវីដ-១៩ ឬការបាត់បង់ប្រាក់ដោយប្រការណាមួយជាដើម។
អ្នកគ្រូសង្កេតឃើញថា ទំនើបកម្មនៃការទូទាត់សាច់ប្រាក់តាមប្រព័ន្ធឌីជីថលនៅមិនទាន់ទូលំទូលាយនោះទេ ពោលគឺ មានតែនៅតាមក្រុងធំៗនិងតំបន់ទីប្រជុំជនតាមខេត្តតែប៉ុណ្ណោះ ខណៈពេលដែលនៅតាមភូមិ
និងស្រុកស្ទើរតែមិនមានការទូទាត់ប្រាក់តាមរបៀបនេះឡើយ។ អ្នកគ្រូបានលើកឡើងថា “នៅតាមភូមិគ្មានតម្រូវការទូទាត់ប្រាក់តាមបែបឌីជីថលដូចជាការស្កេនឃ្យូអរកូដ (QR Code) ការបញ្ជាទិញអីវ៉ាន់ផ្សេងៗ ដូចនៅតាមបណ្ដាខេត្ត និងទីក្រុងឡើយ។ អ្នកភូមិភាគច្រើនមិនដឹងពីការទូទាត់ប្រាក់តាមរបៀបទាំងនេះទេ ប៉ុន្ដែផ្ទុយមកវិញ ពួកគាត់បានស្គាល់សេវាកម្មផ្ញើប្រាក់ក្នុងស្រុកមួយចំនួនដែរ”។ អ្នកគ្រូរូបនេះបានបន្ដទៀតថា៖ “យុវជនក្នុងភូមិមួយចំនួនមានការងារជាគ្រូបង្រៀនបុគ្គលិកក្រុមហ៊ុន និងអ្នករកស៊ីអាជីវកម្មខ្នាតតូច សុទ្ធតែបានស្គាល់ និងយល់ដឹងពីការទូទាត់សាច់ប្រាក់តាមប្រព័ន្ធឌីជីថល”។ ជាក់ស្តែងដូចជា អ្នកគ្រូផ្ទាល់ បានទូទាត់ប្រាក់តាមបែបឌីជីថលដូចជា ការប្រើកម្មវិធី (APP) របស់ធនាគារលើសេវាកម្មបញ្ចូលទឹកប្រាក់ក្នុងទូរស័ព្ទ និងបញ្ជា
ទិញអីវ៉ាន់ផ្សេងៗ តាមប្រព័ន្ធអនឡាញ។ ចំពោះ អ្នករកស៊ីអាជីវកម្មខ្នាតតូចនៅភូមិដូចជា លក់សម្លៀកបំពាក់ លក់ឡេជាដើម អ្នកគ្រូសង្កេតឃើញថា ពួកគាត់បានប្រើប្រាស់គណនីធនាគារក្នុងស្រុកមួយចំនួនយ៉ាងហោចណាស់ក៏ពីរដែរ ដើម្បីឱ្យការទូទាត់ប្រាក់របស់អតិថិជនមានភាពងាយស្រួល ឬអាចមានជម្រើសប្រើសេវាកម្មផ្ញើប្រាក់ក្នុងស្រុកបានដូចគ្នា។

កញ្ញា មាស វិច្ឆកា អាយុ ២៣ ឆ្នាំ

រស់នៅខេត្តតាកែវ
ជាអាជីវករ និងជាអ្នកលក់អនឡាញអាជីព

កញ្ញាបានឮពីការបង់ប្រាក់តាមអនឡាញកាលពី ៥ ទៅ ៦ឆ្នាំមុនមកម្ល៉េះ។ ដោយឡែកក្នុងរយៈពេល ២ឆ្នាំ ចុងក្រោយនេះកញ្ញាបានចេះប្រើប្រាស់សេវាកម្មមួយចំនួនដូចជា៖ កាតធានាគារ ABA កាតធនាគារ អេស៊ីលីដាទាន់ចិត្ត អេបវីង អេបទ្រូម៉ានីយ៉ាងស្ទាត់ជំនាញ។ មូលហេតុដែលកញ្ញាចេះប្រើសេវាកម្មទាំងនេះច្បាស់ ព្រោះអតិថិជនរបស់កញ្ញានិយមប្រើសេវាកម្មទាំងនេះច្រើន។
រូបកញ្ញាផ្ទាល់ចូលចិត្តប្រើប្រាស់សេវាកម្មទូទាត់សាច់ប្រាក់តាមបែបឌីជីថលរបស់ ធនាគារ ABA ជាងគេ ដ្បិតរបៀបនៃការប្រើសេវាកម្មនេះ មានភាពងាយស្រួល គឺគ្រាន់តែស្គាល់លេខគណនីដើម្បីផ្ញើទៅកាន់ដៃគូរបស់យើងរួចជាការស្រេច ហើយចំពោះអ្នកលក់អនឡាញវិញ សេវាកម្មនេះគឺពេញនិយមខ្លាំងណាស់។ ម្យ៉ាងវិញទៀត បើមានករណីផ្ញើច្រឡំ យើងគ្រាន់តែប្រាប់ទៅកាន់ក្រុមការងាររបស់ធានាគារ ABA នោះគេនឹងដោះស្រាយជូន។ ប៉ុន្តែបើនិយាយអំពីសេវាកម្មភ្នាក់ងារផ្ទេរលុយវិញ កញ្ញាចូលចិត្តប្រើគណនីវីង និងទ្រូម៉ានីជាងគេ ព្រោអតិថិជនអនឡាញរបស់កញ្ញាស្ទើរតែ៧០% ចូលចិត្តប្រើសេវាកម្មទាំងពីរនេះ។
ក្នុងនោះដែរ កញ្ញាបានបង្ហាញមតិថា «រវាងការទូទាត់សាច់ប្រាក់តាមប្រព័ន្ធឌីជីថល និងការទូទាត់តាមចាយក្រដាស់ប្រាក់ផ្ទាល់ គឺ៥០%ស្មើគ្នា ព្រោះខ្ញុំជាអ្នកលក់នៅក្នុងផ្សារទើបខ្ញុំដឹង អតិថិជនរបស់ខ្ញុំមួយចំនួនធំ គឺមកពីស្រុកស្រែ។ ដូច្នេះអតិថិជនខ្លះមិនទាំងស្គាល់ថា អ្វីជាកុង ABA ឬជាការចាយលុយតាមបែបប្រព័ន្ធបច្ចេកវិទ្យាផង ហើយអ្នកខ្លះទៀតស្គាល់តែមិនទាន់ចេះប្រើដែរ។ មែនទែនទៅ ពួកគាត់ចូលចិត្តចាយក្រដាស់ប្រាក់ផ្ទាល់ជាជាងការចាយតាមបែបឌីជីថល»។