តើមានការជួយឧបត្ថម្ភបែបណាខ្លះសម្រាប់ក្រុមទូកងចូលរួមក្នុងការប្រកួត?

TOP › Column › NyoNyum Khmer › តើមានការជួយឧបត្ថម្ភបែបណាខ្លះសម្រាប់ក្រុមទូកងចូលរួមក្នុងការប្រកួត?

2024.02.02

ជាទូទៅ ក្រុមទូកងចូលរួមប្រកួតក្នុងពិធីបុណ្យអុំទូកតែងតែមានការឧបត្ថម្ភនានា ពីថ្នាក់តំបន់ក្នុងមូលដ្ឋានខ្លួន រហូតដល់ថ្នាក់ជាតិ។ ភាគច្រើន ក្រសួងនិងមន្ទីរ រួមទាំងក្រុមហ៊ុនឯកជនមួយចំនួនពាក់ព័ន្ធចូលរួមផ្តល់ជាប្រាក់ឧបត្ថម្ភ និងឧបត្ថម្ភជាសម្ភារៈនានាសម្រាប់ក្រុមកីឡាករអុំទូក។ បន្ទាប់ពីមកដល់ទីក្រុងភ្នំពេញ ក្រុមកីឡាករអុំទូកក៏អាចទទួលបានការឧបត្ថម្ភបន្ថែមផ្សេងៗផងដែរ ពីរដ្ឋមន្ត្រី ទេសរដ្ឋមន្ត្រី អ្នកជំនួញ (ឧកញ៉ា) និងក្រុមហ៊ុនឯកជនផ្សេងៗដែលចាប់អារម្មណ៍នឹងការប្រកួតរបស់ក្រុមនោះ។ យើងខ្ញុំបានចុះទៅសាកសួរលោក ហ៊ី វាសនា (អាយុ៦២ឆ្នាំ) ដែលជាប្រធានក្រុមដឹកនាំក្រុមទូកង ស្លាកលេខ៣០៩ និងសមាជិកក្រុមដើម្បីស្វែងយល់ពីស្ថានភាព និងជីវភាពរស់នៅរយៈពេល៣ថ្ងៃនៅរាជធានីភ្នំពេញ ក្នុងអំឡុងពិធីបុណ្យអុំទូកឆ្នាំ២០២៣។

សំណួរ៖ តើលោកពូបានដឹកនាំក្រុមចូលរួមប្រកួតក្នុងពិធីបុណ្យអុំទូកបែបនេះបានប៉ុន្មានដងហើយ?

ចម្លើយ៖ ក្រុមទូកង យើងខ្ញុំមកពីវត្តស្រះចក ខេត្តកំពង់ឆ្នាំង ហើយយើងបានមកប្រកួតនៅទីក្រុងភ្នំពេញសម្រាប់ពិធីបុណ្យអុំទូក ច្រើនជំនាន់មកហើយ។

សំណួរ៖ ថ្ងៃនេះជាថ្ងៃទីពីរនៃការប្រកួត តើលោកពូមានអារម្មណ៍បែបណាចំពោះការប្រកួតកាលពីម្សិលមិញ និងការហ្វឹកហាត់កន្លងមក?

ចម្លើយ៖ យើងបានឈ្នះទាំងពីរប្រកួតកាលពីម្សិលមិញ។ យើងនឹងត្រូវប្រកួតម្ដងទៀតនៅរសៀលនេះជាមួយនឹងក្រុមទូកងឈ្នះម្សិលមិញផ្សេងទៀត ដូច្នេះក្រុមយើងនឹងប្រឹងប្រែងហាត់ ដើម្បីទទួលជ័យជម្នះក្នុងថ្ងៃនេះ។ ប្រសិនបើក្រុមយើងឈ្នះម្តងទៀតក្នុងជុំទី២ សម្រាប់ថ្ងៃនេះ យើងនឹងអាចចូលរួមក្នុងការប្រកួតវគ្គផ្តាច់ព្រ័តនៅថ្ងៃចុងក្រោយ។ ដូច្នេះហើយ យើងបានបន្តហ្វឹកហាត់ដូចធម្មតានៅព្រឹកនេះ។

សំណួរ៖ តើក្រុមទូកងរបស់លោកពូទទួលបានការឧបត្ថម្ភបែបណាខ្លះដែរ?

ចម្លើយ៖ ក្រុមការងាររបស់យើងទទួលបានជំនួយឧបត្ថម្ភជាចម្បងពីមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង និងក្រុមហ៊ុនរកស៊ីផែនេសាទ និងពីសហគមន៍នៅមូលដ្ឋាន។ ឆ្នាំនេះ មន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានឧបត្ថម្ភដល់ក្រុមការងារយើងចំនួន ២លានរៀល។ បន្ថែមពីលើការជួយឧបត្ថម្ភលើសាឡាងសម្រាប់ធ្វើដំណើរទៅមកភ្នំពេញ និងសម្រាប់សមាជិកក្រុមរបស់យើងស្នាក់នៅរយៈពេលបីថ្ងៃ។ ចំណែកក្រុមហ៊ុនផែនេសាទវិញ បានផ្តល់ការឧបត្ថម្ភផ្នែកអាហារដូចជា អង្ករ សាច់ និងភេសជ្ជៈដែលចាំបាច់សម្រាប់រយៈពេលបីថ្ងៃនេះ។ ក្រោយមក មុនក្រុមយើងខ្ញុំមកភ្នំពេញ ខ្ញុំបានទទួលអំណោយពីអ្នកភូមិចំនួន ១.៦ លានរៀល ព្រមទាំងថវិកា ៥00,000 រៀល សម្តេចចៅហ្វាវាំងរដ្ឋមន្ត្រីក្រសួងព្រះបរមរាជវាំង រួមទាំងថ្លៃជួសជុលទូកមួយចំនួនផងដែរ។

ឥឡូវនេះ យើងក៏កំពុងទទួលបានជំនួយមួយចំនួនពីក្រុមហ៊ុនឯកជនផ្សេងទៀតនៅទីនេះក្នុងទីក្រុងភ្នំពេញ លើផ្នែកភេសជ្ជៈ (ភេសជ្ជៈថាមពល) និងអាហារ។ គណៈកម្មាធិការរៀបចំបុណ្យជាតិ ក៏បានផ្តល់ជំនួយជាទឹក និងស្បៀងអាហារផ្សេងៗ ព្រមទាំងប្រាក់ឧបត្ថម្ភចំនួន១ម៉ឺនរៀលក្នុងមួយថ្ងៃដល់កីឡាករអុំទូកយើងផងដែរ។

សំណួរ៖ តើមនុស្សប្រភេទណាដែលត្រូវបានជ្រើសរើសចូលជាកីឡាកអុំទូក?

ចម្លើយ៖ ក្រុមការងាររបស់យើង ធ្វើការជ្រើសរើសជាទូទៅ ផ្តោតលើយុវជនអ្នកស្ម័គ្រចិត្តពីក្នុងភូមិឃុំរបស់យើង។ ដោយសារពិធីបុណ្យអុំទូកនេះជាព្រឹត្តិការណ៍ប្រពៃណីសម្រាប់ជាតិ ដូច្នេះមានយុវជនជាច្រើនចូលរួមជាមួយយើងដោយស្ម័គ្រចិត្តជារៀងរាល់ឆ្នាំ។ យើងទាមទារឱ្យកីឡាករអុំទូកត្រូវចេះហែលទឹក និងមានកម្លាំងសម្បទារល្អ និងចេះស្តាប់វិន័យក្នុងក្រុមជាដើម។

សំណួរ៖ យើងឃើញមានកុមារតូចៗ និងស្ត្រីចំណាស់បីបួននាក់នៅលើសាឡាងនេះ។ តើពួកគាត់ក៏ជាសមាជិកក្រុមរបស់លោកពូដែរឬ?

ចម្លើយ៖ ក្រុមរបស់យើងមានចំនួនសរុប ៦៥នាក់។ សមាជិកភាគច្រើនជាអ្នកស្ម័គ្រចិត្ត ដូច្នេះមានស្ត្រីចំណាស់មកពីភូមិជាចុងភៅ និងកីឡាករខ្លះយកកូនចៅមកលេងជាមួយដែរ។ អ្នកអុំទូកយើងមាន ៤៥នាក់ ក្នុងនោះមានកីឡាករត្រៀមចំនួន ១០នាក់ផ្សេងទៀតមកពីភូមិតែមួយ។

សំណួរ៖ តើក្រុមលោកពូមានលក្ខណៈពិសេសដូចម្តេចខ្លះដើម្បីត្រៀមខ្លួនយកឈ្នះការប្រកួតនីមួយៗ?

ចម្លើយ៖ ក្នុងនាមជាអ្នកដឹកនាំក្រុម ខ្ញុំព្យាយាមស្វែងយល់ពីចរិតលក្ខណៈរបស់កីឡាករអុំទូកម្នាក់ៗ ហើយធ្វើការសម្រេចចិត្តកំណត់ទីតាំងចែវលើទូក និងតាមដាន គ្រប់គ្រងស្ថានភាពរាងកាយរបស់ពួកគាត់គ្រប់គ្នា។ ដោយសារយើងហាត់ និងប្រណាំងក្រោមកម្តៅថ្ងៃ យើងផ្តល់អាទិភាពដល់ការរក្សាកម្លាំងរាងកាយឱ្យបានល្អជាងអ្វីៗផ្សេងទៀត ដូច្នេះហើយយើងមានការត្រួតពិនិត្យយ៉ាងតឹងរ៉ឹងដើម្បីការពារកីឡាករមិនឱ្យចេញទៅលេងក្រៅយប់ជ្រៅ ឬផឹកស្រា។

សំណួរ៖ ខ្ញុំបានឃើញពីការហ៊ោផ្តល់កម្លាំងចិត្តឱ្យគ្នាទៅវិញទៅមកមុននេះ។ តើលោកពូធ្វើវាឡើងនៅពេលណា?

ចម្លើយ៖ ក្រុមរបស់យើងតែងតែធ្វើហ៊ោផ្តល់កម្លាំងចិត្តបែបនេះមុនពេលហ្វឹកហាត់ ឬចូលប្រកួត ដើម្បីបញ្ជាក់ឡើងវិញថា កីឡាករត្រូវបានរៀបចំយ៉ាងត្រឹមត្រូវ និងត្រៀមរួបរួមជាក្រុមតែមួយរួចរាល់ហើយសម្រាប់ការប្រកួត ឬចេញដំណើរទៅហាត់សម។ ក្រោយមក យើងស្រោចទឹកឱ្យពរជ័យដល់ពួកគេ។

តើអ្នករាំក្បាលទូកជានរណា?

លោក ចាន់ នួន អាយុ ៧៣ ឆ្នាំ ជាអ្នករាំក្បាលទូកអាជីពម្នាក់ សម្រាប់ក្រុមទូកងស្លាកលេខ ៣០៩ មកពីវត្តស្រះចក។ លោកតាបានបង្ហើបប្រាប់ពីតួនាទីអ្នករាំក្បាលទូកដូច្នេះថា៖ «អ្នករាំក្បាលទូកមានតួនាទីសំខាន់ណាស់ក្នុងការបង្កើនល្បឿនទូកក្នុងពេលប្រណាំង។ ម្យ៉ាងទៀត ការបង្កើតឱ្យមានចង្វាក់ស៊ីគ្នាពេលអុំម្តងៗគឺសំខាន់ណាស់ សម្រាប់អ្នកចែវទូកទាំងអស់ដើម្បីបង្កើនល្បឿនទូកឱ្យលឿនខ្លាំង។ ដើម្បីឈ្នះ មានក្រុមខ្លះគេប្រើល្បិចផ្សេងៗ ប៉ុន្តែក្រុមយើងរក្សាការប្រកួតដោយយកយុត្តិធម៌ជាធំ ហើយខំធ្វើឱ្យអស់ពីសមត្ថភាពសម្រាប់ក្រុមខ្លួន។ បើនិយាយពីជំនឿវិញ ទូកប្រណាំងនីមួយៗតែងតែមានព្រលឹងអ្នកចាំថែរក្សាទូកស្ថិតនៅ។ ទូកយើងមានអ្នកថែក្បាលទូកជាមនុស្សស្រី ដូច្នេះគាត់ហាក់ប្រចណ្ឌច្រើន។ បើទូកមានព្រលឹងស្ថិតជាមនុស្សប្រុសវិញ អ្នករាំក្បាលទូករូបនោះអាចផឹកស្រា ឬដើរលេងយប់អធ្រាត្របាន។ ប៉ុន្តែសម្រាប់ខ្ញុំវិញ ពុំអាចធ្វើដូចគេបានទេព្រោះខ្លាចគាត់ប្រចណ្ឌ ដូច្នេះខ្ញុំត្រូវតែនៅក្បែរគាត់ជានិច្ច ដោយធ្វើការសែនព្រេនសំណែនដោយយកចិត្តទុកដាក់បំផុត។»

ចំណាប់អារម្មណ៍កីឡាករអុំទូក៖

លោក ភូមិ កម្លោះឥតព្រួយ (២៦ឆ្នាំ) បានចូលរួមការប្រកួតទូកងនេះចំនួន៥លើក។ ក្រុមគាត់ធ្លាប់ទទួលបានជ័យលាភីលេខ២ទូទាំងប្រទេស។ លោកបានលើកឡើងពីការតាំងចិត្តចំពោះការប្រកួតទូកងឆ្នាំ២០២៣នេះដូច្នេះថា៖ «ក្រុមរបស់យើងបានត្រៀមរួចរាល់ហើយ! យើងទាំងអស់គ្នាស្តាប់ការណែនាំពីមេក្រុមដោយប្រុងប្រយ័ត្ន និងយកចិត្តទុកដាក់ចំពោះការណែនាំរបស់គណៈកម្មាធិការរៀបចំការប្រកួត។ យើងនឹងប្រឹងប្រែងឱ្យអស់ពីសមត្ថភាពក្នុងការប្រកួតបន្ទាប់នេះ ដើម្បីទទួលបានជ័យជំនះសម្រាប់ជាកិត្តិយសជូនដល់ភូមិយើង!!»