មុខមាត់ថ្មីរបស់ទីក្រុងសៀមរាបក្រោយគម្រោងសាងសង់ផ្លូវទាំង៣៨ខ្សែបញ្ចប់

TOP › Column › NyoNyum Khmer Special Topics › មុខមាត់ថ្មីរបស់ទីក្រុងសៀមរាបក្រោយគម្រោងសាងសង់ផ្លូវទាំង៣៨ខ្សែបញ្ចប់

2022.09.27

ស្របគ្នានឹងការចូលរួមអនុវត្តនូវផែនការអភិវឌ្ឍទីក្រុងឆ្លាតវៃកម្រិតអាស៊ាន រដ្ឋបាលខេត្តសៀមរាបបានបង្កើតផែនការអភិវឌ្ឍហេដ្ឋា រចនាសម្ព័ន្ធសាធារណៈក្នុងក្រុង ដើម្បីសម្រួលដល់ការធ្វើដំណើររបស់ប្រជាពលរដ្ឋ និងបង្កើនសោភ័ណភាពក្នុងក្រុង។ ការសាង សង់ហេដ្ឋារចនាសម្ព័ន្ធផ្លូវចំនួន ៣៨ខ្សែ គឺមានប្រវែងសរុប១០៨,៧៤ គីឡូម៉ែត្រ ប្រើប្រាស់ថវិកាជាតិប្រមាណ ១៥០លានដុល្លារ អាមេរិក។ ការដ្ឋានសាងសង់ផ្លូវចំនួន ៣៨ខ្សែនេះត្រូវបានបើកដំណើរការនាថ្ងៃទី៣០ ខែវិច្ឆិកា ឆ្នាំ២០២០ ហើយបានបញ្ចប់ ជាស្ថាពរក្នុងរយៈពេល១៣ខែ។ សមិទ្ធផលហេដ្ឋារចនាសម្ព័ន្ធផ្លូវទាំង ៣៨ខ្សែនេះ បានកែប្រែសោភណ្ឌភាពថ្មីសម្រាប់ក្រុងសៀមរាប ដើម្បីត្រៀមប្រែខ្លួនជាទីក្រុងឆ្លាតវៃកម្រិតអាស៊ាន។

រូបភាពផ្លូវសម្រាប់អ្នកជិះកង់ទើបសាងសង់ថ្មី (សិស្សានុសិស្សនិងអ្នកជិះកង់ហាត់ប្រាណប្រើប្រាស់ផ្លូវនេះជាញឹកញាប់បន្ទាប់ពីសង់រួច

រូបភាពផ្លូវស៊ីវុត្ថាក្នុងក្រុងសៀមរាបក្រោយជួសជុលរួច

យានយន្តត្រូវបានចត់យ៉ាងមានសណ្តាប់ធ្នាប់តាមគំនូសចំណតថ្មីលើដងផ្លូវ

នៅក្នុងគម្រោងសាងសង់ហេដ្ឋារចនាសម្ព័ន្ធផ្លូវ ៣៨ខ្សែដែលរដ្ឋបាលខេត្តសៀមរាបបានបញ្ចប់កន្លងទៅ ក៏មានបញ្ចូលនូវការរៀបចំកែលម្អក្នុងក្រុងជាច្រើនផងដែរ។ ការសាងសង់បន្ថែមនូវប្រព័ន្ធការពារទឹកជំនន់ក្នុងក្រុង ការរៀបចំខឿនចិញ្ចើមផ្លូវដោយបង្កើតឡើងនូវផ្លូវថ្មើរជើង ផ្លូវសម្រាប់ជនពិការ ផ្លូវសម្រាប់អ្នកជិះកង់ និងការរៀបចំឱ្យមាននូវគំនូសសញ្ញាសម្រាប់ចំណតយានយន្ត រួមទាំងគំនូសសញ្ញាចរាចរណ៍លើដងផ្លូវបានកែប្រែស្ថានភាពហេដ្ឋារចនាសម្ព័ន្ធក្នុងខេត្តឱ្យមានសណ្តាប់ធ្នាប់ជាងមុនច្រើន។ ម្យ៉ាងវិញទៀត ការដាំបង្គោលភ្លើងបំភ្លឺផ្លូវ ការដំឡើងភ្លើងសញ្ញាចរាចរណ៍ និងការបំពាក់ប្រព័ន្ធកាមេរ៉ាសុវត្ថិភាពតាមដងផ្លូវ ការដាក់បណ្តាញខ្សែកាប និងប្រព័ន្ធបញ្ជូនអគ្គិសនីក្រោមដី ការរៀបចំសួនច្បារឡើងវិញ និងការដាំដើមឈើលម្អតាមដងផ្លូវក៏កាន់តែធ្វើឱ្យក្រុងទាំងមូលមានសុវត្ថិភាព និងសោភណ្ឌភាពផងដែរ។ គម្រោងនេះក៏បានរួមបញ្ចូលនូវការងារស្តារ និងកែលម្អដងស្ទឹងសៀមរាប ដែលហូរកាត់ក្រុងមានប្រវែង ៤,៥២៥ម៉ែត្រ ដើម្បីបង្កើនសោភណ្ឌភាពក្រុងឱ្យកាន់តែទាក់ទាញ។

សម្រាប់ពត៌មានបន្ថែម
【NyoNyum Khmer No. 53】