សព្វថ្ងៃនេះ រមនីយឋានទេសចរណ៍ជប៉ុនដែលជនបរទេសនិយមទៅ គឺព្រះវិហារ Fushimi Inari នៅ Kyoto។ នៅច្រកចេញចូលនៃព្រះវិហារនោះ មានក្លោងទ្វារពណ៌ក្រហមដែលសាងសង់ដោយថវិកាសប្បុរសធម៌របស់អ្នកដែលធ្លាប់បានបួងសូង  ឬអ្នកដែលបានសំរេចបំណង។ ក្លោងទ្វារមានចំនួនរាប់ពាន់ជាបន្តបន្ទាប់រហូតដល់ខាងក្នុងបរិវេណ ដែលនាំឲ្យមានភាពល្បីឈ្មោះថាជាព្រះវិហារក្លោងទ្វាររាប់ពាន់ និងបានក្លាយទៅជាទេសភាពមួយគួរឲ្យគយគន់នៅប្រទេសជប៉ុន។

ក្នុងនាមជាមជ្ឈមណ្ឌលកំពួលនៃទីសក្ការបូជារបស់ព្រះវិហារ Inari នៅជប៉ុន និងក្នុងនាមជាព្រះអាទិទេពផ្នែកផលកសិកម្មធញ្ញជាតិ ឬផ្នែកភាពរុងរឿងនៃការរកស៊ី ទីតាំងនេះបានប្រមូលជំនឿរបស់ប្រជាជនទូទៅ អស់រយៈពេល១៣០០ឆ្នាំ។ នៅថ្ងៃពេញបរមីដំបូងបង្អស់នៅខែកុម្ភះ គេប្រារព្ឋពិធីបុណ្យ Fushimi Inari ហើយការចុះទៅបួងសួងក្នុងពិធីបុណ្យនេះត្រូវហៅថា ”ការចុះទៅប្រមូលផលសំណាង” ។ ថ្ងៃពេញបរមីដំបូងនៃឆ្នាំនេះ គឺថ្ងៃសៅរ៍ ទី០៦ ខែកុម្ភះ។

នៅថ្ងៃនោះគេនាំគ្នាទទួលទាន ”Oinari-san” ។ គេកំណត់ថាអ្នកនាំពាក្យរបស់ព្រះអាទិទេពនៃព្រះវិហារ Inari គឺសត្វកញ្ជ្រោងស។ នៅប្រទេសជប៉ុន ចាស់ៗនិយាយតៗគ្នាថាសត្វកញ្ជ្រោងចូលចិត្តស៊ីតៅហ៊ូបំពង ហើយក៏មានម្ហូបប្រភេទ Sushiមួយហៅថា ”Inari-Zushi” ដែលយកបាយ Sushi មករុំដោយតៅហ៊ូបំពងនោះ។ ម្យ៉ាងទៀតតាមដងផ្លូវឆ្ពោះទៅដល់ព្រះវិហារ មានហាងលក់វត្ថុអនុស្សាវរីយ៍ជាច្រើន ក្នុងនោះនំ ”Kawara-Sembei” ដែលមានរូបមុខសត្វកញ្ជ្រោងមានភាពល្បីល្បាញណាស់។

ចុះទៅបួងសួង ហើយទទួលទាន Oinari-san ដ៏ឆ្ងាញ់ៗ​ និងទិញនំរូបមុខសត្វកញ្ជ្រោង ថែមទាំងបានទទួលផលសំណាងទៀត ពិតជាប្រពៃណាស់។

Abura-age (តៅហ៊ូបំពង)

​​កាត់តៅហ៊ូឲ្យស្តើងៗ ហើយបំពងដោយប្រេងឆា។ ខ្នាតកម្រាស់ខុសៗគ្នាទៅតាមតំបន់។

Inari-Zushi

ស្ងោរតៅហ៊ូបំពងឲ្យផ្អែម ហើយដាក់បាយ Sushi លាយទឹកខ្មេះ។រូបរាងរបស់វាប្រដូចនឹងកញ្ចប់ស្រូវរុំដោយចំបើង ទើបគេតភ្ជាប់នឹងភាពសម្បូរ ធញ្ញជាតិគ្រប់ប្រភេទ។ គ្រឿងដែលលាយនៅក្នុងបាយទឹកខ្មេះមានលក្ខណះខុសៗគ្នាទៅតាមតំបន់។

នំ Kawara-Sembei រូបមុខកញ្ជ្រោង

ជាប្រភេទនំដែលមានរាងស្រួចៗ​​ ក្លិនឈ្ងុយ និងរសជាតិផ្អែម។

ប្រវត្តិរូប

អ្នកស្រី Tomonari Fumi

ទន្ទឹមនឹងធ្វើការជាអ្នកគ្រប់គ្រងរោងចក្រកែច្នៃសារធាតុ acrulic នៅក្រុងតូក្យូអ្នកស្រីធ្លាប់ ចូលរួមក្នុងការងារធ្វើម្ហូបអស់រយៈពេល ២៥ឆ្នាំ ក្នុងនាមជាអ្នកជំនួយការរបស់អ្នកស្រាវជ្រាវម្ហូប។ តាំងពីកុមារភាពមក អ្នកស្រីរស់នៅក្នុងបរិស្ថានមួយដែលនៅជិតស្និតនឹងវប្បធម៌ជប៉ុន ដូចជាពិធីលាងតែ សិល្បៈល្ខោន Noh សិល្បៈល្ខោន Kabuki ជាដើម។ ទើបសព្វថ្ងៃនេះអ្នកស្រីធ្វើការដឹកនាំច្នៃប្រឌិតវប្បធម៌ជប៉ុនទៅជាលក្ខណៈទំនើបមានដូចជាប្រអប់ដាក់ម្ហូបចូលឆ្នាំថ្មី និងកែវស្រាធ្វើពីសារធាតុ acrylic ជាដើម។
សម្រាប់ពត៌មានបន្ថែម ៖