ហាងអាហារជប៉ុន Izakaya DAI - NyoNyum - Comprehensive information site of Cambodia travel, sightseeing, souvenirs etc.

ហាងអាហារជប៉ុន Izakaya DAI

TOP › Column › NyoNyum Khmer Special Topics › ហាងអាហារជប៉ុន Izakaya DAI

2022.10.04

ស្ថានភាពបើកដំណើរការអាជីវកម្មថ្មីៗ ក្នុងក្រុងសៀមរាបពេលបច្ចុប្បន្ន

សៀមរាបជាក្រុងទេសចរណ៍ដែលប្រជុំដោយភ្ញៀវទេសចរជាតិ និងអន្តរជាតិជាច្រើនលើសកលលោកមកទស្សនាកម្សាន្ត។ ទោះស្ថិតនៅក្នុងវិបត្តិជំងឺកូវីដ១៩ក្តី វត្តមានអាជីវកម្មថ្មីៗបម្រើក្នុងវិស័យសេវាកម្មទេសចរណ៍មានដូចជា៖ ហាងអាហារ ហាងកាហ្វេនិងប៊ូទីកអូតែលជាដើម នៅតែបើកដំណើរការដើម្បីចូលរួមចំណែកផ្តល់ការងារជូនបុគ្គលិករបស់ខ្លួន ខណៈសេវាកម្មថ្មីៗខ្លះបើកដំណើរការដោយគំនិតច្នៃប្រឌិតខ្ពស់ ដើម្បីទាក់ទាញភ្ញៀវទេសចរ។ ដើម្បីត្រៀមទទួលភ្ញៀវទេសចរដែលនឹងត្រឡប់មកកម្សាន្តក្នុងខេត្តសៀមរាបឡើងវិញ ខណៈស្ថានភាពជំងឺកូវីដ១៩ក្នុងប្រទេសកម្ពុជា និងសកលលោកបានធូរស្បើយ តើម្ចាស់អាជីវកម្មទាំងនោះមានសេវាអ្វីពិសេសខ្លះ ហើយពួកគាត់យល់ឃើញយ៉ាងណាចំពោះគម្រោងស្មាតស៊ីធី និងការអភិវឌ្ឍរបស់ក្រុងសៀមរាបកន្លងទៅនេះ?

ហាងអាហារជប៉ុន Izakaya DAI

លោក Kunimasa Ito (៤៦ឆ្នាំ) ជាអតីតប្រធានក្រុមហ៊ុនភ្នាក់ងារទេសចរណ៍ Happy Smile Tour ស្ថិតក្នុងក្រុងសៀមរាប។ ដោយសារតែវិបត្តិជំងឺកូវីដ១៩ អូសបន្លាយជាងរយៈពេល ២ឆ្នាំកន្លងទៅនេះ លោក Ito បានសម្រេចចិត្តបើកដំណើរការហាង Izakaya DAI កាលពីខែកុម្ភៈ ឆ្នាំ២០២១ ដើម្បីបន្តផ្តល់ការងារជូនដល់បុគ្គលិករបស់លោកដែលមានចំនួនប្រមាណ ២០នាក់ ខណៈវិស័យទេសចរណ៍នៅពុំទាន់ត្រឡប់មកសភាពដើមដូចមុនជំងឺកូវីដ១៩កើតឡើង និងដោយសារលោកគិតថានៅក្នុងក្រុងសៀមរាប នៅមិនទាន់មានហាងអ៊ីហ្សាកាយ៉ាបែបជប៉ុនត្រឹមត្រូវនៅឡើយ។ ទោះជាយ៉ាងនោះក្តី ក្រោយពីបានបើកដំណើរការបានរយៈពេល ២ខែ ហាងរបស់់លោកត្រូវបានបិទមួយរយៈ ដោយសារការបិទខ្ទុបពីការផ្ទុះការឆ្លងជំងឺកូវីដ១៩ នាពេលនោះ។ តែទោះជាយ៉ាងនោះក្តី ក្រោយពីមានការបន្ធូរបន្ថយការរឹតបន្តឹងដាក់ចេញដោយរាជរដ្ឋាភិបាលកន្លងទៅបានធ្វើឱ្យហាង Izakaya DAI បើកទទួលអតិថិជនជនជាតិជប៉ុនដែលមកពីក្រុងប៉ោយប៉ែត ខេត្តបាត់ដំបង និងរាជធានីភ្នំពេញជាហូរហែរហូតមកឡើងវិញ។ នៅពេលយើងខ្ញុំបានសាកសួរលោក Ito ដែលជាម្ចាស់ហាង និងជាអ្នកគ្រប់គ្រងហាងផ្ទាល់ផងនោះ លោកបានបង្ហើបប្រាប់យើងខ្ញុំទាក់ទងនឹងយុទ្ធសាស្ត្រគ្រប់គ្រងហាងរបស់លោកទៅថ្ងៃខាងមុខដូច្នេះថា៖ «ខ្ញុំចង់ធ្វើឱ្យហាង Izakaya DAI នេះក្លាយជាកន្លែងមួយដែលជនជាតិជប៉ុន និងប្រជាពលរដ្ឋខ្មែរអាចមករីករាយនឹងមុខម្ហូបជប៉ុនរសជាតិដើមតែមួយគត់នៅខេត្តសៀមរាប។ ខ្ញុំក៏កំពុងគិតគូរផងដែរអំពីគម្រោងផ្តល់ជូនឥតគិតថ្លៃជាភេសជ្ជៈជាដើម សម្រាប់ភ្ញៀវដែលចូលរួមគាំទ្រក្រុមបាល់ទាត់អាជីពជប៉ុននៅខេត្តសៀមរាបមានដូចជា៖ ក្រុម “Soltiro Angkor FC” និងក្រុម “Angkor Tiger FC”។ តាមពិតទៅ ថ្មីៗនេះកីឡាករ Keisuke Honda បានមកលេងហាងនេះ ហើយនៅពេលនោះគាត់បាននិយាយថាគាត់ចង់ធ្វើឱ្យវិស័យកីឡាបាល់ទាត់ខេត្តសៀមរាបកាន់តែរីកចម្រើន និងមានអ្នកគាំទ្រកាន់តែច្រើនឡើងថែមទៀត។ ដូច្នេះដើម្បីចូលរួមក្នុងគំនិតផ្តូចផ្តើមបែបនេះ ខ្ញុំកំពុងគិតថានឹងផ្តល់ជាសេវាជូនស្រាបៀរមួយកែវដោយឥតគិតថ្លៃ សម្រាប់រយៈពេលមួយសប្តាហ៍ដល់អ្នកគាំទ្រកីឡាបាល់ទាត់គ្រប់រូប ដោយគ្រាន់តែបង្ហាញសំបុត្រទស្សនាការប្រកួតរបស់ខ្លួនដល់ហាងយើងខ្ញុំ។ ខ្ញុំពិតជាចង់ឃើញហាងមួយនេះក្លាយជាទីកន្លែងសម្រាប់ភ្ជាប់អ្នកគាំទ្របាល់ទាត់ក្នុងសហគមន៍ឱ្យមករីករាយកម្សាន្តនៅទីនេះណាស់»។

យ៉ាងណាមិញលោក Ito បានដឹងពីគម្រោងសាងសង់ក្រុងឆ្លាតវៃសម្រាប់ក្រុងសៀមរាបតាំងពីពេលមុនមក។ លោក Ito ៖ «ដោយសារប្រាសាទអង្គរបានធ្វើឱ្យខេត្តសៀមរាប ក្លាយជាគោលដៅទេសចរណ៍ដ៏ល្បីល្បាញមួយលើពិភពលោក ដូច្នេះទាំងហេដ្ឋារចនាសម្ព័ន្ធធ្វើដំណើរ និងការចេះថែរក្សាឱ្យមានសណ្តាប់ធ្នាប់រៀបរយ រួមទាំងអនាម័យសាធារណៈល្អ នឹងនាំឱ្យការអភិវឌ្ឍទីក្រុងសៀមរាបទាំងមូលកាន់តែប្រសើរឡើង។ ដូច្នេះ ការយល់ដឹងអំពីរឿងទាំងនោះរបស់ប្រជាពលរដ្ឋរស់នៅក្នុងខេត្ត និងការចូលរួមអនុវត្តផ្ទាល់ពីប្រជាពលរដ្ឋ នឹងធ្វើឱ្យបរិស្ថានរស់នៅរបស់ក្រុងទាំងមូលនឹងកាន់តែប្រសើរឡើងថែមទៀត។ ពាក់ព័ន្ធនឹងវិស័យទេសចរណ៍ ខ្ញុំនឹងខិតខំព្យាយាម ទាក់ទាញភ្ញៀវទេសចរជនជាតិជប៉ុនឱ្យមកទស្សនាខេត្តសៀមរាបកាន់តែច្រើនទៀត ហើយខ្ញុំសង្ឃឹមថា ការអភិវឌ្ឍទីក្រុងឆ្លាតវៃនេះនឹងជំរុញឱ្យប្រជាពលរដ្ឋខេត្តសៀមរាប គិតគូរឡើងវិញអំពីបរិស្ថានជុំវិញខ្លួន និងចូលរួមកសាងទីក្រុងរបស់ខ្លួនឱ្យកាន់តែទាក់ទាញ»៕